Bildiyiniz kimi, Azərbaycan prezidenti İlham Əliyev Çində keçirilən məlum ŞƏT sammiti çərçivəsində Ermənistan baş naziri Nikol Paşinyanla təkbətək görüşdü, həmçinin Türkiyə prezidenti Rəcəb Tayyib Ərdoğanla birgə daha yaxın münasibət nümayiş etdirdi. Çin liderinə artıq iki ölkə arasında sülhün bərqərar olduğunu bildirdi. Bundan əlavə, Azərbaycan və Türkiyənin birinci xanımları Ermənistanın birinci xanımı ilə birgə gəzintiyə çıxaraq, qarşılıqlı münasibətləri nümayiş etdirən görüntülər paylaşdı.

Görəsən, bu fonda, Azərbaycan-Ermənistan Yekun Sülh sazişinin tezliklə imzalanacağına ümid etmək olarmı, yoxsa vəziyyət hələ mürəkkəbdir?

Mövzu ilə bağlı siyasi şərhçi Əli Orucov Moderator.az-a açıqlamasında bildirib ki, Çində keçirilən sammit çərçivəsində Azərbaycan, Türkiyə və Ermənistan liderlərinin, həmçinin birinci xanımlarının mehriban görüşləri uzun illər münaqişə və qarşıdurma şəraitində olan ölkələrin yeni bir dönəmə qədəm qoyduqlarını və barışa can atdıqlarını göstərir. Həmsöhbətimiz nəzərə çatdırıb ki, etimad mühitinin yaradılması və anlaşılan bir dilin istifadəsi Yekun Sülh Sazişinə daha da yaxınlaşdırır.

O, qeyd edib ki, Ankara-İrəvan və Bakı-İrəvan münasibətlərinin normallaşmasında bu cür müsbət addımlar daha da ümidverici bir atmosfer yaradır. Siyasi şərhçi bildirib ki, sülh sazişi artıq paraflanıb və onun imzalanması Ermənistanın siyasi iradəsindən asılıdır.

“Əgər Ermənistanın Konstitusiyasında Azərbaycana və Türkiyəyə qarşı olan bəzi müddəalar aradan qaldırılarsa, Yekun Sülh Sazişinin ilin sonuna qədər, ən geci gələn il Ermənistanda keçiriləcək parlament seçkilərindən sonra imzalanması mümkündür”, - deyə Əli Orucov vurğulayıb.