Azərbaycanda məşhur siyasi liderlər arasında namaz qılanlar azdır. Bəlkə də bəziləri ehtiyat edir ki, namaz qılsam, Qərb məni “İslam fundamentalisti” adlandırar və karyerama son qoyular. Digərləri isə qorxur ki, onu İslamın bəzi radikal, yaxud hansısa qeyri-ənənəvi cərəyanının nümayəndəsi sanıb güdaza verərlər...
Bir vaxtlar haylı-küylü çıxışları ilə seçilən, səbirsiz, kəmhövsələ bir insan təsiri bağışlayan sabiq daxili işlər naziri İsgəndər Həmidovun namaz qılması yəqin çoxlarının ağlına belə gəlməz. Nə qədər gözlənilməz olsa da, son görüşümüzdə məlum oldu ki, İsgəndər bəy artıq neçə illərdir ki, namaz qılır. Hətta Qurani-Kərimin bir çox ayələrindən yerli-yataqlı misallar gətirir. Özü də nəinki Azərbaycanda, məsciddə, hətta qatı katoliklərin yaşadığı Avropa ölkələrindən birində kilsədə namaz qılmağa cəsarət edib. Sonra isə katolik keşişi ilə İslam barəsində geniş mükalimə aparıb. Hadisənin təfsilatını Azərbaycan Bozqurdlarının müsəlman liderinin öz dilindən öyrənək:
- Quranı daha dərindən anlamaq üçün birinci Tövratı və İncili oxudum... Dünyada Xristian dinində iki əsas cərəyan var: katoliklik və pravoslavlıq. Əstəğfürullah, katoliklər deyir ki, İsa Peyğəmbər Allahdır. Pravoslavlar isə deyirlər ki, İsa əleyhissəlam, əstəğfürullah, Allahın oğludur. İncildə İsa Peyğəmbər buyurur ki, mən də sizin kimi bir bəşərəm, sadəcə, Allah məni sizə Peyğəmbər yollayıb, sizi Allahın yoluna dəvət edirəm.
Təxminən 2006-cı ilin yayı olardı. Uşaqların anası ilə Ukraynanın məşhur Medoborı sanatoriyasında dincəlirdik. Tarixi abidələrə baxmaq məqsədilə yaxınlıqdakı Lvov şəhərinə gəldik. Namaz vaxtı çatdı, dedim ki, gedib kilsədə namaz qılacam. Uşaqların anası da qorxdu, hətta ağladı ki, bu qatı katolik benderlərin içində namaz qılmaq olar, səni öldürərlər. Dedim, yox e, namazımı vaxtında qılmalıyam. Girdim kilsəyə, üsulluca dəstəmazımı alıb başladım namaza. İbadətə başlayanda fikir verdim ki, 3-4 nəfər gəlib arxada gözləyir. Namazı qurtarandan sonra yaxınlaşıb soruşdular ki, siz hansı dinin sahibisiz, dedim ki, İslam. Dedilər ki, baş keşişimiz sizi çağırır. Getdim keşişlə görüşdüm. Soruşdu ki, müsəlmansız. Dedim, bəli. Təəccübləndi ki, bəs siz kilsədə namaz qılırsız. Dedim, bəli, burada təəccüblü nə var ki, məscid də Allahın evidi, sinaqoq da, kilsə də. Soruşdu ki, bəs Quran buna icazə verir. Dedim, bəli. Keşiş söylədi ki, axı bunu bizə deyən olmayıb. Dedim, siz bunu eşitmək istəmirsiz sadəcə. Soruşdu ki, yaxşı, kilsə ilə məscidin fərqi nədir. Dedim, sadəcə zahiri quruluşda fərq var. Bir də, siz kilsədə şəkil asırsız, amma biz məsciddə şəkil asmırıq. Şəkil çəkmək bizdə günah olmasa da, məsləhət deyil. Dedim, istəyirsiz sizə elmi şəkildə izah edim. Razılaşdı. Dedim ki, XVII əsrdə İspaniyanın ən gözəl kişilərindən olan bir şahzadənin qardaşı gəlir məşhur rəssam Velaskesin yanına ki, kiçik qardaşım Fransaya müharibəyə gedir, onun portretini çək, bilirəm ki, qələbə ilə qayıdacaq. Velaskes müəyyən qiymətə razılaşır. Bir müddət sonra şahzadə portreti aparmağa gələndə baxır ki, rəssam qardaşını ağlı başından çıxmış bir adam kimi təsvir edib. Hirslənir ki, mənim qardaşım İspaniyanın ən gözəl kişisidir, sən onu niyə belə təsvir etmisən. Velaskes deyir ki, istəmirsənsə, qızıllarını götür get, portret qalsın. İki ildən sonra həmin kiçik qardaş Fransada müharibə zamanı dəli olur və eynən Velaskesin təsvir etdiyi görkəmi alır. Və bu dəfə şahzadənin böyük qardaşı gəlib 10 qat artıq qızıl verib həmin portreti Velaskesdən alır...
Danışıb qurtaranda keşiş soruşdu ki, bəs bunun dinə nə dəxli var. Dedim, Quranın İsra surəsinin 85-ci ayəsində Yaradan buyurur ki, Ya Peyğəmbər, səndən ruh haqqında soruşsalar, de ki, o yalnız Allahın əmrindədir, sizə onun haqqında yalnız cüzi bilik verilər. Yəni insanları başa salır ki, siz təkcə zahiri bilə bilərsiz, batini, daxili isə yalnız Mən bilirəm. Rəssamlar isə insanın daxilini, ruhunu bilməyə çalışırlar. Bu zaman da dünyada fəlakətlər, müharibələr baş verir. Ona görə İslam rəssamlığı məsləhət görmür. Bu söhbət keşişi çox maraqlandırdı. Soruşdu ki, sabah bizim televiziyada bu barədə danışa bilərsizmi. Dedim, mən danışaram, ancaq sizin tabe olduğunuz dairə buna icazə verməz.
Durub çıxmaq istəyəndə bir şüşə çaxır çıxardı və yanına qızılı qədəhlər qoydu. Mən güldüm. Soruşdu ki, niyə gülürsən. Dedim ki, indi deyəcəksən ki, əstəğfürullah, bu, Allahın qanıdı, içək. İzah etdim ki, bax, siz bu cür günaha batırsız. Quran buyurur ki, Allah doğulmayıb, doğmayıb, cisim deyil, gözə görünmür. Belə bir varlığın qanı ola bilərmi? Yox, əgər çaxırı İsa əleyhissəlamın qanı hesab edirsinizsə, onun qanını tökənləri Quranda Allah lənətləyib, onu içmək olmaz... Xülasə, bir neçə Quran ayəsindən də misal çəkərək keşişə sübut etdim ki, müsəlmanların kitabı ən mükəmməl kitabdır. Və İslam Avropa və Amerikada təbliğ edildiyi kimi, müharibəyə, zorakılığa çağırmır, bu, sülh və elm dinidir...
Ayrılanda katolik keşişi bir daha xahiş etdi ki, sabah görüşək, Lvov televiziyasında İslamın sülh və barışıq dini olması barədə də danışarsan. Razılaşdım. Ertəsi gün vədələşdiyimiz vaxtda görüşdük. Dedi ki, bəs bağışla, sənin çıxışına icazə vermədilər. Dedim, bilirdim ki, sizinkilər belə çıxışa icazə verməz, onlara İslamı radikal din kimi təbliğ edənlərin, öldürməkdən, partlatmaqdan və s. danışanların çıxışı lazımdır...
