Son günlər Azərbaycan Silahlı Qüvvələrində baş verən bədbəxt hadisələr və intihar olayları cəmiyyətdə ciddi narahatlıqla qarşılanmaqdadır. Xüsusilə də, aprelin 7-də cəbhənin Füzuli istiqamətində baş verən və 3 hərbçinin ölməsi, 6 hərbçinin isə yaralanması ilə nəticələnən mina partlayışı ciddi rezonansa səbəb olub. Partlayışdan dərhal sonra müdafiə naziri Zakir Həsənovun hadisə yerinə getməsi də olayın Müdafiə Nazirliyində də kifayət qədər əks-səda doğurduğunu isbatlayır.
Bəzi ekspertlər isə hesab edir ki, son bir neçə ayda orduda baş verən proseslərin təhlili vəziyyətin artıq idarəolunmaz həddə çatdığını təsdiqləməkdədir.
Moderator.az-a açıqlama verən “Hərbi Jurnalistlər” İctimai Birliyinin rəhbəri, polkovnik Üzeyir Cəfərov hesab edir ki, orduda vəziyyət həqiqətən də gərgin və kritikdir:
“Mən cəbhənin Füzuli istiqamətində baş verən hadisə haqqında məlumat alan kimi, oradakı yoldaşlarla əlaqə saxladım. Mənə bildirdilər ki, Müdafiə Nazirliyi hadisə nəticəsində 3 nəfərin öldüyünü, 6 nəfərin yaralandığını bildirsə də, əslində yaralananların sayı 10-dan artıqdır. Müdafiə Nazirliyi baş verən olayı əsgərlərin səhlənkarlığı ilə əlaqələndirir. Lakin mən məsələyə bir qədər dərindən yanaşmağın tərəfdarıyam. Məncə Müdafiə Nazirliyinin kadr siyasəti sahəsində buraxılan boşluqlar zənnimcə yavaş-yavaç özünü büruzə verməyə başlayıb”.
Ekspertin qənaətincə, müdafiə nazirinin yanlış kadr seçimi artıq indidən ciddi fəsadlarla müahidə edilməkdədir:
“Z.Həsənov hal-hazırda “atam mənə kor dedi, gəlib-gedəni vur dedi” məsəli ilə hərəkət edir. Z.Həsənov peşəlkar kadrları vəzifədən uzaqlaşdırır, ixtisasına uyğun olmayan şəxsləri Müdafiə Naizlriyində yüksək vəzifələrə gətirir. Istisna etmirəm ki, həmin hadisədə rəhmətə gedən zabit də incidilən zabitlərdən biri olub. Müdafiə Nazirliyinin rəhbərliyi zabitlər arasında bir ruh düşgünlüyü yaradıb. Problemlər baş alıb gedir və heç kim də bu problemlərin həllinə cəhd göstərmir. Z.Həsənov başa düşməlidir ki, bu onun üçün Daxili Qoşunlar deyil. Müdafiə Nazirliyinin bir hərbi birləşməsinin şəxsi heyəti Daxili Qoşunların ümumi şəxsi heyətinin sayına bərabərdir. Z.Həsənov son günlər faktiki olaraq kabinet çıxmırdı. Sadəcə ayrı-ayrı şəxslərə medallar paylamaqla məşğul idi. Orduda isə vəziyyət gərgindir”.
Ekspertin fikrincə, bu gün Z.Həsənovun yanlış kadr islahatı nəticəsində Müdafiə Nazirliyinin rəhbərliyində təsadüfi insanlar təmsil olunur ki, bu da bütövlükdə Azərbaycanın təhlükəsizliyini sual altında qoyur:
“Biz elə məsələlər var ki, dost-düşmən amilinə görə onları açıqlamır, çox da üstünə getmirik. Lakin vəziyyət bu cür davam edə bilməz. Müdafiə Nazirliyinin rəhbərliyi tam təsadüfi şəxslərə həvalə olunub. Bu isə Azərbaycanın təhlükəsizliyi baxımından ciddi riskdir”.
Ü.Cəfərov Silahlı Qüvvələrin Baş Qərargah rəisi vəzifəsində təmsil olunan Nəcməddin Sadıqovun şəxsə maraqlara hesablanan kadr siyasətinə də diqqət çəkdi:
“Nəcməddin Sadıqovun başı ətrafı ilə birlikdə varlanmağa qarışıb. Bu gün Silahlı Qüvvələrin Akademiyasının rəisi vəzifəsi vakantdır. Çünki ora N.Sadıqov öz adamını yerləşdirmək istəyir. Hərbi-dəniz qüvvələri kimi mühüm bir güc qurumu rəhbərsizdir. Çağırışla bağlı məsələdə isə heç bir boşluq yoxdur. S.Əbiyev dönəmindən fərqli olaraq hazırda bəzi çağırışçıların hərbi birləşmələrdə xüsusi tapşırıqla yerləşdirilməsi reallaşır və onlara güzəştlər edilir. Təbii ki, bunlar öz-özlüyündə baş verən məsələlər deyil”.
Ekspertin qənaətincə, Müdafiə Nazirliyinin taleyi ilə oynamaq dövlətin taleyi ilə oynamaq deməkdir ki, bu da yolverilməzdir:
“Mən hər zaman demişəm ki, Müdafiə Nazirliyinin taleyi ilə oynamaq olmaz. Kimsə kiminsə dostu, yaxını ola bilər. Amma Müdafiə Nazirliyi kimi ciddi bir qurumu tam təsadüfi şəxslərə tapşırmaq doğrusu, ölkənin taleyi ilə oynamaq deməkdir. Son proseslər də deyilənləri təsdiq edir”.
Ordudakı mövcud problemlərlə bağlı ölkə başçısını da məlumatlandılrdığını qeyd edən ekspert, məlum müraciəti ilə bağlı konkret addımların atılmamasından məyusluq duyduğunu vurğuladı: “Mən ölkə başçısına ordudakı problemlərlə bağlı müraciət etdim. Amma bu məsələnin üstündən sükutla keçdilər. Əgər mənim qeyd etdiyim faktlar həqiqəti əks etdirmirdisə, o zaman məni çşağırıb deməli idilər ki, Azərbaycan Silahlı Qüvvələrindəki vəziyyətlə bağlı dezinformasiya yayırsan. Əgər həqiqəti yazmışdımsa, o zaman niyə qeyd etdiyim problemlərin aradan qaldırılması ilə bağlı müvafiq addımlar atılmadı? Bu yaxınlarda orduda Balıyev soyadlı polkovnik-leytenant həyatına qəsd etdi. Əgər bir ordunun yüksək rütbəli zabiti intihar edirsə, deməli həmin orduda nə isə ciddi bir problem mövcuddur”.
Ü.Cəfərovun fikrincə, ordudakı mövcud problemlərin ən qısa zamanda həlli istiqamətində lazımi addımlar atılmazsa, ölkə ictimaiyyəti daha ciddi itki və rüsvayçılıqlara şahid olacaq:
“Mən mövcud durumdan olduqca narahatam. Hesab edirəm ki, ordudakı duruma ciddi şəkildə müdaxilə edilməzsə gələcəkdə vəziyyət daha kritik və dözülməz olacaq”.
