“Kiçik qrup rəhbəri öz kreslosunu itirmək qorxusundan ictimai-siyasi həyatımızda Samvel Karapetyan şəxsiyyətinin amilini və təsirini neytrallaşdırmağa çalışır”. Bunu iyulun 4-də “Samvel Karapetyanın müdafiəsinə” şüarı ilə təşkil etdiyi mitinqdə parlamentdəki “Ermənistan” fraksiyasının deputatı Anna Qriqoryan bildirib.

“İkinci səbəb odur ki, 2021-ci ildən Samvel Karapetyan üçün Azərbaycan axtarış vermişdi. Amma Əliyevin əli Samvel Karapetyana çatmadığı üçün o, öz marionetinin əli ilə qisas alır. Bu, reallıqdır. Amma biz hamımız ədalətin tərəfdarı olacağıq, Samvel Karapetyanın və erməni Apostol kilsəsinin arxasında dayanacağıq. Biz bunu bədxahlıqla etməyəcəyik, daha çox sevgi ilə, ayrı-seçkiliklə edəcəyik”, - deyə erməni deputat mitinqdə bəyan edib.

Qeyd edək ki, İrəvanda Maştots prospektindəki “Fəsillər” parkından iş adamı, “Taşir” şirkətlər qrupunun və “ENA” şirkətinin sahibi Samvel Karapetyana dəstək yürüşü keçirilib. Yürüş iştirakçıları üzərində “Samvel Karapetyana azadlıq!” yazılmış ağ köynəklər geyiniblər.

Göründüyü kimi, erməni deputat iddia edir ki, Paşinyan Karapetyanı Azərbaycanın təlimatı əsasında həbs etdirib. Bəli, bu doğrudur ki, onun həbsini tələb edirik. Çünki Azərbaycan Karapetyana cinayət işi açıb. Lakin İrəvanda onu tamamilə fərqli səbəbdən həbs ediblər - Rusiyanın hakimiyyətə qarşı emissar kimi göndərməsinə görə.

Azərbaycan 2021-ci ildə Dağlıq Qarabağa qaçaq yolla silah-sursat daşıyan şirkət rəhbərlərini beynəlxalq axtarışa vermişdi. Həmin şəxslər sırasında Samvel Karapetyan da olub. Həmin dövrdə Baş Prokurorluğun mətbuat xidmətinin məlumatına əsasən, biznes fəaliyyəti ilə məşğul olan “Taşir” şirkətlər qrupunun rəhbəri Karapetyan Samvel Sarkisoviç, Ermənistanda “boz biznesmen” kimi tanınan və “Royalsys Engineering” şirkətinin sahibi David Qalustyan, “KOMEX” şirkətinin baş direktoru Abramyan Ara Arşaviroviç və qeyriləri Ermənistan Respublikasının Silahlı Qüvvələrini qanunsuz olaraq silahla, döyüş sursatı ilə, partlayıcı maddələrlə, hərbi texnika ilə, yaxud əsgəri ləvazimatla təchiz edilməsi üçün 2001-2021-ci illər ərzində müxtəlif vaxtlarda hava yolu ilə “Beynəlxalq yük daşımaları haqqında” Gömrük Konvensiyasının, “Avropada Adi Silahların Məhdudlaşdırılması” haqqında Müqavilənin tələblərinə zidd olmaqla müxtəlif reyslərlə uçan sərnişin təyyarələri, habelə Ermənistan Hərbi Hava Qüvvələrinin "İL-76 TD" tipli yük təyyarəsi ilə, eləcə də Ara Abramyan tərəfindən alınmış “İLYUSHİN-76TD” tipli, yük daşıma təyinatlı təyyarə ilə - ayırdıqları maliyyə vəsaiti hesabına hərbi təyinatlı iriçaplı odlu silah, döyüş sursatı, hərbi təyinatlı partlayıcı maddələr və qurğular, o cümlədən raketləri qanunsuz əldə edib, Ermənistan Respublikasına və Ermənistanın işğalına məruz qalmış Azərbaycan Respublikasının Dağlıq Qarabağ və ətraf rayonlarına qaçaq yollarla daşınmasını təşkil edib.

Onu da bildirək ki, Ermənistanın hərbi təcavüzü nəticəsində bir sıra cinayətlər törətməkdə təqsirləndirilən Ermənistan Respublikasının vətəndaşları Bakı Hərbi Məhkəməsində davam etdirilən məhkəmə prosesi zamanı öz ifadələrində Samvel Karapetyanın da adını hallandırır.

Beləliklə, bir zamanlar Ermənistanı qanunsuz yollarla silahlandıran Samvel Karapetyan indi İrəvanda həbsxanadan bu ölkəni qarışdırır, gərginlik yaradır və ölkəni daxili qarşıdurma meydanına çevirərək vətəndaş müharibəsi bahasına olsa da hakimiyyəti dəyişməyə çalışır.

Bəs Samvel Karapetyan kimdir?

Samvel Karapetyan 18 avqust 1965-ci ildə Ermənistan SSR-in Kalinino (Taşir) rayonunda anadan olub. 1992-ci ildə Rusiyaya köçüb. 1997-ci ildə Kaluqa şəhərində istehsal, inşaat, enerji, tədarük və satış şirkətlərini özündə birləşdirən “Taşir” şirkətlər qrupunu yaradıb. Samvel Karapetyan hazırda tərkibində ticarət mərkəzləri, hotellər, yaşayış binaları, kinoteatrlar, pərakəndə satış şəbəkələri və restoranların da olduğu ümumilikdə Rusiya iqtisadiyyatının müxtəlif sahələrində 200-dən çox şirkətə rəhbərlik edir.

S.Karapetyan Rusiyada yaşayan ən varlı erməni hesab olunur. Sərvəti Ermənistanın dövlət büdcəsi qədərdir. Məşhur “Forbes” nəşrinin açıqladığı hesabata görə Samvel Karapetyan 4,1 milyard dollarlıq sərvəti ilə dünyanın ən varlı adamları sıralamasında 568-ci, Rusiyanın ən varlı adamlarının siyahısında isə 29-cu sırada yer alıb.

Rusiyadan başqa Samvel Karapetyanın Ermənistan və Gürcüstanda da böyük biznes layihələri var. Hazırda Gürcüstanın enerji bazarında böyük paya sahib olan “Kaskad Gürcüstan” şirkətinin səhimlərinin 95%-i Rusiyanın “Kaskad Enerqo Bit” şirkətinə məxsusdur. “Kaskad Enerqo Bit” şirkəti isə Samvel Karapetyanın sahibi olduğu “Taşir” şirkətinə bağlıdır.

Qeyd edək ki, ABŞ-ın sanksiya tətbiq etdiyi rusiyalı iş adamları arasında Samvel Karapetyanın da adı var. Samvel Karapetyan 2000-ci ildə “Taşir” Xeyriyyə Fondunu qurub.

2020-ci ildə Ermənistanın keçmiş prezidenti Robert Köçəryanın həbsdən azad edilməsi üçün girovun bir hissəsini Samvel Karapetyan ödəyib. 4 avqust 2020-ci ildə Beyrut limanında baş verən partlayışdan sonra Samvel Karapetyan Beyrut ermənilərinə dəstək verəcəyini elan edib və zədələnən Müqəddəs Gevorg Kilsəsinin bərpasına 200 min dollar ayırıb.

Məlumat üçün qeyd edək ki, Samvel Karapetyan Azərbaycan Cinayət Məcəlləsinin 100.1 (təcavüzkar müharibəni planlaşdırma, hazırlama və ya başlama), 218.1 (ağır və ya xüsusilə ağır cinayətlər törətmək məqsədilə cinayətkar birlik yaratma), 228.3 (qanunsuz olaraq odlu silah, partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə mütəşəkkil dəstə tərəfindən törədildikdə), 279.1 (Azərbaycan Respublikasının qanunvericiliyi ilə nəzərdə tutulmayan silahlı birləşmələr və ya qruplar yaratma, eləcə də onların yaradılmasında və fəaliyyətində iştirak etmə, onları silahla, döyüş sursatı ilə, partlayıcı maddələrlə, hərbi texnika ilə, yaxud əsgəri ləvazimatla təchiz etmə), 206.4-cü (qaçaqmalçılıq mütəşəkkil dəstə tərəfindən törədildikdə) maddələri ilə təqsirləndirilir.

“Yeni Müsavat”