Son günlərin müzakirə mövzularından biri Bakıda hava limanında “Bolt”, “Uber” və s. taksi xidmətlərindən istifadəyə qadağa qoyulmasıdır. Hava limanında taksidən istifadə etmək istəyənlər yalnız oradakı qırmızı rəngli “London taksi”ləri və “Bolt Aeroport”la gəlmək məcburiyyətindədir. Bu taksilərin xidmət haqqı isə digərləri ilə müqayisədə xeyli bahadır. Məsələn, “Bolt”la hava limanından Bakının mərkəzinə 16-17 manata gəlmək mümkün idisə, bu taksilərlə 22-25 manatdan ucuz olmur.
Bizimyol.info xəbər verir ki, artıq iki gündür hava limanında sərnişinlər alternativ taksi xidmətlərindən istifadə edə bilmirlər. Hava limanında telefonda sərnişin “Bolt”, “Uber” tətbiqlərində sifariş vermək istəsə də, alınmır, səhifə donmuş formada görünür.
Heydər Əliyev Beynəlxalq Hava Limanı yaydığı açıqlamada iddia edir ki, bu qadağa sərnişinlərin rahatlığı və xidmətin keyfiyyətinin yüksəldilməsi məqsədi daşıyır: “Bəzən qonaqlar hava limanında rəsmi taksi operatorlarının təqdim etdiyi müxtəlif kateqoriyalara uyğun seçim imkanları ilə yanaşı, heç bir icazəsi olmayan, müvafiq təlim keçməyən və nəqliyyat vasitələri tələb olunan standartlara cavab verməyən şəxslərin israrlı şəkildə taksi xidməti təklif etməsi ilə qarşılaşırlar. Bu isə bəzi hallarda sərnişinlərin aldadılması və narazılıqları ilə nəticələnir”.
Qeyd olunub ki, belə xoşagəlməz halların qarşısını almaq məqsədilə hava limanında fəaliyyət göstərən taksi operatorlarının vahid, keyfiyyətli və tənzimlənmiş xidmət standartlarına uyğun xidmət təqdim etməsi zəruridir. Bu qadağa həm taksi sürücülərini, həm də sərnişinləri narazı salıb.
Taksi sürücüsü Elvin Əliyev Bizimyol.info xəbər portalına bildirib ki, belə qadağanın tətbiqi insanların taksi ilə aeroporta gedişində də çətinliklərlə üzləşməsinə gətirib çıxaracaq. Onun sözlərinə görə, bundan sonra bir çox sürücülər hava limanına sifarişlərdən imtina edəcək: “Əvvəl biz hava limanına sifariş götürürdük, bizə sərf edirdi. Çünki orada da şirkət bizə yeni sifariş verirdi. Yəni boş qayıtmırdıq. İndi biz bir sifarişlə gedəcəyik, oradan boş qayıdacağıq, çünki şirkət oradan sifariş qəbul edə bilmir. O qiymətə də hava limanına gedəndən sonra boş qayıtmaq sərf eləmir. Ya gərək gediş qiyməti qaldırılsın, bu da insanlara sərf eləməyəcək, ya da sürücülərin bir çoxu sifarişi götürməyəcək”.
Tez-tez səfərlərə gedib-gəldiyini və hava limanından evinə gəlmək üçün “Bolt” taksi xidmətindən istifadə etdiyini deyən Teymur Əliyev bu qadağanı “anormal qərar” adlandırıb. O, hesab edir ki, bu qərar digər taksi şirkətlərinin “əl-qolunu açmaq” – onlara şərait yaratmaq məqsədi güdür: “Bunun bircə adı var: monopoliya. Deyirlər ki, aeroportdan avtobus işləyir. Aeroportdan çıxanların hamısı “28 May”a, yaxud da “Koroğlu” metrostansiyasına gəlir? Bu nə məntiqdir? Mən çoxsaylı xarici ölkələrdə olmuşam, heç kimi məcbur eləmirlər ki, sən mütləq filan taksiyə minməlisən. Başqa hava limanlarında şəhərin müxtəlif istiqamətlərinə işləyən çoxsaylı avtobuslar olur, bunlardan danışsınlar. Aeroportların əksəriyyətinə metro çəkilib, belə nümunələr gətirsinlər”.
Ceyhun Məmmədov da hesab edir ki, sərnişinlər üçün “yüksək səviyyəli xidmət” adı altında əslində insanların seçim imkanları məhdudlaşdırılır: “İnsanlar daha çox pul xərcləməyə məcbur edilir. Əgər deyildiyi kimi, məqsəd sərnişinin rahatlığıdırsa, o zaman ona seçim imkanı versinlər, özü bilər ekonom taksi ilə gedər, yoxsa komfortla. Amma bu seçim insanların əlindən alınır”.
