Seçkilər yaxınlaşdıqca Ermənistanda baş nazir Paşinyanla revanşistlər arasında mübarizə daha da kəskinləşir.

Bu mübarizə fonunda Paşinyan bir-bir rəqiblərini sıradan çıxarmaqla məşğuldur.

Ermənistanın keçmiş prezidenti Serj Sarkisyanın ölkədən çıxışına qadağa qoyulub. Korrupsiyaya Qarşı Mübarizə Komitəsi 2019-cu ildə baş vermiş hadisəyə görə ölkənin üçüncü prezidentinin Ermənistanı tərk etməsini məhdudlaşdırıb.

Digər keçmiş prezident Robert Köçəryan isə korrupsiyada, daha dəqiqi 3 milyon dollar məbləğində rüşvət almaqda ittiham olunur.

Məlumata görə, cinayət işi üzrə aparılan istintaq zamanı müəyyən edilib ki, sabiq prezident 2008-ci ilin fevral-aprel aylarında rəsmi mövqeyindən istifadə edərək bir şirkətin səhmlərinin 100 faizinin Ermənistan vətəndaşı olmayan şəxsə satılmasına mane olmamaqla həmin şirkətin direktoruna üstünlük göstərib və bunun qarşılığında 2 milyon 985 min dollar məbləğində rüşvət alıb.

Korrupsiyaya Qarşı Mübarizə Komitəsi sabiq prezidentin xüsusilə böyük miqdarda rüşvət almaqda təqsirləndirildiyini və ilkin istintaqın başa çatdığını açıqlayıb.

Paşinyanın digər rəqibi - biznesmen Samvel Karapetyan isə artıq həbsdədir. Baş nazir digər əsas rəqbi olan kilsəni də sıxışdırır. İki yüksək ranqlı kilsə nümayəndəsi artıq həbs edilib.

Paşinyan habelə II Qareginin istefası üçün təzyiqlərini də davam etdirir.

Görəsən, Paşinyan belədə seçiqabağı revanşistləri tam sıradan çıxara biləcək?

Mövzu ilə bağlı Bizim.Media-ya açıqlamasında politoloq Zərdüşt Əlizadə bildirir ki, Paşinyanın revanşist qüvvələrə bağlı siyasi rəqiblərini sıradan çıxarmaqla seçki qabağı özünün mövqeyini daha da gücləndirir:

“Paşinyan siyasi rəqiblərini layiq olduqları ittihamlarla cəzalandırır. Belədə onları tədricən siyasi səhnədən təcrid edir. Belə davam etsə, gələn ilin yayında olacaq seçkilərdə Paşinyanın qarşısında dura biləcək heç kim qalmayacaq”.

Revanşistlərin 90 faizi Rusiyaya bağlı qüvvələrdir.

Ekspert qeyd edir ki, Moskvanın Köçəryan, Serj Sarkisyan kartından istifadə etmək istəkləri alınmayıb:

“Ardınca keşiş Baqrat Qalstyan, Eçmiədzin, sahibkar Samvel Karapetyandan yararlanmaq cəhdləri də puça çıxıb. Karapetyan həbs olundu. Belədə Paşinyan bir-bir siyasi rəqiblərini sıradan çıxarır.

Onu da qeyd edək ki, onun rəqiblərinə qarşı irəli sürdüyü ittihamların hamısının əsası var. Köçəryan, Sarkisyan oğru, korrupsioner və agentdirlər. Eçmədzinin ali rütbəli keşişləri də həmçinin əxlaqsız, oğru və agentdirlər. Samvel Karapetyanın qazandığı milyardlar da xalqdan oğurlanıb. Paşinyan indi katolikosu da devirib yerinə, hakimiyyətə loyal birisini gətirməyə çalışır”.

Revanşistlər kifayət qədər zəifləyib.

Həmsöhbətimizin fikrincə, seçkilərdə Paşinyanın qələbəsi qaçılmazdır:

“Paşinyan seçkilərə ciddi hazırlaşır. Əyalətlərdə keçirilən son seçkidə Paşinyan tərəfdarlarının qələbəsi göstərir ki, rəqibləri kifayət qədər zəif və pərakəndədirlər. Onlar Paşinyana qarşı çıxmağa qadir deyillər”.