Telekanalda nepotizm, peşəkarlığın sıradan çıxarılması və idarəetmə böhranı ilə bağlı ciddi iddialar gündəmdədir

“Space TV” ətrafında yaranan qalmaqal getdikcə böyüyür. Telekanal daxilindən əldə edilən məlumatlara görə, kanal rəhbəri Vado Korovinin təyinatından sonra uzun illər televiziya sahəsində fəaliyyət göstərən peşəkar əməkdaşların sistemli şəkildə işdən uzaqlaşdırılması prosesi həyata keçirilib.

Mənbələrin Reyting.az-a bildirdiyinə görə, televiziya sektorunda tanınmış və peşəkar fəaliyyəti ilə seçilən Elçin Əlibəyli, Rauf Rəcəbov, Zamirə Dadaşova, Eldəniz Elgün, İman Məcidov, Könül Quliyeva, Turan İbrahimov, Zaur Məmmədov, Kamil Eldaroğlu kimi tanınmış similar, eləcə də xeyli sayda rejissor, redaktor və operatorları Vado Korovin işə başlayan kimi müxtəlif bəhanələrlə vəzifələrindən uzaqlaşdırıb.

Qohumlar rəhbərliyə gətirilib

İddialara görə, peşəkar kadrların yerinə rəhbərin ailə üzvləri və yaxın çevrəsi yerləşdirilib. Telekanalda rəhbər postlara Vado Korovinin kürəkəni, qızı, qızının rəfiqəsi, kürəkəninin qardaşı və yaxın münasibətdə olduğu digər şəxslər təyin olunub.

Mənbələr iddia edir ki, bu şəxslərin bir çoxunun televiziya sahəsində nə təcrübəsi, nə də peşəkar bilikləri var. Buna baxmayaraq, onlar kanalın strateji və idarəedici strukturlarında mühüm postlar tuturlar.

Xəbərlər redaksiyasına təhsil tələbi olmayan təyinat

Narazılıq doğuran son qərarlardan biri isə xəbərlər kimi strateji əhəmiyyət daşıyan redaksiyaya ali təhsili olmadığı bildirilən Pərvin adlı şəxsin baş redaktor təyin edilməsidir. Kanal əməkdaşlarının sözlərinə görə, bu təyinat kollektivdə ciddi narazılıq və etiraz yaradıb. Bir çox əməkdaş bu addımı peşəkarlığa və media prinsiplərinə zidd qərar kimi qiymətləndirir.

Rəhbərin iş yerindən uzaq qaldığı iddia olunur

Məlumata görə, şirkət rəhbərinin iş prosesində aktiv iştirakı demək olar ki, minimum səviyyəyə enib. İddia olunur ki, o, həftə ərzində cəmi iki-üç gün iş yerində görünür, qalan vaxtını isə Badamdar qəsəbəsində yerləşən və ictimaiyyət üçün naməlum olan villada keçirir. İddia olunur ki, rəhbərin işdən faktiki uzaqlaşması şirkətin idarəetmə mexanizmlərində ciddi boşluqlar yaradıb.

Telekanalda faktiki idarəetmə kürəkənə həvalə edilib

İddialara əsasən, telekanalda əsas idarəçilik səlahiyyətləri rəhbərin kürəkəni, icraçı direktor Nəriman Abduləliyevin əlində cəmlənib. Məhz o, struktur və kadr qərarlarından tutmuş efir siyasətinə qədər bir çox mühüm məsələlərə nəzarət edir. Lakin kollektiv daxilindən danışan şəxslər bildirirlər ki, Abduləliyevin televiziya sahəsində kifayət qədər peşəkar təcrübəsi yoxdur və bu səbəbdən onun qəbul etdiyi bir sıra qərarlar əməkdaşlar tərəfindən anlaşılmır və qeyri-peşəkar hesab edilir.

Qərarlar qeyri-peşəkardır - kollektivdən narazılıq səsləri

Mənbələr bildirir ki, son dövrlərdə verilən bəzi qərarlar telekanal daxilində narazılıqları artırıb, peşəkar kadrların proseslərdən uzaqlaşdırılması və idarəetmədə şəxsi münasibətlərin üstün tutulması halları müşahidə olunub. Bu isə kanalın ümumi iş mühitinə və məhsuldarlığına mənfi təsir göstərən əsas amillərdən biri kimi qiymətləndirilir.

Milli kadrlara qarşı qərəz iddiaları

Telekanal daxilində milli kadrlara münasibətlə bağlı da ciddi iddialar səsləndirilir. Məlumat verən şəxslərin sözlərinə görə, Vado Korovinin yerli mütəxəssislərə qarşı qərəzli münasibət bəslədiyi, onları rəhbər vəzifələrdə və strateji mövqelərdə görmək istəmədiyi bildirilir. İddialara əsasən, milli kadrların irəli çəkilməsi əvəzinə onların müxtəlif üsullarla sıxışdırılması və qərarvermə prosesindən kənarda saxlanılması halları müşahidə edilir.

Yoxlamalar davam edir

Xatırladaq ki, bir müddət əvvəl telekanalda maliyyə pozuntuları, idarəetmədə qeyri-şəffaflıq və vəzifə səlahiyyətlərindən sui-istifadə iddiaları ilə bağlı dövlət qurumları tərəfindən genişmiqyaslı yoxlamalara başlanıldığı barədə ölkə KİV-lərində məlumat yayılmışdı.

Müşahidəçilər hesab edir ki, ortaya atılan bu yeni iddialar yoxlamaların nəticələrinə ciddi təsir göstərə və telekanal rəhbərliyində genişmiqyaslı dəyişikliklərə səbəb ola bilər.

Hazırda səsləndirilən bu iddialarla bağlı qarşı tərəfin mövqeyini öyrənmək mümkün olmayıb.

Reyting.az