İctimai nəqliyyatda qiymət artımına baxmayaraq, xidmətin keyfiyyətində ciddi problemlər hələ də qalmaqdadır.
Vətəndaşlar bildirirlər ki, günün müxtəlif saatlarında dayanacaqlarda uzun müddət avtobus gözləməli olurlar, gələn avtobusların isə əksəriyyəti artıq dolu olur. Bu isə insanların gündəlik işlərinə vaxtında çatmasını çətinləşdirir.
Nəqliyyatda niyə keyfiyyət məsələsinə diqqət yetirilmir?
Mövzu ilə bağlı “Cebheinfo.az” – a açıqlama verən nəqliyyat eksperti Yasin Mustafayev bildirib ki, zaman-zaman keyfiyyətdə artımı olacaq, amma o qədər də böyük keyfiyyət dəyişikliyi olmayacaq:
“Keyfiyyət məsələsinin bir anda yüksəlməsi mümkün deyil. Qiymət artımının da keyfiyyətə təsiri müəyyən vaxt çəkəcək. Yəni 10 qəpik qiymət qalxdısa, dərhal avtobusların sayı çoxaldı, tıxaclar azaldı, gecikmələr aradan qalxdı kimi gözlənti doğru deyil. Zaman-zaman keyfiyyətdə artımı görəcəyik, amma o qədər də böyük olmayacaq. Nə qədər ki, zolaqlar çoxalmayıb, avtobusların tıxacda ilişib qalmasını görəcəyik. Bunu qiymət artımı ilə əlaqələndirmək doğru deyil".
O deyib ki, keyfiyyətin artması kompleks tədbirlər nəticəsində həyata keçiriləcək:
"Bunun da bir hissəsi qiymət artımıdır. Cüzi şəkildə artım oldu, amma digər tədbirlər də kompleks şəkildə həyata keçirilməlidir ki, biz bunun effektini görək”.
Nəqliyyat eksperti Aslan Əsədov isə bildirib ki, bu, illərlə yığılıb qalmış problemlərdir:
“Elə deyil ki, sadəcə avtobus alındı, yaxud hansısa dəyişiklik edildi və problem birdən‑birə həll olundu. Bu, kompleks problemdir və kompleks yanaşma tələb edir. İctimai nəqliyyat bərabər-şaxəli platformadır. Bu platforma bir müstəvi kimi qəbul olunur və bildiyimiz kimi, bütün proyeksiyalar bərabər olmalıdır. Əks halda, birində axsama olsa, digərləri yüklənəcək. Bu yüklənmə isə mənfi nəticələrə gətirib çıxara bilər”.
Onun sözlərinə görə, problemlərin aradan qalxması üçün bərabər-şaxəli hərəkət olmalıdır:
“Halqa kimi baxsaq, zəif nöqtədə, yəni istər avtobusda, istər metroda, istərsə də sərnişindaşımanın digər növlərində boşluq yaransa, əlaqə qırılır. Problemlərin aradan qalxması üçün bərabər-şaxəli hərəkət olmalıdır. Əks halda problemlər birtərəfli olacaq və ya həlli vaxt aparacaq. Bu, bir-iki günün işi deyil. Aylarla davam edən nizamlanma prosesi tələb olunur və ümumi olaraq birgə addımlar atılmalıdır”.
