Ermənistan mətbuatında yayılan məlumata görə Ermənistan Baş naziri Nikol Paşinyan növbədənkənar parlament seçkilərinə gedə bilər.

Ermənistan hökuməti hazırda növbədənkənar parlament seçkiləri keçirlə bilərmi?

Mövzu ilə bağlı Redaktor.az-a danışan Milli Məclisin deputatı Hikmət Babaoğlu bildirdi ki, Ermənistanda yeni seçkilərin keçirilməsinin vaxtı bəllidir.

"Əslində Ermənistanın qanunlarına görə, bu, bir il sonra baş tutmalıdır. Ancaq məsələ ondadır ki, bu gün seçkinin özü qədər onun vaxtının müəyyənləşdirilməsi də vacibdir. Seçkilərin daha öncə keçirilməsi yalnız və yalnız o vaxt mümkün ola bilər ki, Paşinyan şərtlərin öz lehinə dəyişdiyi ən doğru mərhələdə bunu etmək qərarına gəlsin. Yəni zaman çox önəmlidir. Çünki Paşinyan seçkiyə hazırlaşdığı kimi, onun əleyhdarları da hazırlaşırlar. Ölkədəki radikallar və revanşistlər də Ermənistanda keçiriləcək seçkiyə hazırlaşırlar. Rusiyadan ixrac edilən oliqarxlar da buna hazırlaşır", - deyən millət vəkilinin sözlərinə görə, hətta bəzi xarici ölkələrin xüsusi kəşfiyyat orqanları da Ermənistanda keçirilməsi nəzərdə tutulan seçkiyə hazırlaşırlar:

"Bu qədər mürəkkəb bir formula varkən, rəqiblərinə qarşı gözlənilməz bir həmlə etmək, əlbəttə ki, Paşinyanın siyasi məsləhətçilərinin düşündüyü bir həmlə ola bilər və bu mümkündür. Vəziyyətin necə olması isə seçkinin nəticəsinə bağlı olacaqdır. Paşinyan əslində məhz seçkinin nəticəsinin daha çox onun xeyrinə olacağı bir vaxtda seçkini növbədənkənar keçirməklə bağlı qərar qəbul edə bilər ki, burada aparılacaq hər hansı bir hesablamada kiçik bir xəta Paşinyanın siyasi karyerasının sonunu da gətirə bilər. Ona görə görünür, bu məsələ ilə bağlı çox ciddi analiz və təhlillər aparmaq lazım gələcək".

H.Babaoğlu vurğuladı ki, növbədənkənar seçki məsələsi Paşinyanın özü tərəfindən və yaxud onun rəqibləri tərəfindən yayılmış bir dezinformasiya da ola bilər:

"Ona görə də mən düşünürəm ki, bütün hallarda bir məsələ də var ki, bu, seçkilərin tarixinin önə çəkilməsi ehtimalını azaldır. Bu nədir? Əgər seçkilər önə çəkiləcəksə, o zaman mövcud hökumət istefa verməlidir. Ya da əgər Ermənistan Konstitusiyasında varsa, Baş nazir Paşinyan seçkilərin tarixinin dəyişdirilməsi ilə bağlı xüsusi sərəncam imzalamalıdır. Bu proseslərlə bağlı necə qərar qəbul edəcək? Mənə elə gəlir ki, Paşinyanın qərar qəbul edəcək komandası daxili və xarici şərtləri nəzərə alaraq, dəqiq hesablama apararaq belə bir qərar qəbul edə bilərlər".