“Bir neçə gündür müğənni Nəfəsin “Şahnaz” muğamı oxuyub-oxuya bilməməsi haqda müzakirələr gedir. Biz demirik ki, Nəfəs muğam oxuya bilməz. Adam bir işi görər, sonra danışar. Təyyar Bayramov da deyir ki, qulaq asmışam, Nəfəsin səsi çatır. Bu mövzunu tez-tez gündəmə gətirməklə nə Nəfəs “Şahnaz” muğamı oxuyan deyil, nə də gedib öyrənən deyil. Çünki vaxtı olmayacaq. Yalandan gedib səsi göstərməklə deyil. Əgər bir işi görürsənsə, gətir sübut et ki, öyrəndim və gördüm”.
Bunu Moderator.az-a açıqlamasında əməkdar artist Sevinc Sarıyeva deyib.
O daha sonra əlavə edib:
“Hansısa bir estrada müğənnisi gəlib muğam oxuyursa, muğama müraciət edirsə, bunun nəyi pisdir ki? Muğam bizim ana laylamızdır, kökümüzdür, sərvətimizdir. Düşüblər təkcə “Şahnaz” muğamının üstünə. “Şahnaz”-dan başqa muğam yaxud mahnı yoxdur? Sonra da deyirlər ki, “Şahnaz” muğamını Nəfəs tanıtdı. Həmkarım, istedadlı müğənni Taleh Yəhyayev bununla bağlı verilişlərdən birində çox gözəl sözlər deyib. Onun fikirləri ilə razıyam. “Şahnaz”-ı Nəfəs nə vaxt tanıtdı? Oxudu ki, tanıtsın da? Bu muğamı bizim korifey sənətkarlarımız ifa ediblər. Belə olmaz. Efirə çıxana deyirlər ki, “Şahnaz” muğamı oxu. Bu mövzuya birdəfəlik son qoyulmalıdır. Nəfəs gedib muğamı öyrənsin, gəlib oxusun və biz də efirə çıxıb deyək ki, biz gedirik, qoy o oxusun. Bəyəm Röya, Aygün Kazımova muğam oxumayıb? Onlar da oxuyublar da. Röya birinci konsertində tar, kamança və əlində də qavalla gözəl muğam oxudu. Aygün Kazımova da həmçinin. Amma onlar heç vaxt fəxr etməyiblər ki, biz muğam oxumuşuq. Onlar bunu göstərdilər ki, muğam bizim kökümüzdür və bunu oxuya bilirik. Nəfəs arxı hoppanmamış, bərəkəllah almaq istəyir. Bir arxı hoppan, sonra danış. Muğam azaddır. Kim istəyirsə gəlib öyrənir”.
Əməkdar artist daha sonra “Şahnaz” muğamını ən yaxşı təqdim edən sənətkarlardan danışıb:
“Korifey sənətkarlardan “Şahnaz” muğamının ən gözəl nümunələrini Xan Şuşinski və Sara Qədimova yaradıb. Onların oxuduğu “Şahnaz” tam başqa idi. Təvazökarlıqdan uzaq olmasın, müasir dövrdə bu muğamı ən yaxşı xalq artisti Gülyanaq Məmmədova ilə mən oxumuşam. “Şahnaz”ın bir şöbəsi var- “Şəddi Şahnaz”.. Bu şöbəni ifa edəndə ustadımdan xoş söz eşitmişəm”, - deyə xanəndə bildirib.
