Rusiya Prezidenti Vladimir Putin miqrantlara münasibətdə tətbiq olunan test imtahanları ilə bağlı yeni bir qanun imzalayıb. Rusiya hökumətinin kvotası ilə ölkəyə gələn əmək miqrantları artıq rus dili, Rusiya tarixi və qanunvericilik bilikləri üzrə imtahan verməyəcəklər.

Bildirilir ki, bu qanun 2024-cü ildə 155 929 nəfərlik kvota ilə ölkəyə gələn əmək miqrantlarına şamil edilir. Hökumət sənədlərində qeyd olunur ki, dəyişiklik bürakratiyanın sadələşdirilməsi və işçi qüvvəsinin tez cəlb edilməsi məqsədi daşıyır.

İddialara görə, bu dəyişiklik Hindistan və Şimali Koreyadan gələn miqrantların yolunu açmaq üçün edilir.

Görəsən, bu halda Rusiyadakı soydaşlarımızı nə gözləyir?

Mövzu ilə bağlı Bizim.Media-ya açıqlamasında Milli Məclisin deputatı Azər Allahverənov bildirir ki, belə bir qanunun azərbaycanlı miqrantların vəziyyətinə hər hansı bir təsiri olmayacaq:

“Azərbaycanlı miqrantların mütləq əksəriyyəti miqrant statusu almaq üçün yenə də əvvəlki tək rus dili, tarixi və qanunvericilik bilikləri üzrə imtahan verməli olacaqlar:

“Rusiya dövlət başçısının imzaladığı yeni qanuna görə, hökumət kvotası əsasında ölkəyə gətirilən əmək miqrantları rus dili, tarixi və qanunvericilik bilikləri üzrə imtahan verməkdən azad olunurlar. Konkret olaraq, həmin qanunla bağlı bir arayış da yer alıb. Burada göstərilir ki, həmin kvota daha çox Çin, Hindistan, Şimali Koreya, Pakistan və Türkiyədən olan əmək miqrantlarına münasibətdə şamil olunur.

Bu o deməkdir ki, rus dili, tarix və qanunvericilikdən imtihan verilməsi məsələsi digər əmək miqrantlarına, deməli soydaşlarımıza münasibətdə isə qüvvədə qalır. Şəxs hökumət kvotasından kənar Rusiyada əmək fəaliyyətilə məşğul olmaq üçün aydiyyatı üzrə müraciət edir və viza əsasında ölkə ərazisində olursa, onlar rus dili, tarixi və qanunvericilik biliklərini təsdiq edəcək imtahandan keçməlidir”.

Deputat qeyd edir ki, hökumət kvotası əsasən iri sənaye müəssisələrində çalışacaq əmək miqrantlarına şamil olunur:

“Amma bununla yanaşı yeni qanunda bir nüans da yer alır. Əvvəllər 30 gün ərzində, viza əsasında ölkədə olub, əmək fəaliyyətilə məşğul olmaq istəyən miqrant rus dili biliyini təsdiq edən sənədi aidiyyəti üzrə təqdim etməli idi. İndi bu müddət 90 günə qədər artırılıb. Bu isə müəyəyn mənada yüngülləşdirmə kimi dəyərləndirilə bilər. Bir haşiyəni də çıxaq ki, hökumət kvotası xüsusən qapalı və həmin ərazilərə təhkim olunmuş şəraitdə çalışan əməkçi miqrantlara aiddir”.

Ekspert deyir ki, həmin kvota xidmət sahəsində, nəqliyyat sahəsində çalışanlara şamil edilmir:

“Yəni xidmət sahələrində rus dili imtahanından keçmək mütləqdir. Sonda onu deyək ki, sözügedən kvota məsələsi orada əmək fəaliyyətilə məşğul olan azərbaycanlılara şamil olunmayacaq. Bu isə onların mütləq əksəriyyətinin sözügedən imtahanlardan keçməsinin mütləq olduğunu deməyə əsas verir”.