Hüquq-mühafizə orqanları tərəfindən dövlət çevrilişinə cəhddə ittiham edilən Ramiz Mehdiyevlə bağlı müzakirələr fonunda vaxtilə onun dəstəyi ilə saxta alimlərin formalaşdığı müzakirə olunur. Bildirilir ki, Ali Attestasiya Komissiyası (AAK) da Mehdiyevin nəzarətində olub, onu tərifləyənlərə alimlik dərəcəsi verilib.
Filologiya elmləri doktoru, professor İdris Abbasov Pravda.az-a fikirlərini bölüşən AMEA Dilçilik İnstitutunun Nəzəri dilçilik şöbəsinin müdiri, filologiya elmləri doktoru, professor İdris Abbasov qeyd edib ki, uzun illərdir, akademik şəbəkə və onun üzvlərinin zərərli fəaliyyəti haqqında hər şeyi deyir.
“Nəticədə, öz Vətənimdə ağır həyat şəraiti ilə üz-üzə qalmışam. Dövlətin elm potensialını məhv edib, ciblərini dolduran yaltaq, riyakar, məsuliyyətsiz akademik-alimlərdən, rektorlardan, direktorlardan çox yazmışam, əvəzində təzyiq, təhdid və stressə məruz qalmışam, ailə üzvlərim xəstəliklər tapıb. Haqq səsimə səs verən heç bir rəsmi qurumun diqqəti cəlb olunmayıb. Əksinə, sanki akademik şəbəkənin əməllərinə haqq qazandırılıb. Mənim ailəm də xalqın bir parçasıdır, bir ailə başçısı kimi mənim borcumdur. Nə yazıq ki, ölkədəki qanunsuzluqlar, özbaşınalıqlar bu borcun yerinə yetirilməsinə imkan vermir və nəticədə, yeyintidən, rüşvətdən baş çıxarmayan ailələr maddi-sosial imkansızlıq burulğanında əzab çəkir. Minlərlə alim var. Niyə danışmırlar? Alim hara, milyonların mənimsənilməsi hara?! Mübarizə aparmağıma, işlədiyim hər yerdə gördüyüm haqsızlığa, ədalətsizliyə münasibət bildirdiyimə görə peşman deyiləm. Və bunun üçün də peşman deyiləm ki, bu yolda təzyiqlərə, əzablara düçar olmuşuq, xəstəliklər tapmışıq. Ona görə peşmanam ki, ölkə rüşvətxorların, ikiüzlü, xəyanətkar məddahların cəngində can verir və bundan xilas yolu çətinləşir. Səmimi deyim ki, bir də vaxtında məmləkəti tərk edib, özümə öz halal zəhmətimlə karyera qurub, ailə borcumu yerinə yetirməməyimə peşmanam. Ölkəmdə halal yaşamaq birmənalı olaraq çətinləşib. Hansı vəzifəlini, bir az üzdə olan alimini, məmurunu qaldırırlar, altından milyonlar çıxır. Yaltaqlıqdan, riyakarlıqdan, qanunsuz yollarla milyonlara sahib olmaqdan, xalqa, dövlətə həqarətdən savayı ölkəyə heç nə verməyən, taleyüklü ictimai hadisələrə mövqe bildirməyən, ikiüzlülük, satqınlıq və məddahlıqla işini bitmiş hesab edən alim kütləsi ilə hansı ölkəni inkişaf etdirmək olar? Akademik şəbəkənin Azərbaycanın gələcəyinə meydan oxuması və cəzadan yayınması fərqli işlərdə müəyyən təcrübə toplamış müəllim, 10 ildən artıq dövlət qulluğunda çalışmış bir şəxs və elm adamı kimi məndəki nikbinlik hisslərini xeyli arxa plana keçirir...” – alim bildirib.
