“Sonuncu mitinqlərində onlar əsl niyyətlərini ortaya qoyub paytaxtda asayişi pozmağa, iğtişaşlar yaratmağa cəhdlər etdilər. Sözsüz ki, bu cür qanunazidd hərəkətlərin qarşısı tərəfimizdən yerindəcə alındı. Ona görə də belələrinə kütləni idarə edə biləcəkləri vaxtadək hər hansı toplantı keçirməyə icazə verilməməsi ilə bağlı Bakı Şəhər İcra Hakimiyyəti qarşısında vəsatət qaldıracağam”. Bu fikirləri Bakı Şəhər Baş Polis İdarəsinin rəisi, polis general-mayoru Mirqafar Seyidov “Report”a müsahibəsində deyib.
Generalın sözlərinə görə, Bakıda sabitliyi pozmaq, kütləvi iğtişaşlarla aranı qarışdırmaq, polislə bilərəkdən qarşıdurma yaratmaqla öz antimilli məqsədlərini reallaşdırmaq istəyən müəyyən destruktiv qüvvələrin, o cümlədən Ə.Kərimli və onun tərəfdarlarının hüquqazidd əməllərinin qarşısı bundan sonra da qətiyyətlə alınacaq:
“Bakı polis qarnizonunun bütün şəxsi heyəti paytaxtımızda asayişin, əmin-amanlığın davamlı olması üçün digər hüquq-mühafizə orqanları ilə birlikdə bütün lazımi tədbirləri həyata keçirəcək”.
Milli Şuranın 19 yanvar mitinqi ilə bağlı digər bir diqqət çəkən fikirləri isə ADP sədri Sərdar Cəlaloğlu qəzetimizə müsahibəsində səsləndirib.
Onun sözlərinə görə, 19 yanvar mitinqinin məqsədi rus qoşunlarının 20 Yanvar gecəsi törətdiyi cinayətləri ikinci planda saxlamaq idi və Milli Şuranın keçirdiyi mitinqdə 20 Yanvarla bağlı, rusların əleyhinə bəyanat olmadı: “Qarabağ mitinqi ruspərəstlərin əleyhinədir. Amma Mehman Hüseynova azadlıq tələbi ilə mitinq keçirilməsi onların indiki məqamda, özü də 19 yanvarda maraqlarına uyğundur. Qarabağa azadlıq tələbi ilə mitinq keçirilməsinə qoymurlar, amma 19-da ”Mehmana azadlıq" aksiyasına icazə verilir. Qarabağın azadlığı vacibdir, yoxsa Mehmanın? Mən demirəm ki, Mehman azad olunmasın. Amma sən niyə Qarabağ mitinqini ikinci dərəcəli sayırsan, icazə vermirsən?"
KXCP İdarə Heyətinin üzvü Xəzər Teyyublu isə “Yeni Müsavat”a bildirdi ki, partiyanın mitinqdə səslənən şüarları dəstəkləyən bəyanatı olub, lakin iştirakla bağlı Milli Şuradan onlara heç bir müraciət olmayıb.
Onun sözlərinə görə, 26 yanvar mitinqi ilə bağlı partiya rəhbərliyi ilə müzakirə aparılandan sonra iştirak haqda qərar açıqlana bilər.
X.Teyyublu S.Cəlaloğlunun fikirlərinə münasibət bildirərkən 19 yanvar mitinqinin məhz ruspərəstlərin işi olması iddialarını belə şərh edib: “Bu, Sərdar bəyin fikridir. 19 yanvar mitinqinə Avropa Parlamentinin qətnaməsini yumşaltmaq üçün razılıq verildi.
Ölkədə ümumxalq birliyinə zərurət var. Regionda Qarabağla bağlı Ermənistanın hazırkı durumu siyasi müxalifətin birgə fəaliyyətini zəruri edir. Ölkədə aktiv vətəndaşlar siyasi partiyalarda cəmlənib. Bu düşərgə Azərbaycanda siyasi-sosial rifah naminə birgə addımlamalıdır. Yarımçıq proses cəmiyyətdə inamsızlıq, qorxu yarada bilər. Əgər şimal qonşudan ciddi müdaxilə olarsa, siyasi müxalifət istiqlalın dayanıqlı olması üçün birlik göstərməlidir".
Yeni AXCP-nin sədri Razi Nurullayev isə geniş həcmli məqalə ilə çıxış edərək yazıb ki, Əli Kərimlinin taktikası qısamüddətli və ani nəticələrə xidmət edir: “Bu üsul uzunmüddətli nəticələrə apara bilməz və bunun ən böyük sübutu onun 1988-ci illərin sonlarından mübarizə meydanında olması, hələ də eyni metod və taktikalardan istifadəsidir. Özünəvurğunluq, kütlə qarşısında özünü kral kimi görmə hissi, siyasi çəkisi və şəxsi maraqlarına xidmət edən gedişləri xalqın istəyinə və narazılığına bağlamaq cəhdi”. R.Nurullayev qeyd edib ki, bu siyasətçi uzağı görə bilmir: ”Miopiya (uzağı görməmə xəstəliyi) xəstəliyinə tutulub və çətin ki, sağala. Ona yaxın duranları da bu xəstəliyə yoluxdurur. Xəstələnmək istəməyənlər isə ondan uzaq gəzir.
Bizə mübarizə lazımdır. Lazımdır ki, 50 min, 100 min adam mitinqə gəlsin. Siyasi mübarizədə mitinq də lazımdır, həbslər də olacaq, məhrumiyyətlər də.
Bundan qaçan da yoxdur. Amma miopiya xəstəliyinə tutulan adam 2011-ci ildə etdiyi səhvləri bu gün də etməkdədir. Hakimiyyəti saxlaya bilmədiniz. İndi gənclərə deyirsiniz ki, itirdiyimiz və ya xəyanətlə verdiyimiz hakimiyyəti bizə qaytarın. Axı sən də dövlət katibi idin. Heçmi məsuliyyət daşımırsan? Necə olur ki, hər daşın altına girib çıxırsan, amma əzilmirsən? Yanan ocağa girirsən, oradan da sağ-salamat çıxırsan.
Sən “Taxt oyunları” serialının Deneris Tarqarieni deyilsən ki, üç əjdaha yumurtası ilə ocağa girib sabahı külün içindən nəinki özün salamat çıxasan, hələ bir yanına üç dənə də əjdaha balası salıb gətirəsən!"
Deputat Musa Quliyev isə sia.az-a bildirib ki, mənasız şüarlarla mitinq keçirməyə ehtiyac yoxdur: “Bakı Şəhər İcra Hakimiyyəti də mitinqi razılaşdırarkən, onun ictimai əhəmiyyətinə baxmalıdır. Əgər hər hansı ciddi şüarla ortaya çıxarlarsa, buyurub mitinqlərini edə bilərlər. Lakin hər dəfə eyni çeynənmiş şüarlar və 90-cı illərdən qalan, kiflənmiş fikirlərlə ortaya çıxıb, özlərini təzədən cəmiyyətə təqdim etmək kimi uğursuz cəhdlərin heç bir mənası yoxdur və müvafiq qurumlar ictimai asayişi pozacaq fəaliyyətə yol verməməlidirlər”.
“Yeni Müsavat”
