Ermənistanda Masis (Uluxanlı) şəhər icmasının meri David Hambartsumyan İrəvana qayıdarkən “Zvartnots” hava limanında həbs edilib.

Hüquq-mühafizə orqanlarının əməkdaşları onu təyyarədən enərkən saxlayıb. Qeyd edək ki, Hambartsumyan oktyabrın 28-də Moskvadan İrəvana uçub.

Hmbartsumyan 2018-ci ildə dinc etirazçılara qarşı silahdan istifadə etməkdə və kütləvi iğtişaşlar təşkil etməkdə təqsirli bilinir. İrəvan şəhər məhkəməsi oktyabrın 23-də qeyd edilən ittiham üzrə Ambartsumyanın 6 il 3 ay müddətinə azadlıqdan məhrum edilməsi barədə hökm çıxarıb. Ambartsumyan özü oktyabrın 27-də gizlənmək niyyətində olmadığını və oktyabrın 28-də İrəvana qayıtmaq istədiyini bildirib.

Müxalifət artıq bildirib ki, hakimiyyətin Hambartsumyana qarşı davranışı proqnozlaşdırılan idi. Çünki onlar qarşıdan gələn seçkilərdən əvvəl siyasi meydanı rəqiblərdən təmizləyirlər. Xatırladaq ki, keçmiş prezident Serj Sarkisyanın rəhbərlik etdiyi Ermənistan Respublika Partiyası və parlamentdəki “Şərəfim var” fraksiyası David Hambartsumyanın baş nazirliyə namizədliyini irəli sürüb.

Bu məqsədlə eks-prezidentin komandası parlamentdə baş nazir Nikol Paşinyana etimadsızlıq səsverməsi keçirməyi planlaşdırdığını açıqlayıb. Qeyd edək ki, David Hambartsumyanın Ermənistana dönüşü onun seçkilərdə Rusiyanın namizədi olması barədə ehtimalların irəli sürülməsinə səbəb olub.

Lakin o, revanşist müxalifəti ətrafında birləşdirə biləcək yeni siyasi fiqur deyil. Hambartsumyan bununla üçüncü dəfədir ki, ERP və “Şərəfim var” fraksiyası tərəfindən Nikol Paşinyana alternativ kimi baş nazirliyə namizəd göstərilir. İlk dəfə bu ilin iyun ayında Paşinyana qarşı impiçment təşəbbüsü ilə çıxış edən “Şərəfim var” fraksiyası Hambartsumyanın namizədliyini irəli sürmüşdü.

Lakin onun zəruri olan dəstəyi əldə edə bilməməsi Hambartsumyanın siyasi uğursuzluğuna səbəb oldu. Belə ki, “Şərəfim var” fraksiyasının 6 deputatı var. Robert Köçəryanın “Ermənistan” blokundan seçilmiş deputatların sayı isə 28 nəfər təşkil edir.

Bu iki fraksiya birlikdə 34 imza təşkil edə bilər. İmpiçment məsələsini parlamentin müzakirəsinə təqdim etmək üçün minimum 36 deputat sayı lazımdır. Yəni nəinki Hambartsumyan, ümumilyyətlə, impiçment təklifi prosedura uyğun səsləri toplaya bilmədi. Üstəlik, Köçəryanın deputatları imzaları toplamağa hazır olduqlarını bəyan etsələr də son nəticədə Hambartsumyana dəstək vermədilər. Bu da Serj Sarkisyanla Robert Köçəryan arasındakı siyasi nifaqla bağlıdır.

İyun revanşından əliboş çıxan Serj Sarkisyan sentyabrın 26-da növbəti dəfə impiçment təşəbbüsü ilə çıxış edərək Ermənistan Respublika Partiyasından və “Şərəfim var” fraksiyasından David Hambartsumyanın namizədliyini irəli sürdü.

Bu dəfə də Robert Köçəryan Serj Sarkisyanın namizədinin lehinə imza verməməyi tapşırdı. Robert Köçəryan hələ bir neçə gün əvvəl Sarkisyana dəstək verməyəcəyini bildirmişdi.

Bu baxımdan, Serj Sarkisyan David Hambartsumyanla imtiçmentə getməyin hər hansı nəticə verməyəcəyini özü də bilir. Ona görə də Hambartsumyanı üçüncü dəfə baş nazirliyə namizəd irəli sürmək siyasi absurddur. Lakin David Hambartsumyanın həbsi Ermənistandakı siyasi vəziyyətlə bağlı bir qənaəti möhkəmlədir.

Nikol Paşinyan 2026-cı ilin iyun ayında keçiriləcək parlament seçkilərində Rusiyanın dəstəkləyə biləcəyi namizədləri cinayət məsuliyyətinə cəlb etməklə neytrallaşdırmaq taktikasını seçib. Rusiyalı milyarder Samvel Karapetyanın, Gümrü şəhərinin meri Vardan Qukasyanın, eləcə də Erməni Apostol Kilsəsində aparılan həbslər seçkilərdə həqiqətən də Paşinyanın siyasi meydanı təmizləmək niyyətindən xəbər verir.

Son günlər Serj Sarkisyanın 2005-ci ildə Ermənistan Müdafiə Nazirlyinin balansında olan torpaq sahələrini satması ittihamı üzrə məhkəmə prosesinə cəlb edilməsi onun həbsi ilə nəticələnə bilər. Bu məsələdə Robert Köçəryan da Serj Sarkisyanın zindana atılmasında maraqlı tərəfə çevrilib.

Həmin dövrdə prezident olan Köçəryan məsuliyyətdən xilas olmaq üçün məhkəmədə Serj Sarkisyanın əleyhinə ifadə verib. O bildirib ki, 2005-ci ildə müdafiə naziri Serj Sarksiyan olduğundan bu məsələnin ona aidiyyatı yoxdur. Bununla da Köçəryan Sarkisyanı qurban verməklə vəziyyətdən çıxmağa çalışıb.

Əgər Sarkisyan azadlıqdan məhrum edilərsə, bu müxalifət daxilində siyasi parçalanmanı daha da dərinləşdirəcək. Cəmi 6 faiz reytinqə malik olan Köçəryan isə revanşistlərin tam dəstəyini ala bilməyəcək. Diqqəti çəkən məqamlardan biri Qərbin Ermənistanda aparılan həbslərə səssiz qalmasıdır. Bu da seçkilərdə Qərbin Nikol Paşinyana dəstəyinin əlaməti kimi başa düşülə bilər.

Xüsusilə də, ABŞ və Avropa İttifaqı Ermənistanla Azərbaycan arasında sülh müqaviləsinin imzalanmağa yaxın olduğu və kommunikasiyaların açılmağa başladığı bir vaxtda Nikol Paşinyanaın hakimiyyətdən getməsində maraqlı deyil.

Müşfiq Abdulla
“Cebheinfo.az”