"Hörmətli Azərbaycan xalqı və əziz tamaşaçılarım, məni sevənlər! Bildiyiniz kimi, Akademik Milli Dram Teatrında və ümumilikdə mədəniyyət sahəsində baş verən problemlərlə bağlı haqq mübarizəsi aparıram. Bu mübarizə çərçivəsində haqq səsimi boğmaq məqsədilə mənə qarşı televiziya kanallarında və mətbuatda “zapret” xarakterli qadağalar tətbiq edilib..." "DİA-AZ" xəbər verir ki, bunu özünün sosial şəbəkə hesabında tanınmış və sevilən sənətçi, əməkdar artist Mehriban Xanlarova qeyd edib.
O daha sonra bildirib: "Qanunvericiliyə əsasən, 30 gün ərzində iş yerimə qayıtmaq hüququm mövcuddur. Lakin faktiki vəziyyət ondan ibarətdir ki, bu hüquqdan istifadə etməyim məqsədli şəkildə əngəllənir. Bu məsələlərdən öncə özüm könüllü şəkildə televiziya verilişlərinə çıxmaqdan imtina etmişdim. Lakin indi tətbiq olunan qadağalar nəticəsində seriallarda çəkilməyim də sual altına düşüb. Beləliklə, çörəyimlə oynanılır. Mətbuatda və saytlarda mənə qarşı olan dəstək yazılarını sildirməklə məşğuldurlar. Əvəzində isə şər-böhtan maşınlarını işə salaraq üzərimə müxtəlif adlar yapışdırmağa çalışırlar. Səsimin Cənab Prezidentə çatmaması üçün əllərindən gələni edirlər.
Mənə qarşı tətbiq olunan bu qadağaların fərqində olaraq, təmiz adımı, ictimai nüfuzumu, 18 yaşımdan etibarən sənətdə illər boyu damla-damla, alın təri ilə sizin qarşınızda qazandığım sevgini qorumaq üçün könüllü şəkildə həm narkoloji, həm də psixoloji testlərdən keçmişəm.
Bu testlərin nəticələrini sizinlə açıq şəkildə bölüşürəm ki, gələcəkdə məni susdurmaq məqsədilə düşmənlərim tərəfindən üzərimə hər hansı şər və böhtan atılacağı təqdirdə, xalqımız bilsin: ALNIM AÇIQDIR!
Və buradan düşmənlərimə demək istəyirəm: əgər gücünüz çatırsa, tamaşaçılarımın qəlbində mənə qarşı olan sevgiyə “zapret” qoyun! O sevgi mənə Allah tərəfindən layiq görülüb. Tamaşaçılarımın ürəyindəki bu məhəbbətə heç bir qadağa keçərli deyil! Məni tamaşaçılarımdan yalnız Allah ayıra bilər! Mənim hər zərrəm Azərbaycan xalqına məxsusdur! Çünki mən XALQIN SƏNƏTKARIYAM! Saçımın telinə belə bir zərər dəyərsə, bunun hesabını ailəmə deyil, xalqımıza verəcəksiniz! Mən Allahıma, Cənab Prezidentimizə, dövlətimizə və xalqımıza güvənirəm! İnanıram ki, Möhtərəm Prezident baş verən hadisələrdən xəbərdar olan kimi lazımi tədbirləri görəcək.
