Bir neçə abituriyent Moderator.az saytına müraciət edərək bildirib ki, daxil olduqları Azərbaycan Dövlət Rəssamlıq Akademiyasından qeydiyyatdan keçsələr də, akademiyadan onlara təsdiq gəlməyib. Həmin abituriyentlər yaranmış vəziyyətdən çox narahat olduqlarını bildiriblər.
Mövzunu dəqiqləşdirmək üçün Azərbaycan Rəssamlıq Akademiyasının rektoru, xalq rəssamı Natiq Əliyevlə əlaqə saxladıq. Moderator.az-a açıqlama verən rektor bunları bildirdi:
"Biz əksinə maraqlıyıq ki, uşaqlar tez qəbul olsunlar və boş yerlər tutulsun. Bizim məqsədimiz odur ki, istedadlı tələbələr yerləri tutsunlar. Gecikdirməyin mənası nədir ki? Bizim marağımızdadır ki, onlar qeydiyyatdan keçsinlər. Qeydiyyatdan keçməyəndə artıq tələbə adını ala bilmirlər. Əksinə, mən tapşırmışam ki, akademiyadan abituriyentlərin yadına salsınlar ki, gəlib qeydiyyatdan keçsinlər. Biz yer itirmək istəmirik. Başqa bir məlumatım yoxdur. Yəqin ki, texniki səbəblərlə bağlıdır. Bütün abituriyentlərə görə dərs bölgüsü etmişik", - deyə rektor bildirib.ADRA-nın Tədris şöbəsinin mütəxəssisi Rüstəm Manafov Moderator.az-a açıqlamasında abituriyentlərə təsdiqin getməməsinin əsas səbəbini açıqlayıb:
"Sistem avqustun 29-dan açılıb. 3 iş günü keçib. 188 nəfəri rəsmi olaraq qeydiyyatdan keçirmişəm. Bu pillə-pillə olan bir prosesdir. Sistemin üzərində mən tək işləyirəm. Magistırları qeydiyyatdan keçirmək asan idi, çünki onlar məlumatlı idilər. Bakalavrlarla bağlı böyük problemlər yaranır. Bir də görürsən ki, hərbi bileti, attestatı sistemə yükləmirlər. Mən hamıyla ünsiyyət qururam. Sonra mənə geridönüşlər olur. Bir tələbənin məsələsini həll etməmiş digərinə keçə bilmirəm. Sentyabr ayının 9-na qədər bu işi bitirəcəyik" deyə mütəxəssis bildirib.
