Zəfər Bayramından sonra bəzi səs-küylü həbslərin olacağı haqda iddialar səngimir. Bu prosesin Ramiz Mehdiyevin uzun illər formalaşdırdığı “kölgə hakimiyyəti” ilə bağlı ola biləcəyi deyilir. Onun kimləri özü ilə “cəhənnəmə” aparacağı isə hələ də sual olaraq qalır.

8 Noyabr tarixindən sonra nələr gözlənilir? İddialar real ola bilərmi?

Globalinfo.az-a danışan siyasi şərhçi Elçin Alıoğlu deyib ki, hazırda vəziyyət bir qədər katolik kilsəsindəki indulgensiya prosesini xatırladır:

“Vaxtilə günahların bağışlanması pulla satılırdı, indi isə hər kəs əlində bir siyahı tutaraq kimlərinsə Ramiz Mehdiyevin adamı olduğunu deyir. Belə siyahılar qeyri-rəsmi hazırlanıb tirajlanır və ehtimal ki, bu işdə bilavasitə Mehdiyev dəstəsinin əli var. Hazırkı şəraitdə onunla bağlı istintaq, təhqiqat və araşdırmalar aparılır. Sosial şəbəkələrdə tez-tez qeyd olunur ki, əgər Ramiz Mehdiyev pis adam idisə, niyə onu vəzifədən hörmətlə yola saldılar, ordenlər verildi? Bu, arqumentsizlikdir. Heç kim xəyanətkar doğulmur. İnsan uzun illər sədaqətlə xidmət edə bilər, lakin zamanla onun düşüncəsində və psixologiyasında dəyişikliyin olması mümkündür”.

Siyasi şərhçi qeyd edib ki, Ramiz Mehdiyev uzun illər normal fəaliyyət göstərsə də, sonradan hakimiyyətə qarşı çıxmaq niyyətinə gəlib:

“Onun siyasi primitivliyi hər zaman özünü göstərib, kommunist düşüncə tərzindən azad ola bilməyib. Mehdiyev guya Dövlət Şurası yaratmaq istəyirdi, lakin ona heç kim başa salmayıb ki, “Dövlət Şurası” anlayışı İslam mədəniyyətində və Latın Amerikası ölkələrində “xunta” mənasına gəlir. Deməli, o, əslində bir növ xunta qurmaq istəyirmiş. Ramiz Mehdiyevin “hakimiyyətə gətirmək” istədiyi şəxslər arasında cəmiyyətin müxtəlif təbəqələrinin nümayəndələri olub. Lakin həmin şəxslər arasında da sonradan elə Mehdiyevin özünə xəyanət edənlər var. Bu adamlar müxtəlif klan və düşərgələrə mənsubdurlar. Məsələn, sabiq nəqliyyat naziri Ziya Məmmədov özünü “Şirvan klanı”nın, keçmiş səhiyyə naziri Əli İnsanov isə “Qərbi Azərbaycan klanı”nın rəhbəri sayır. Amma İnsanovu Ramiz Mehdiyevin adamı adlandırmaq düzgün deyil. Çünki sabiq məmur özünü Mehdiyevin yerində görürdü və onların münasibətləri həmişə gərgin olub”.

E.Alıoğlu bildirib ki, yayılan siyahılarda hətta Ramiz Mehdiyev hakimiyyətdən getdikdən sonra deputat olan şəxslərin adları da yer alıb və bu, primitiv yanaşmadır:

“Bu adamlar Mehdiyevin “adamı” idilərsə, necə oldu ki, 2019-cu ildən sonra iki dəfə deputat seçilə bildilər? Bu, artıq absurd düşüncədir. Ümumiyyətlə, bundan sonra dövlətin “gigiyena əməliyyatı” aparacağına şübhə etmirəm. Hakimiyyətdə ciddi təftiş işləri görüləcək, müxtəlif kollaborasionistlər və partiya maraqları ilə hərəkət edən şəxslər vəzifədən uzaqlaşdırılacaq. Həmçinin Milli Məclisdə də ciddi dəyişikliklər gözlənilir. Hazırda R.Mehdiyev ifadə verir və kimlərdən necə istifadə etdiyini, kimləri kənara atdığını və bütün bunların səbəbini izah etməlidir. O, danışmasa belə dövlətin əlində kifayət qədər dəlil və sübut var ki, bu şəxslər barəsində qanun çərçivəsində müxtəlif tədbirlər, o cümlədən saxlama və qətimkan tədbirləri tətbiq edilsin”.

Siyasi şərhçi vurğulayıb ki, Zəfər Bayramından sonra səs-küylü həbslərin olacağı real görünmür:

“Bu, simvolik deyil, xalqımızın tarixində ən böyük günlərdən biridir. Həbslərin bu bayramla əlaqələndirilməsi doğru deyil. Ümumilikdə saxlanmalar və cəzalandırmalar mümkündür. Lakin bu, kütləvi şəkildə olmayacaq, dövlət tədricən özünü və ətrafını təmizləməlidir. Çünki vaxtı çatıb”.