“Hazırda Ermənistanla Azərbaycan arasında sülh müqaviləsi ilə bağlı proseslərdə əvvəlki dinamika müşahidə olunmur. Lakin proses dayanmayıb, sadəcə olaraq daha ehtiyatlı və arxa diplomatiya mərhələsinə keçib”.

Bu sözləri politoloq Turan Rzayev “Referans”-a açıqlamasında deyib.

“Hər iki tərəf üçün kritik olan bəzi məqamlar artıq danışıqlar masasında açıq şəkildə deyil, səssiz kanallar vasitəsilə müzakirə olunur. Bir müddət əvvəl, xüsusilə, aprel-may aylarında danışıqlar kifayət qədər intensiv idi. Siyasi ritorikada da “əldə razılaşma var”, “detallar üzərində işlənir” kimi ifadələrə tez-tez rast gəlirdik. Bu da ictimaiyyətdə ümid doğururdu ki, yaxın müddətdə sülh sazişi imzalana bilər. Lakin qeyd etmək lazımdır ki, belə sənədlər bir tək siyasi iradə ilə deyil, həm də geosiyasi konfiqurasiyanın uyğunluğu ilə imzalanır. Ermənistan tərəfi hələ də daxildə müəyyən müqavimətlə qarşılaşır. Sülh müqaviləsi imzalanacağı halda Paşinyanın siyasi mövqeyi zəifləyə bilər. Bu səbəbdən, prosesin yubanması bir qədər də İrəvanın ehtiyatlı davranışı ilə bağlıdır”.

Politoloq qeyd edib ki, yaxın müddətdə sülh müqaviləsinin imzalanması ehtimalı hələ də aktualdır.

“Azərbaycan tərəfi üçün isə bu məsələ artıq yekun mərhələyə qədəm qoyub. Bakı prinsipial məsələləri Qarabağda separatizmin tam bitməsi, ərazi bütövlüyünün tanınması və sərhədlərin delimitasiyası ətrafında öz şərtlərini konkret şəkildə ortaya qoyub. Yəni, Azərbaycan bu danışıqlara "bitmiş məsələ" kontekstindən baxır. Bu səbəbdən, hər hansı güzəştə gedəcəyi real görünmür. Nəticə olaraq deyə bilərəm ki, yaxın müddətdə sülh müqaviləsinin imzalanması ehtimalı hələ də aktualdır. Amma bu, sürpriz şəraitdə və ehtimal ki, arxa diplomatiya nəticəsində birdən-birə baş verəcək. Yəni, prosesin kənardan “stabillik” kimi görünməsi arxada heç nə baş vermədiyi anlamına gəlmir. Əksinə, ən mühüm danışıqlar məhz səssiz mərhələdə həyata keçirilir”.