Cənubi Qafqazda yaranan yeni geosiyasi reallıqlar region dövlətləri və beynəlxalq aktorlar arasında əməkdaşlıq və rəqabəti eyni vaxtda gündəmə gətirir. Bu çərçivədə Zəngəzur dəhlizi kimi strateji layihələrin reallaşması təkcə iqtisadi deyil, həm də geosiyasi əhəmiyyət kəsb edir. Artıq ABŞ bu prosesə birbaşa maraq göstərməyə başlayıb.
“Joqovurd” qəzetinin yaydığı məlumata görə, gələn həftə ABŞ-dən müxtəlif dairələrin nümayəndələri Ermənistana səfər edəcəklər. Ermənistan hökumətindən verilən məlumata əsasən, səfərin əsas gündəliyini “Tramp dəhlizi” kimi tanınan, Azərbaycanın əsas hissəsi ilə Naxçıvanı birləşdirməyi nəzərdə tutan 42 kilometrlik layihə təşkil edir. Bildirilir ki, amerikalılar dəhlizin texniki və siyasi təfərrüatları ilə yanaşı, investisiyaların həcmi, prioritet istiqamətlər və tikinti işlərinə başlanma tarixləri barədə də müzakirələr aparacaqlar.
Politoloq Məhəmməd Əsədullazadə Sherg.az-a ABŞ-nin Zəngəzur dəhlizi ilə bağlı atdığı yeni addımlardan söz açıb:
"8 avqustda Azərbaycan, ABŞ və Ermənistan liderlərinin birgə bəyanatı oldu. Zəngəzur dəhlizinin-Tramp yolunun açılması razılaşdırıldı. Gözlənilirdi ki, sentyabrdan işlərə başlanılsın.
ABŞ bu prosesə gecikməməlidir. Çünki prosesin gecikməsi ABŞ-nin əleyhinə ola bilər. Rusiya və İran ciddi şəkildə proseslərə mane olması ehtimaldan kənar deyil. Ona görə də Vaşinqton artıq Zəngəzur dəhlizində dəmir yolu və avtomobil yolunun çəkilməsi istiqamətində Ermənistanla danışıqlar aparır".
Politoloq Azərbaycanın da Zəngəzur dəhlizi ilə bağlı işlərin tezliklə aparılmasını istədiyini bildirib:
"Bu işləri Azərbaycan deyil, Ermənistanla ABŞ birgə həyata keçirəcək. Bu ildən prosesə başlasalar, 1 il ərzində dəmir yolu xətti çəkilə, 2-2,5 ilə qədər də avtomobil yolunun çəkilməsi reallaşa bilər. Hər halda, ABŞ prosesi cəld həyata keçirməlidir. Çünki geosiyasi vəziyyət sürətlə dəyişir. Zəngəzur dəhlizinin açılması labüddür".
