Regionda kommunikasiya və ticarət əlaqələrinin inkişafı, həmçinin Ermənistan-Azərbaycan münasibətlərindəki dəyişikliklər diqqət mərkəzindədir. Baş nazir Nikol Paşinyan Rusiya taxılını daşıyan qatarın Azərbaycan və Gürcüstandan keçməklə Ermənistana gəlməsini tarixi və mühüm hadisə adlandırıb. O, Ermənistanın Marqaradan Kornidzora və əks istiqamətdə Azərbaycandan Türkiyəyə və Türkiyədən Azərbaycana yük qatarlarının tranzitini təmin etməyə tam hazır olduğunu bildirib.
Politoloq Samir Hümbətov Sherg.az-a Paşinyanın kommunikasiya vasitələrinin açılması və yükdaşımaların həyata keçirilməsi ilə bağlı mövqeyini şərh edib:
"Paşinyanın bu fikri onu ən çox sevindirən məqamın nə olduğunu göstərir. Artıq o, erməni cəmiyyətinə rahatlıqla mesaj verə bilir ki, təkcə müharibəni dayandırmayıb, həm də rəsmi Bakı ilə elə bir şərait yaradıb ki, öz məhsullarını, hətta Rusiyadan və Qazaxıstandan gələn yüklərini Azərbaycan üzərindən tranzit şəkildə daşıya bilirlər. O bunu bir uğur kimi qiymətləndirir. Həmçinin başqa bir mesaj da var. O demək istəyir ki, əgər Azərbaycan və Türkiyə istəsə, Ermənistandan öz yüklərini daşıya bilər. Paşinyan kommunikasiyaların tədricən açılma imkanlarını görür və bunu qabardır. Ola bilər ki, bu mərhələdə yük daşınmasında problem olmasın. Amma bunun etibarlı olub-olmaması sual altındadır. Dəhlizin rəsmi şəkildə açılması daha məqsədəuyğun olar. Bu məsələlər sülh müqaviləsindən sonra daha rahat həll oluna bilər".
Ekspert təminat məsələsinin yalnız Ermənistanla həll oluna bilməyəcəyini söyləyib:
"ABŞ və Türkiyənin təminatı olmadan bu yüklərin qarşılıqlı şəkildə daşınması o qədər də asan deyil. Çünki erməni cəmiyyətində Azərbaycana qarşı aqressiya hələ də bəzi kəsimlərdə qalır.
Paşinyanın bu istiqamətdə istəkləri var, amma qeyd etdiyim məsələlər üzrə suallar tam cavablandırıldıqdan sonra biz bunu daha rahat həll edə bilərik".
