Əməkdar artist Cabir İmanovun idman zalında vəfatı məşq prosesinin insan sağlamlığına təsiri mövzusunu gündəmə gətirib. Bu xüsusuda müxtəlif fikirlər var.
“Cebheinfo.az” xəbər verir ki, avstraliyalı alimlər fiziki cəhətdən aktiv insanların oturaq həyat tərzi keçirənlərə nisbətən ürək döyüntülərinin gündə orta hesabla 10% daha az olduğunu müəyyən ediblər. Araşdırma “JACC: Advances” jurnalında dərc olunub.
Tədqiqatçılar idmançılar və idmançı olmayanların ürək döyüntülərini müqayisə ediblər. Birincilərin orta ürək döyüntüsü dəqiqədə 68 , ikincilərdə isə dəqiqədə 76 olub. Bu, dəqiqədə 109440 vuruşa qarşı gündə təxminən 97920 vuruş deməkdir. Bu fərq gündə təxminən 11500 döyüntü təşkil edir.
Melburndakı HEART Laboratoriyasının direktoru, professor Tomas La Gerçe deyib:
"Hətta məşq zamanı ürək daha sürətli döyünsə belə, istirahət zamanı ürək döyüntüsü əvvəlki gərginliyi tamamilə kompensasiya edir" .
Ən güclü iştirakçıların istirahət zamanı ürək dərəcəsi dəqiqədə cəmi 40 döyüntü olub. Bu, normal diapazonun demək olar ki, yarısıdır. İstirahət halında daha aşağı ürək döyüntüsü təkcə fitnes göstəricisi deyil, həm də daha yaxşı ürək sağlamlığı və uzunömürlülüyün göstəricisidir.
Alimlər qeyd edirlər ki, müntəzəm idman ürək-damar sistemini gücləndirir, ürək xəstəlikləri riskini azaldır, ömrü uzadır. Bununla belə, maksimum effekt peşəkar səviyyədə deyil, oturaq həyat tərzindən orta aktivliyə keçidlə əldə edilir. Bu, həftədə bir neçə saat idman deməkdir.
