Ermənistanın Baş naziri Nikol Paşinyan İrəvana səfər edən ABŞ dövlət katibinin siyasi məsələlər üzrə müavini AlisonHakerlə görüşündə Bakıda məhkəməsi keçirilən hərbi cinayətkarların azadlığa buraxılması məsələsini qaldırıb.

Azərbaycanda 23 Ermənistan vətəndaşının saxlanıldığını iddia edən Paşinyan onları “hərbi əsir” adlandırıb.

“Görüş zamanı mən xüsusilə bu məsələyə diqqət yetirdim və qeyd etdim ki, Prezident Tramp bu məsələnin həllinə sadiq olduğunu açıq şəkildə bildirib.

Mən bu məsələ ilə bağlı ikitərəfli şəkildə gördüyümüz işləri təqdim etdim. Mən ABŞ dövlət katibinin müavinindən Birləşmiş Ştatların bu istiqamətdə göstərdiyi səylər barədə məlumat verməsini xahiş etdim. Mən eləcə də xahiş etdim ki, bu məsələ diqqət mərkəzində saxlanılsın”, - deyə Baş nazir bildirib.

Qeyd edək ki, Bakı Hərbi Məhkəməsində Ermənistan dövlətinin, onun dövlət qurumlarının vəzifəli şəxslərinin, hərbi qüvvələrinin və qanunsuz silahlı birləşmələrin bilavasitə rəhbərliyi və iştirakı, tapşırıq, göstəriş və təlimatları, maddi, texniki, şəxsi heyətlə verdiyi dəstəyi, mərkəzi qaydada idarəçiliyi ilə Azərbaycana hərbi təcavüz etmək məqsədilə aparılan müharibənin gedişində törədilmiş çoxsaylı cinayət faktlarına dair erməniəsilli 15 təqsirləndirilən şəxs ittiham edilir.

Onlar təcavüzkar müharibəni planlaşdırma, hazırlama, başlama və aparma, beynəlxalq müdafiədən istifadə edən şəxslərə və ya təşkilatlara hücum etmə, soyqırım, əhalini məhvetmə, köləlik, əhalini deportasiya etmə və ya məcburi köçürmə, insanları zorakılıqla yoxa çıxarma, işgəncə, müharibə qanunlarını və adətlərini pozma, silahlı münaqişə zamanı beynəlxalq humanitar hüquq normalarını pozma, hərbi soyğunçuluq, qəsdən adam öldürmə, terrorçuluq, terrorçuluğu maliyyələşdirmə, qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə, qanunvericiliklə nəzərdə tutulmayan silahlı birləşmələri və qrupları yaratma və digər cinayət maddələri ilə ittiham olunurlar.

Nikol Paşinyan əslində BakoSaakyan, ArkadiQukasyan, DavidBabayan, ArayikHarutyunyan, LevonMnatsakanyan, Davidİşxanyan, Davud Manukyan, VasiliBeqlaryan, MeliksetPaşayan və mühakimə olunan başqalarının nə qədər ağır cinayətlər törətdiyini yaxşı bilir.

Ermənistanın Baş naziri həmin terrorçular barəsində məhkəmənin ən ağır hökm çıxaracağını da anlayır. Bakı Hərbi Məhkəməsinin noyabrın 29-da keçirilən növbəti iclasında Azərbaycan ərazilərinin işğalında, etnik təmizləmə, soyqırım, dinc əhaliyə qarşı terrorçuluq və müharibə cinayətlərinə yol vermiş 15 nəfərə hökm oxunacağı gözlənilir. Təbii ki, bu xəbər Ermənistanda radikal müxalifət tərəfindən siyasi manipulyasiya ediləcək. Çünki Ermənistanda qarşıdan parlament seçkiləri gəlir.

Revanşistlər yenidən Qarabağ mövzusunu gündəmə gətirməyə, Paşinyanı satqınlıqda ittiham etməyə çalışacaq və hərbi cinayətkarların Bakıda məhkum edilməsini Baş nazirin siyasi uğursuzluğu kimi təqdim edəcək. Ona görə də Paşinyanın AlisonHakerlə görüşdə müharibə cinayətkarlarını “hərbi əsir” adlandırması və onların buraxılmasına yardım göstərməyi xahiş etməsi də seçkilər öncəsi daxili ictimai rəyə hesablanmış siyasi gedişdir.

Ermənistanda Qarabağ mövzusu seçkilərdə hələ də təsiredici amil olaraq qalır. Revanşist müxalifət Paşinyanın seçkilərdə şüar kimi təklif etdiyi “Sülh”ün Ermənistan üçün təhlükə olduğunu iddia edir. Bu baxımdan, hərbi cinayətkarlar barəsində hökm çıxarılmasını müxalifət hakimiyyətə qarşı əks-təbliğat vasitəsi kimi istifadə etməyə çalışacaq. Nikol Paşinyanın hərbi cinayətkarları azadlığa buraxmaq təşəbbüsü də müxalifətin sözügedən hücumlarınıneytrallaşdırmaq, mühafizəkar erməni cəmiyyətinin səslərini qazanmaq məqsədi daşıyır.

Əslində, Paşinyan Bakıda mühakimə olunan terrorçuların azadlığa çıxmasında maraqlı deyil. Çünki Bako Saakyan, Arkadi Qukasyan, DavidBabayan və digəriləri Paşinyanın siyasi rəqibləri, eks-prezidentlər Robert Köçəryana və Serj Sarkisyana bağlı adamlardır. İttiham aktında da onların Robert Köçəryanın, Serj Sarkisyanın birbaşa göstərişi və təlimatı əsasında qeyd edilən cinayətləri törətdiyi bildirilir.

Mühakimə olunanlar arasında Paşinyana yaxın yeganə şəxs ArayikHarutyunyandır. Milyarder RubenVardanyan isə Rusiyanın təlimatı əsasında Ermənistana getmək və Nikol Paşinyanı devirmək planının tərkib hissəsi olub. Onun vaxtilə Qarabağa göndərilməsi də həmin məqsədə xidmət edirdi.

Ona görə də həmin cinayətkarların azadlığa buraxılması Paşinyanın maraqlarına cavab vermir. Sadəcə olaraq, Ermənistanın Baş naziri də seçkilər öncəsi “hərbi əsir” məsələsini gündəmə gətirməklə manipulyasiya edir.

Lakin Paşinyanın bu mövqeyi ABŞ-nin iştirakı ilə Azərbaycan və Ermənistan arasında sülhə nail olunması və nəqliyyat-kommunikasiya vasitələrinin blokdan açılması istiqamətində aparılan danışıqlara zərbə vurur. ABŞ-nin hərbi cinayətkarlar məsələsini gündəmə gətirməsi sülh prosesini poza bilər ki, bu da seçkilərdə yalnız Rusiyadan dəstək alan müxalifətin əlini gücləndirəcək amildir.

Müşfiq Abdulla
"Cebheinfo.az"