Dövlət İmtahan Mərkəzi taksi sürücüləri üçün növbəti imtahanı noyabrın 3-də keçirəcək.
Bəs taksi sürücülərinin imtahan verməsi nə dərəcədə vacibdir? İndiyə qədər imtahandan keçən taksi sürücülərinin müştərilərlə davranışında müsbətə doğru irəliləyiş varmı? Taksi fəaliyyətində keyfiyyət, təhlükəsizlik artıbmı?
Mövzu ilə bağlı Redaktor.az-a danışan nəqliyyat eksperti Adil Nəbiyev vurğuladı ki, bu imtahanlar, sürücülərə keçirilən təlimlər hamısı formal xarakter daşıyır:
"Yəni bunların nə taksi sürücüləri, nə də sərnişin daşınması üçün keyfiyyət və təhlükəsizlik baxımından hər hansı fərqi yoxdur və olmayacaq da. Çünki 40 il avtomobil idarə edən sürücüyə gəlib məntiqdən sual vermək və ya təlim mərkəzində dörd-beş nəfərlə bir maşına minib tormoz verməyi göstərmək, açığı, mənasız bir işdir. Burada əsas məsələ maddi maraqdır. Bir neçə nəfər bu prosesdən yaxşı mənada qazanc götürür. Ona görə də taksi sürücülərini getdikcə daha çox bezdirirlər. Bu da istər-istəməz sürücülərdə aqressiya yaradır və nəticədə xidmətin keyfiyyəti daha da pisləşir.
Ümumi vəziyyətə baxanda görürük ki, taksilərdə avtomobillər yenilənib, “Prius” modelləri sıradan çıxıb, amma indi müxtəlif Çin istehsalı modellər gəlib. Avtomobillərin yeni, nisbətən komfortlu və təmiz olması müəyyən fərq yaradır, amma ümumi keyfiyyət baxımından ciddi dəyişiklik yoxdur. Yenə də köhnə avtomobillərlə işləyən sürücülər var, bəziləri müxtəlif yollarla qeydiyyatdan keçir. Aidiyyəti qurumlar sürücüləri çağırıb uzun növbələrdə saxlayır, bu da vaxt itkisinə səbəb olur. Əslində belə hallar ümumiyyətlə olmasa, daha yaxşı olar".
Müsahibimizin sözlərinə görə, təlimlərin yeni sürücülər üçün, məsələn, 10-20 günlük normal nəzəri və praktiki dərslər şəklində keçirilməsi faydalı ola bilər:
"Amma artıq avtomobil idarə etməyi bacaran sürücüləri bir saatlıq dərsə çağırmaq mənasızdır. Əvvəllər bu təlimlər yarım gün və ya bir gün olurdu, indi isə iştirakçıların sayı artdıqca müddət cəmi yarım saata enib. Bu müddətdə sürücülərə ümumi, artıq bildikləri qaydalardan danışılır, qanunvericilikdən bəhs olunur, amma deyilənlərin çoxu yadlarda qalmır. İmtahan mərkəzlərindəki suallar isə əsasən, məntiqlə cavablandırıla bilən suallardır. Özüm də o suallara baxmışam, məntiqlə cavab verilir, sonra yarım saatlıq ümumi söhbət olur. Amma bu nəyi dəyişir? Heç nəyi. Sürücülərin vaxtı gedir, dörd gün işləyə bilmirlər, bir az da ödəniş edirlər. Halbuki bu, heç bir yenilik gətirmir. Mən bu prosesin tam əleyhinəyəm, çünki nəticə yoxdur. Formal təlimlər və imtahanlar sadəcə vaxt itkisinə səbəb olur. Bunun əvəzinə daha məntiqli və faydalı sistem düşünmək olardı. Qərar verənlərə isə sual vermək lazımdır: bu formal imtahanlar və təlimlər nəyə xidmət edir?"
Ekspert qeyd etdi ki, sürücü üçün əsas məsələ sürücülük vəsiqəsini alarkən keçilən mərhələlərdir:
"İnsan bir dəfə həm nəzəri, həm praktiki sürücülük öyrənir və bu, bir ömür boyu kifayət edir. Hansı şirkətə gedirsə-getsin, həmin kateqoriyaya uyğun avtomobili idarə edə bilir. Sürücülük bacarıqlarını artırmaq üçün keçirilən peşəkar təlimlər isə tamam başqa mövzudur. Bəzi şirkətlər bu təlimlərə müraciət edir, orada sürücülərə bir neçə gün ərzində həm nəzəri, həm də praktiki dərslər keçirilir və sonda imtahan verilir. Bu cür təlimlər faydalıdır ki, sürücülərə bilmədiklərini xatırladır, bacarıqlarını təzələyir. Amma hazırkı vəziyyətdə keçirilən təlimlərin sürücülərə heç bir təsiri yoxdur. İstənilən şəxs müəyyən məbləğ ödəyib bu prosesdə iştirak edə bilər. Hamı da görür ki, bunlar formal xarakter daşıyan tədbirlərdir. Mən özüm bu sahədə çalışan biri kimi, sürücülərlə danışmışam və əminliklə deyə bilərəm: bu imtahanların və təlimlərin taksi sürücülərinə heç bir xeyri yoxdur. Sadəcə vaxt itkisinə səbəb olur".
