“Qaçqınkom”un balansında olan məcburi köçkünlər və şəhid ailələri üçün tikilmiş evlərin Əmək və Əhalinin Sosial Müdafiəsi Nazirliyi balansına keçməsi ilə məcburi köçkünlərlə komitə arasında olan gərginlik aktual olaraq qalır.
Ötən ay redaksiyamıza müraciət edərək, “Qaçqınkom”dan onun haqqı olan evin verilməməsi barədə şikayət edən Xocalı sakini, məcburi köçkün, əlil və şəhid ailə üzvü Elmira Əzizovaya komitədən bir otaqlı mənzil təklif olunub. Məsələ ilə əlaqədar “Qaçqınkom”un Mətbuat Xidməti rəhbəri İbrahim Mirzəyev Bizimyol.info-ya bildirib ki, komitə rəhbərliyi məcburi köçkünlərin ev məsələsi və başqa problemlərinin həllinə şəffaflıq və ədalət prinsipi ilə yanaşır: “Həmin xanıma Qobu qəsəbəsindən bir otaqlı, Ümid qəsəbəsindən bir otaqlı, Kürdəmir və Şirvan rayonlarından iki otaqlı ev təklif edirik. Bu gün bizim əlimizdə olan budur. Artıq aidiyyatı şöbədən bu haqda məlumat verildi ki, Qobu qəsəbəsindən bir otaqlı ev mümkündür. Həmin ev isə xanım və ailəsinin yaşadığı evdən dəfələrlə yaxşı vəziyyətdədir. Biz müharibədən öncə də əlillər, qazilər, şəhid ailələri üçün ayrıca yanaşma tətbiq etmişik. Siyahıda onlara ayrıca baxılıb. İki siyahı olub - əlillər, şəhidlər, qazilər və ailələri, hansı ki, bunlar imtiyazlılar kimi nəzərdə tutulub. Bir də digər məcburi köçkünlər. İki siyahı yaratmaqda məqsədimiz odur ki, ədalətli və şəffaf yanaşma olsun, öncəlikli şəkildə əlillər, şəhid ailələri və qazilərə evlər verilsin. Ancaq indiki vəziyyətdə bizim komitənin balansında 3-4 otaqlı mənzillər yoxdur. Onlar müvafiq prezident sərəncamı ilə Əmək Nazirliyinin balansına keçirilib” – deyə, “Qaçqınkom”un Mətbuat Xidməti rəhbəri İbrahim Mirəyev bildirib.
Dörd nəfər ailə üzvündən ibarət Xocalı sakini, məcburi köçkün və əlillik dərəcəsi olan xanıma Qobu qəsəbəsindən bir otaqlı ev təklif olunandan sonra Onunla yenidən əlaqə saxlayaraq, komitə sədri Rövşən Rzayevin qəbuluna yazıblar. Onlayn formatda keçirilən qəbul və nəticələri barədə redaksiyamıza yenidən bildirən Elmira xanım bu qəbuldan razı qalmadığını və ölkə Prezidentinə “Qaçqınkom”la bağlı şikayət məktubu yazacağını bildirib: “Bu gün onlayn qəbulda komitə sədri Rövşən Rzayev dedi ki, bir həftə də gözləyək, Eldar müəllim (komitə sədrinin müavini – M.Ş) koronadır, o gəlsin, bizimlə maraqlansın. Mən ona bildirdim ki, bu komitədə rəhbər şəxs sizsiniz, mən problemimin həlli üçün sizin qəbulunuza yazılmışam, Eldar müəllim 2016-cı ildən bəri etdiyim müraciətlərə heç baxmayıb. Daha sonra komitə sədri dedi: “Bizim əlimizdə mənzil yoxdur, Əmək Nazirliyinin balansına verilib. Ancaq biz sizi məhkəmədə olan mənzillərdən biri ilə təmin edə bilərik”. Halbuki, onlayn görüş zamanı komitə sədrinə zəng gəldi, o da bizdən üzrxahlıq edib, telefonu qaldırdı, sonra telefonda onunla danışana dedi: “o kişiyə (evlə bağlı müraciət edəni nəzərdə tutur – M.Ş) mənzil verin”. Əgər əllərində mənzillər yoxdursa, Əmək Nazirliyinin balansına keçibsə, nəyə görə kiməsə mənzil verilməsi barədə telefonda göstəriş verir?.. Biz bunu eşitdik.
Daha sonra Qobu qəsəbəsindən verilən bir otaqlı evi müzakirə etdik. Bildirdim ki, biz dörd nəfərdən ibarət ailəyik. Həmin o evi bu şərtlə qəbul edərəm ki, daha sonra onu 3 otaqlı mənzillə dəyişdirəsiniz. O da qayıtdı ki, bizə şərt qoyma. Yəni belə baxıram, bu insan üçün müraciətimiz, problemimiz önəmsizdir. Yoldaşım Xocalıda torpaq uğrunda döyüşüb, özü həm əlildir, həm şəhid ailəsidir. Şəhid olan ailə üzvlərinin bütün şəkilləri bizdədir. Özüm veteranam, vəsiqəm var. Dörd il o güllə-boranın altında həmin torpaqlar üçün gənc yaşımızda sinəmizi qabağa verib, canımızı qurban vermişik, sağlamlığımızdan olmuşuq. Bu gün də torpaq uğrunda canından keçib, dünyasını dəyişənlər şəhid sayılır, yaralananlar qazi sayılır. İndi bütün faktlarımız, sənədlərimiz də əlimizdədir. “Qaçqınkom”un da verdiyi sənədlər bizdədir. Onlara bildirdim ki, o qədər lazımsız insanları mənzillərlə təmin etmisiniz ki, onlar özləri Bakıda dünyaya gəliblər, heç müharibənin nə olduğunu görməyiblər, bilmirlər. Bizim kimi sağlamlığını həmin o müharibədə itirən insanlar isə ağır şəraitdə yaşayır. Mən orda dedim ki, bu şərtlə Qobudan verilən bir otaqlı mənzilə razı olaram ki, daha sonra bizə haqqımız olan üç otaqlı mənzili versinlər. Çünki biz dörd nəfər ailə üzüyük, bir otaqlı evdə necə yaşayaq? İki böyük, evlənmə yaşında olan övladlarım var. Rövşən Rzayev də dedi: “Bizimlə şərtlə danışma, sizə bir də deyirəm, balansımızda ev yoxdur”.
30 ildir gözləyirik, Prezidentin qərarı ilə ilkin mərhələdə yerləşdirilənlərdən biri də bizim ailə olmalı idi, amma nəzərə almadılar. Mən komitə sədri ilə danışıram, komitə sədri də məsələni öz üzərindən atır ki, Eldar müəllim gəlsin, sizinlə danışsın. Halbuki, bu komitənin sədri Eldar Zeynalov yox, Rövşən Rzayevdir. Mənim problemimə sənin müavinin baxacaqsa, o həll edə biləcəksə, mən niyə sənin qəbuluna yazılıram ki?
İndiyə qədər bu quruma yalvar-yapışla getmişəm, dəfələrlə hüquqi şəkildə müraciətlər etmişəm, haqqım olanı istəmişəm, tələb etmişəm. Dəfələrlə qəbula yazılsam da, “diqqətdə saxlayırıq” deyib, yola veriblər. İndi də yola verirlər. Komitə sədrinə deyirəm ki, bununla bağlı Prezidentə məktub yazıb, bildirəcəm. Qoy, bu komitədə baş verənlərdən xəbəri olsun. Deyir: “Hüququndur, yaza bilərsən”. 2015-ci ildən bu yana bu komitəyə ayaq döyürəm, məni yola verirlər. İndi tək çarəm Prezidentə məktub yazmaqdır. Qoy, cənab Prezident burda vətəndaşlara qarşı göstərilən laqeyd münasibətdən xəbərdar olsun. Mənim Prezidentim Çernobl əlillərinə, 1941-1945 Müharibəsi iştirakçılarına dəyər verib, qaçqın və məcburi köçkünlərə qayğı ilə yanaşılması, onların mənzillə təmin edilməsi barədə göstərişlər verib. Bu, hələ ulu öndər Heydər Əliyevin vaxtında da belə idi. Ancaq indi bizim gedişatımızdan, problemimizə baxılmamasından Prezidentimizin xəbəri yoxdur. Mən inanıram ki, bu barədə məktubum cənab Prezidentə çatsa, lazımi tədbirlər görüləcək. Əgər komitə sədri “bu, sənin hüququndur” deyirsə, mən də son çarə o hüququmdan da istifadə edəcəm” – deyə, Xocalı sakini, şəhid ailə üzvü və Qarabağ əlili Elmira Əzizova bildirib.
Əlavə olaraq, bildiririk ki, vətəndaşın fikirlərinə görə redaksiyamız məsuliyyət daşımır və problem öz hüquqi həllini tapanadək həm müraciət edən vətəndaşın, həm də komitə rəhbərliyinin müraciətlərini işıqlandırmağa hər zaman hazırıq.
Bizimyol.info
