Bakıda ev sahibini çoxsaylı bıçaq zərbələri ilə öldürənin məhkəməsi başlayıb.
Lent.az xəbər verir ki, bu gün Bakı Ağır Cinayətlər Məhkəməsində Bakıda 75 yaşlı kişinin başını kəsib öldürən Zahid İsayevin cinayət işi üzrə məhkəmənin ilk baxış iclası keçirilib.
Hakim Aygün Qurbanovanın sədrliyi ilə keçirilən prosesdə bir daha təqsirləndirilən şəxsin anket məlumatları dəqiqləşdirilib.
Məlum olub ki, o, 1965-ci ildə Daşkəsən rayonunda anadan olub. Bundan əvvəl Cinayət Məcəlləsinin 126.1-ci (qəsdən sağlamlığa ağlr zərər vurma) maddəsi ilə məhkum olunub.
Prokuror ittiham aktını elan edib. İttiham aktına əsasən, Zahid İsayev Nizami rayonu Arif Əliyev küçəsi, 35 ünvanında yerləşən fərdi yaşayış evində kirayədə yaşayıb. Ev sahibi Tahir Əliyevin Zahid İsayev tez-tez mübahisəsi düşürmüş. Evi təmiz saxlamadığı üçün Tehir Əliyev mütəmadi Zahid İsayevə iradlar bildirib.
İyulun 20-i gecə saat 01 radələrində paltarlarının çirkli olduğunu görən Tahir Əliyev Zahid İsayevin qarın nahiyyəsinə dizi ilə vurub, onu söyüb.
Bu zəmində aralarında yaranan mübahisə zamanı, İsayev orta dərəcəli sərxoş vəziyyətdə, masanın üzərindən məişət təyinatlı bıçağı götürüb, qəsdən öldürmək məqsədi ilə Əliyevin üz, boğaz və boyun nahiyyələrinə çoxsaylı zərbələr endirib.
Hakim ona ittiham olunduğu maddənin sanksiyasında nəzərdə tutulan cəza müddətini təqsirləndirilən şəxsin nəzərinə çatdırıb.
Zahid İsayev ittiham üzrə özünü təqsirli bilib. O bildirib ki, Tahir Əliyevlə iyulun 2-də tanış olub, həmin tarixdən onun evində kirayəşin qalıb. Razılaşmaya əsasən, pul ödəməyib, onun evində təmizlik işləri görüb. Amma o, hadisə baş verən gecə, münaqişənin məişət zəminində yox, ev sahibinin onun ünvanına ağır söyüşlər söydüyünü vurğulayıb.
Bıçaqla çoxsaylı zərbələr vurmasının səbəbini Zahid İsayev Tahir Əliyevin ondan əl çəkməməsi, onu boğması ilə izah edib.
Zahid İsayev Tahir Əliyevə 50-dən çox bıçaq zərbəsi vurub.
Növbəti prosesdə zərərçəkmiş şəxsin hüquqi varisinin ifadəsi dinləniləcək.
Qeyd edək ki, istintaq orqanı tərəfindən təqsirləndirilən şəxsə yekun olaraq CM-nin 120.2.9-cu (köməksiz vəziyyətdə olan adamı qəsdən öldürmə) maddəsi ilə ittiham verilib.
