İranın ali dini lideri Əli Xamenei İsrail və ABŞ üzərində qələbə qazandığını iddia etdikdən sonra öz vətəndaşları tərəfindən istehza və tənqid dalğası ilə üzləşib.

Lent.az bildirir ki, müxalifət nəşri olan “Iran International”ın məlumatına görə, onlarla iranlı 86 yaşlı liderin iyunun 26-da məlum olmayan yerdən söylədiyi nitqindən qəzəblənib.

“İsrailin baş naziri öz xalqı arasında sərbəst gəzərkən bu həyasız qorxaq siçovul çuxurundan danışır”, - şərhçilərdən biri yazıb.

Digərinin sözlərinə görə, “əgər o həqiqəti deyirdisə, üzə çıxacaqdı”.

Müharibə başlayandan bəri ictimaiyyət qarşısına çıxmayan Xamenei həm dövlət yas mərasimlərini, həm də ənənəvi dini tədbirlərə gəlməyərək təcrid və qorxu ilə bağlı şübhələri artırıb.

İranlılar qeyd edirlər ki, lider hətta İsrailin zərbələri nəticəsində öldürülən yüksək rütbəli komandirlərin, o cümlədən SEPAH generallarının və nüvə alimlərinin dəfn mərasimində iştirak etməyib. Bunun fonunda onun İsrailin “az qala diz çökdürdüyü” və ABŞ-ın “sifətinə sillə vurulduğu” iddiaları, respondentlərin fikrincə, reallıqdan qopmuş təbliğat kimi görünür.

"Biz yarım əsrə yaxındır ki, bu rejim altında yaşayırıq. Anlamağı öyrənmişik ki, onların qələbə dedikləri hər şey əslində məğlubiyyətdir", - Tehran sakini yazıb.

Digəri deyib: "Sən rəhbərlik etmədin. Başqaları ölərkən gizləndin".

Bəzi xəbərlər göstərirdi ki, əslində İran diplomatları ölkənin hava məkanını tərk etmək üçün İsraildən təhlükəsiz keçid tələb etmək məcburiyyətində qalıblar. Vətəndaşların fikrincə, öldürülən generalların dəfn mərasimləri hər hansı televiziya çıxışlarından daha parlaq bir məğlubiyyət göstəricisi olub.

Bir şərhdə deyilir: "O, həftələrdir günəş işığı görmür".

Bir çox iranlı millətin səbrinin tükəndiyini vurğulayır: "Bir gün çılpaq əllərimizlə yeni bayraqlar qaldıracağıq. Sonra onun arxasında gizlənmək üçün nə bunker, nə də yalan olmayacaq".