“Cənubi Qafqazda sabitliyin bərpa edilməsi, sülhün təmin olunması, əlbəttə ki, regional dövlətlər üçün çox əhəmiyyətlidir. Azərbaycan Prezidenti də bu sahədə daim öz səylərini əsirgəmir və qonşu dövlətlərlə münasibətlərin yaxşılaşdırılmasına böyük önəm verir. Bu gün Amerika Birləşmiş Ştatlarının birləşdirici platforma qismində çıxış etməsi, əlbəttə ki, sülhün təmin olunmasına dəstəkdir. Sözsüz, bu, həm də Rusiyanın bilavasitə uzaqlaşdırılmasına istiqamətləndirilib”.
Bu barədə Bizimyol.info xəbər portalına Milli Məclisin deputatı Tahir Rzayev danışıb. Deputat qeyd edib ki, Cənubi Qafqazda Rusiyanın təsiri daimi möhkəm olub və bu gün də bu təsir saxlanılmaqdadır.
“Ölkələr müstəqillik qazanandan sonra Rusiya öz mövqeyini xeyli dərəcədə itirib və itirməkdədir. Rusiya regionda öz rəhbərliyini möhkəmləndirmək üçün sülhə yox, bilavasitə səylərini münaqişəyə yönəldib. Çünki münaqişələrin davam etməsi onun bu regionda hakimiyyətini daha dolğun şəkildə həyata keçirilməsinə imkanlar yaradır və respublikaları təsir altında saxlamağa təkan verir. Ona görə də Rusiya heç vaxt regionda sülhün yaradılmasının tərəfdarı olmayıb və bu gün də bu məqsədlə müəyyən qarşıdurmalara rəvac verir. Çünki Rusiyanın Cənubi Qafqazda mövqeyini itirməsi, onun bilavasitə region üçün əhəmiyyətli olan bir sıra imkanlardan məhrum olması deməkdir”-deyən deputat qeyd edib ki, Amerika Birləşmiş Ştatları da bu istiqamətdə öz səylərini artırmışdır.
“Elə Ermənistanın Baş nazirinin dəfələrlə Vaşinqtona dəvət olunması və eləcə də, sabaha planlaşdırılan üçtərəfli görüş bilavasitə Rusiyanın Cənubi Qafqazdan uzaqlaşdırılmasına və onun təsir dairəsinin azaldılmasına xidmət edir. Bu, xeyirxah bir məqsəddir. Azərbaycan Prezidenti cənab İlham Əliyevin Ermənistanın Baş naziri Nikol Paşinyanın Trampla görüşməsi və fərdi söhbətlərin üçtərəfli danışıqların aparılması sözsüz ki, Cənubi Qafqazda sabitliyin bərpa olunmasına yönəldilib. Bu, çox vacib bir platformadır və Amerika Birləşmiş Ştatlarının bu birləşdirici platforması, əlbəttə ki, nəinki Cənubi Qafqazda, eləcə də dünyada baş verən bir sıra münaqişələrin aradan qaldırılmasına təkan verə bilər. Çünki dünya bu gün böhranlı bir vəziyyətdədir. Müharibələr, münaqişələr, qarşıdurmalar davam etməkdədir. Belə bir vaxtda dünya iqtisadiyyatını möhkəmləndirmək, dövlətlər arasında əməkdaşlığı genişləndirmək mümkün deyil. Bu da dövlətlərin milli maraqlarına ziddir. Vaşinqtonda keçirilən bu görüş dəvət olunan hər iki dövlətin milli maraqlarına xidmət edir. Azərbaycan prezidenti daim sülhün tərəfdarı olub. İstər müharibədən əvvəl, istər müharibə dövründə, istər 23 saatlıq lokal antiterror tədbirləri zamanı da cənab prezident həmişə danışıqlara getməyi, münasibətləri yaxşılaşdırmağı vacib hesab edib və bu gün də bu istiqamətdə böyük səylərini ortaya qoyur.
Vaşinqtonda belə bir görüşün keçirilməsi Rusiya tərəfindən qısqanclıqla qarşılanacaq. Ancaq artıq dövr o dövr deyil. Zaman yeni reallıqlar, yeni yanaşmalar, yeni siyasi gedişlər etməyi tələb edir və Azərbaycan da bu siyasətdə, bu diplomatiyada öz sözünü deməyi bacarır”-deyən Tahir Rzayev vurğulayıb ki, Azərbaycan prezidenti bütün hallarda Azərbaycan xalqının milli maraqlarından, dövlətin mənafeyindən çıxış edir və bu da dünya dövlətləri tərəfindən sülhsevər bəşəriyyət tərəfindən yüksək qiymətləndirilir.
Deputatın fikrincə, Vaşinqton görüşü də Azərbaycanın diplomatik uğuru kimi tarixə düşəcək.
