Məktəblərin fəaliyyətə başlamasından az vaxt keçməsinə baxmayaraq, artıq “fond pulu” və oxşar məsələlər gündəmə gəlib. Bir çox məktəbdə valideynlərdən "fond pulu" yığılır və bu vəsaitin şagirdlərin dərs keçdiyi sinif otaqlarının və digər ehtiyaclarının təmin olunmasına xərclənəcəyi bildirilir.

Bu kimi halların qarşısı necə alınmalıdır?

Elm və təhsil məsələləri üzrə mütəxəssis Elçin Əfəndi Redaktor.az-a açıqlamasında bildirdi ki, hazırkı vəziyyətdə əgər məktəblərdə hər hansı bir ödəniş yığılırsa, bu, yolverilməzdir:

"Belə hallarla rastlaşan valideynlər dərhal Elm və Təhsil Nazirliyinə və yaxud da Məktəbəqədər və Ümumi Təhsil üzrə Dövlət Agentliyinə məlumat verməlidirlər. Əlbəttə ki, bu kimi halların olmaması vacibdir. Məktəblərdə hər hansı bir təmir məsələsi varsa, bu, tətil dövründə həmin məktəbin rəhbərinin təqdimatı əsasında müvafiq agentliyə və yaxud da nazirliyə təqdim olunur. Təbii ki, təmirə vəsait ayrılır və təmir işləri həyata keçirilir. Belə halların qarşısını almaq üçün düşünürəm ki, həm Elm və Təhsil Nazirliyi, həm də Məktəbəqədər və Ümumi Təhsil üzrə Dövlət Agentliyi konkret olaraq məktəb rəhbərlərinə, eyni zamanda təhsilverənlərə tapşırıq verməlidir ki, bu kimi hallar olmasın. Təbii ki, belə hala yol verənlərə də konkret qanunvericilik tələblərinə uyğun ciddi tədbir görülməlidir ki, digərləri də bu tədbirdən bir növ nümunə götürsünlər".