Sosial şəbəkələrdə geniş yayılmış və istifadəçilərin çox zaman narazılığına səbəb olan problemlərdən biri istənilən sahədə satışla bağlı paylaşımlarda qiymətin açıq şəkildə göstərilməməsidir. Hər birimizin qarşısına çıxan və qiymətlə maraqlandıqda “+” işarəsi tələb olunan bu marketinq taktikası çoxumuzun da deyinməsinə səbəb olur.

“Qiymət deyəsən dövlət sirridir” tipli etiraz şərhlərini də mütəmadi olaraq görmək mümkündür. Bu, ilk növbədə maraq oyatmağa hədəflənib. Satıcılar qiyməti gizlədərək maraqlanan şəxsin birbaşa mesaj yazmasına və ya əlaqə saxlamasına nail olmaq istəyir və çox zaman da hədəfinə çatır.

Marketoloq Malik Səfərov Bizim.Media-ya bildirib ki, sosial şəbəkədə xüsusi mexanizmlərlə alıcının diqqətini çəkmək üsulları marketinq fəaliyyətinin müəyyən bir hissəsini təşkil edir.

Bu üsulla pulu olmayan da qiymətlə maraqlanır

“Bu, təkcə bir qrup insanların deyil, həm də sosial motivasiya edərək dijital metodlarla ətrafdakı insanların da diqqətini cəlb etməkdir. Bu zaman cəlb olunan adamların başqa tanışlarını da bu istiqamətə yönləndirilməsi mümkün olur. Sosial mediada reklamın təşkil olunmasının əsas məqsədi bundan ibarətdir. Ümumiyyətlə sosial şəbəkələrin reklam gücü hər kəsə məlumdur. Məsələn, avtomobil reklamını və satış təklifini elə cazibəli edə bilərlər ki, pulu olmayan adam da qiymətlə maraqlana, yaza bilər”.

Ekspert deyir ki, sosial media reklamı, hədəf auditoriyasının böyük hissəsinə çatmaqda və müştərilərlə əlaqə qurmaqda ənənəvi reklamdan üstündür. Həm də sosial media reklamları vizual olaraq cəlbedicidir. İstər şəkil, istər video formatda dərhal diqqəti cəlb edir. Burada istifadə olunan başlıq xüsusi effektiv gücə malikdir. Bundan başqa, “indi alış-veriş edin, daha çox qazanın”, “ətraflı məlumat əldə etmək üçün əlaqə saxlayın”, “yararlanmaq üçün qeydiyyatdan keçin” kimi CTA-lar (Call-To-Action – izləyicini hərəkətə keçməyə həvəsləndirən xəbərdarlıq) əhəmiyyətli dərəcədə təsir göstərə bilir.

Qiymətin gizlədilməsi alıcıya görə dəyişə bilərmi?

M.Səfərov qiymətin alıcıya görə fərqli təklif olunmasını qeyri-peşəkarlıq hesab edir.

“Alıcının məlumatlı və ya naşı olduğunu müəyyənləşdirib buna uyğun qiymət təklif olunması qeyri-rəsmi satışlarda, yaxud kiçik, fərdi bizneslərdə ola bilər. Yəni brendinə, fəaliyyətinə hörmət edən şirkət belə addım atmaz. Bəzən rəqabətdən qorunmaq üçün də qiymət fərdi olaraq deyilir. Yəni rəqib şirkətin eyni məhsulu daha ucuz qiymətə təqdim etməsinin qarşısını almaq üçün qiymət açıq qoyulmur”.

Qiymət gizlədilməsinin vergidən yayınmaqla əlaqəli ola biləcəyi ehtimalına gəlincə, ekspert bildirir ki, qiyməti açıq deyil, yalnız şəxsi mesajla aparmağın vergidən yayınmağa hesablanması ağlabatan deyil. Çünki onsuz da satışdan vergi ödənilir. İstənilən halda qiymətin açıq şəkildə göstərilməsi daha şəffaf və etibarlıdır.

Qeyd edək ki, bir çox Avropa ölkələrində sosial platformada məhsul reklamlarının qiymətinin açıq göstərilməsi məcburidir. Əks təqdirdə, bu, istehlakçının aldadılması və qeyri-şəffaf ticarət praktikası kimi qiymətləndirilir.