Xaricdən gətirilən dərmanlar münasib qiymətləri və keyfiyyətləri ilə diqqət çəkir.

Lakin yerli bazarda dərmanların qiymətləri hər gün artır, keyfiyyət isə sürətlə aşağı düşür. Bu hal həm xəstələr, həm də tibb mütəxəssisləri üçün ciddi narahatlıq yaradır. Belə bir vəziyyətin yaranma səbəbləri çox mürəkkəbdir və bir çox amillərdən asılıdır.

Dərman istehsalında istifadə edilən xammalların qiymətlərinin artması, istehsal proseslərindəki çatışmazlıqlar və ya yerli bazarda rəqabətin yoxluğu əsas səbəblərindəndir.

“Cebheinfo.az”-a açıqlamasında farmokoloq Aydın Əliyev bildirdi ki, dərman qiymətləri və keyfiyyətindəki problemlər daha da çoxalır:

“Cəmiyyətdə dərmanların bahalığı, keyfiyyətin isə az olmasından yetəri qədər şikayət var. Dərmanların çox hissəsi xaricdən gətirildikcə, özümüz istehsal etmədikcə, hər zaman asılı vəziyyətdə qalacağıq.

Ölkəmizdə dərmanların qiyməti 2 amildən asılıdır, dərman firmalarından və dərmanları xaricdən gətirən şəxslərdən. Dərmanları gətirən şirkətlər reallıqları nəzərə almalıdır ki, vətəndaşlara faydalı olsun. Necə ki, ordumuz Ali Baş Komandanımızla birlikdə torpaqlarımızı işğaldan azad etdi, səhiyyə də cəmiyyət üçün faydalı işlər görməyi bacarmalıdır”.

A.Əliyev bildirib ki, dərmanların keyfiyyəti bir sıra amillərdən asılıdır: “Dərmanların keyfiyyəti onun saxlama müddətindən, şəraitindən asılıdır. Dərmanların keyfiyyəti ekspertiziya mərkəzində yoxlanılmalıdır.

Vətəndaşların özü də dərman alarkən saxlanma şəraiti ilə maraqlanmalıdır. Dərmanların böyük hissəsini özümüz istehsal etmədiyimiz müddətcə keyfiyyət problemləri davam edəcək, eyni zamanda bu hal maddi xərcləri də artırır. Dərmanların qiymətini qanunsuz qaldıran şəxslərlə bağlı müvafiq qurumlar xüsusi tədbirlər görməlidir”.