"Ermənistan Rusiyadan üz çevirərək birmənalı şəkildə Qərbə doğru istiqamət götürüb".

Bu sözləri Azad Vətən Partiyasının (AzVP) sədri Akif Nağı "Cebheinfo.az"-a açıqlamasında deyib. O bildirib ki, Ermənistanın Baş naziri Nikol Paşinyan əsasən də ABŞ-nin dəstəyini qazanmağa çalışır:

"Çünki Avropanın dəstəyinin o qədər də əhəmiyyətli olmayacağını bilir. Düzdür, Fransa Prezidenti Emmanuel Makronun vasitəsilə Avropa ilə də münasibətləri saxlayırdı. Lakin son hadisələr göstərdi ki, Avropa güc mərkəzinə çevrilə bilmədi. Belə vəziyyətdə rəsmi İrəvan da Avropa ölkələrindən onlara hansısa kömək olmayacağını görür.

Onların əsas ümidi Co Baydenin prezidentliyi dövründə ABŞ-yə idi. Hətta Vaşinqton İrəvana ciddi dəstək də verirdi. Buna baxmayaraq, Donald Tramp iqtidara gəldikdən sonra Ermənistana ciddi dəstək vermədi".

Partiya sədri qeyd edib ki, son zamanlar ABŞ və Rusiya liderləri arasında müəyyən razılaşmaların əldə olunduğu özünü biruzə verir:

"Tərəflər arasında əsasən Ukrayna ilə bağlı razılaşma var. Həmçinin, Moskva ilə Vaşinqton arasında Suriya və digər məsələlərlə bağlı da razılaşmanın olduğu hiss edilir. Hesab edirəm ki, belə razılaşma mühitində Donald Tramp Rusiyanın Ermənistandakı hansısa hərəkətlərinə göz yuma bilər. Yəni Ağ Evin Rusiyaya Ermənistanda bir qədər hərəkət sərbəstliyi verməsi mümkündür. Böyük ehtimalla, Kreml Suriyada və digər ərazilərdə itirdiyi təsir dairəsinin kompensasiyasını Cənubi Qafqazda istəyə bilər. ABŞ-nin də müəyyən çərçivələr daxilində bu imkanı onlara vermə ehtimalı var".

Həmsöhbətimiz vurğulayıb ki, Kreml üçün Cənubi Qafqazdakı yeganə hədəf Ermənistandır:

"Rusiya Gürcüstanda mövqeyini gücləndirməyə çalışır, amma orada həddindən artıq güclü müqavimətlə qarşılaşır. Azərbaycan isə çox güclüdür və Rusiyaya qarşı tam bərabər şəkildə dayanır. Ona görə də geriyə sadəcə Ermənistan qalır. Rusiya regionda təsir imkanlarını saxlamaq üçün əsas ərazi kimi Ermənistanı nəzərdə tutur".

Akif Nağı hesab edir ki, Rusiya Prezidenti Vladimir Putin Ermənistanda Nikol Paşinyanın devrilməsi üçün həmlə edə bilər:

"Məncə, Rusiya öz maraqlarına uyğun olaraq Ermənistanda Nikol Paşinyanı hakimiyyətdən devirə bilər. Ondan sonra Moskvanın sifarişlərini yerinə yetirən bir qüvvəni hakimiyyətə gətirmə ehtimalları da var.

Bunun baş vermə ehtimalı isə olduqca realdır. Ümumiyyətlə, Vladimir Putin anti-Rusiya siyasətinə görə Paşinyan və onun komandasını cəzalandırmaq istəyir. Yəni Kremlin həm Ermənistandakı təsir imkanlarını bərpa etmək, həm də Paşinyanı cəzalandırmaq hədəfi var. Üstəlik, Rusiya hansısa formada Ermənistandakı adamlarını da hakimiyyətə gətirməyə çalışır. Bütün bunların fonunda Rusiya yaxın perspektivdə Paşinyanı devirə bilər".