Sabirabad rayonunda 1986-cı il təvəllüdlü Əkbər həmkəndlisi Səbinəyə (adlar şərti verilib – red.) qarşı seksual hərəkətlər edib.

Hadisə 2023-cü il yanvarın müxtəlif günlərində rayonun kəndlərindən birində baş verib.

Əkbər cinsi ehtirasını təmin etmək məqsədi ilə həmin il yanvarın 25-də saat 19 radələrində Səbinənin yaşadığı evin həyətinə gəlib. Onun həyətdə ayaqyolunda olduğunu bilib, qapını itələyərək ora daxil olub. Qadının qollarından tutub, onunla cinsi əlaqədə olmaq istədiyini bildirib. İmtina ilə qarşılaşdıqda zor tətbiq edib.

Səbinə Əkbərin istəyinə qarşı çıxıb, müqavimət göstərərək əli ilə onu sinəsindən geri itələyib, özündən kənarlaşdırıb. Qadın çölə çıxıb və oradan qaçmaq istəyib. Əkbər zərərçəkmiş onun qollarından tutub və ayaqyolunun arxa tərəfinə doğru aparmağa çalışıb.

Səbinə qışqıraraq səs-küy salıb, onun əlindən çıxıb. Qadının qaçması səbəbindən Əkbər bu niyyətini başa çatdıra bilməyib.

Əkbər həmin il yanvarın 27-də saat 19 radələrində yenə Səbinənin yaşadığı evin həyətinə gəlib. Qadının həyətdəki hamamda duş qəbul etdiyini bilib. Hamamın qapısını itələyərək içəri girib, cinsi əlaqədə olmaq üçün gəldiyini bildirib. Səbinə onun bu istəyinə qarşı çıxıb və müqavimət göstərib. Əkbər cinayət başında yaxalanacağından qorxub və həyətdən uzaqlaşıb.

Əkbər yanvarın 29-da saat 19 radələrində də Səbinənin yaşadığı evin həyətinə gəlib. Səbinənin hamamda olduğunu bilib, qapının arxasına dayaq kimi mişar daşı qoyulmasına baxmayaraq oranı açmaq qərarına gəlib. Qapını itələyərək açıb və Səbinə ilə cinsi əlaqədə olmaq istədiyini deyib.

Qadın onun istəyinə qarşı çıxıb. Əkbər Səbinəni zərərsizləşdirməklə özünə tabe etmək məqsədi ilə qollarından tutub, ona müxtəlif dərəcəli xəsarətlər yetirib. Daha sonra Səbinəni özünə tərəf çəkib, zorlamaya yönəlmiş niyyətini həyata keçirməyə çalışıb.

Səbinə müqavimət göstərərək hamamdan çölə çıxarıb. Qışqıraraq evdə olan oğlu Ramalı və qayınanası Zərrini köməyə çağırıb.

Əkbər tanınmaması üçün həyətdəki elektrik şitindən işıqları söndürüb. Sonra isə qaçaraq oradan uzaqlaşıb.

“Ayaqyolunda, hamamda zorlamağa cəhd etməmişəm”

İstintaq orqanı tərəfindən Əkbərin barəsində Cinayət Məcəlləsinin 29,149.2.5 (təkrar zorlamaya cəhd) və 157.1-ci (Azərbaycan Respublikasının qanunları ilə müəyyən edilmiş əsaslar olmadan, mənzildə yaşayanın iradəsi ziddinə mənzilə daxil olma) maddələri ilə ittiham elan edilib.

İş üzrə ifadə verən Əkbər özünü təqsirli bilməyib. O, ifadəsində göstərib ki, zərərçəkmişi həmkəndlisi kimi tanıyıb, lakin onunla heç bir münasibəti olmayıb:

“Hadisədən bir müddət əvvəl “Tik-tok” sosial şəbəkədə Səbinə ilə tanış oldum, onunla yazışdım. Yazışma vaxtı məndən kontur istədi, razı oldum. Yanvarın 29-da 5 manatlıq kontur aldım və gələrək ona vermək istədim. Lakin onu tapmayıb geri qayıtdım.

Mən Səbinəyə qarşı hər hanası zor tətbiq etməmişəm. O cümlədən onu ayaqyolunda, hamamda zorlamağa cəhd göstərməmişəm”.

Təqsirləndirilən şəxs əlavə edib ki, əvvəlki günlərin birində də həmin həyətə gəlib və konturu Səbinəyə vermək istəyib. Onun sözlərinə görə, həyətdə adamlar olub, buna görə həyətə daxil olmayıb, oradan uzaqlaşıb.

“Cinsi əlaqədə olmaq istədi”

İş üzrə zərərçəkmiş Səbinənin ifadəsinə görə, istər birinci dəfə ayaqyolunda, istərsə də sonrakı iki dəfə hamamda çimərkən təqsirləndirilən şəxs onu zorlamaq məqsədi güdüb:

“Əkbər üç dəfə israrla mənimlə cinsi əlaqədə olmaq istəyib. Hətta sonuncu dəfə hamamda çimərkən mənim hər iki qolumdan tutaraq öpməyə çalışıb. Lakin onu itələyərək hamamın paltar soyunma bölməsinə çıxarmışam və qışqıraraq onu hamamdan qovmuşam. Birinci dəfə ayaqyolundan çıxarkən də Əkbər mənim qolumdan tutub və ayaqyolunun arxa tərəfinə aparmaq istəyib”.

Səbinə ifadəsində Əkbərin hərəkətləri barədə ailə üzvlərinə məlumat vermədiyini deyib. O, bunu biabır olacağından qorxması ilə əsaslandırıb: "2023-cü ilin 25, 27 və 29 yanvar tarixlərdən təxminən 2 ay əvvəl də Əkbər bir neçə dəfə həyətimizə gəlmişdi. Məni şantaj edir, əgər onunla cinsi əlaqədə olmasam, barəmdə ərim Elmana deyəcəyini söyləyirdi.

Əkbərin şantajından qorxaraq onun təkliflər barədə ərimə və digər ailə üzvlərimə məlumat vermədim.

Ekspert rəyində göstərilən xəsarətlər Əkbərin qollarımdan tutaraq özünə tərəf çəkməsi nəticəsində yaranıb”.

“Şübhələndim, amma yoxlamadım”

İş üzrə şahid qismində ifadə verən Elmanın sözlərinə görə, zərərçəkmiş onun keçmiş həyat yoldaşıdır, birgə nikahdan iki uşaqları var: “Mən sonuncu hadisədən bir neçə ay əvvəl Səbinədən şübhələnməyə başladım. Çünki anam mənə gizli şəkildə dedi ki, Səbinə telefona çox baxır.

Arvadımın işlətdiyi telefonun mobil nömrəsi adıma olduğuna görə həmin telefonu rayon mərkəzində yoxlatmaq üçün apardım. Lakin Səbinə yalvararaq nömrəni yoxlatmamağı xahiş etdi. O vaxtlar Səbinəyə ciddi şübhəm olmadığına görə razılaşdım və telefonu yoxlatmadım”.

Elman qeyd edib ki, 2023-cü ilin yanvarın 29-da gecə evə gəlib: “Ailə üzvlərimdən öyrəndim ki, Səbinə hamamda çimərkən kimsə ora daxil olub, əxlaqsız təkliflər edib. Səbinədən həmin şəxsin kim olduğunu soruşsam da, əvvəlcə tanımadığını bildirdi. Məcbur etdikdə onun həmkəndlimiz Əkbər olduğunu söylədi.

Növbəti gün həyətimizdə gizləndim və güdməyə başladım. Naməlum şəxs həyətə daxil oldu. Onun üzərinə getdim, məni gördükdə qaçdı. Bununla belə, onun həmkəndlimiz Əkbər olduğunu bildim”.

“Əxlaqsız hərəkətlərindən şikayət etdik”

Zərərçəkmiş şəxsin ərinin ifadəsinə görə, hadisədən bir-iki gün sonra Səbinəni ilə birlikdə Sabirabad Rayon Polis Şöbəsinə gedib və orada Əkbərin əxlaqsız hərəkətlərindən şikayət ediblər:

“Səbinə şikayət etmək istəməsə də, onu şikayət etməyə məcbur etdim. Səbinədən şikayət etməməsinin səbəbini soruşdum. Rüsvay olacağından qorxduğunu dedi. Polisdə olduğumuz müddətdə Səbinə ekspert müayinəsindən keçdi, onda hər hansı xəsarət aşkar edilmədi.

Hadisədən sonra Səbinəni ətraflı şəkildə sorğuladım. Əkbərin ona xəsarət yetirməsi barədə heç bir şey demədi. Səbinənin görünən bədən səthində xəsarətlər yox idi.

Həmin hadisə vaxtı Səbinə heç bir xəsarət almayıb. Onun qollarındakı xəsarət Səbinə atası evində olarkən alınıb. Bizim iki uşağımızdan biri mənim, digəri isə Səbinənin yanında qalıb. Təxminən 2023-cü ilin fevralın əvvəllərində övladlarım telefonla danışarkən mənə məlumat veriblər ki, Səbinənin qardaşı baş vermiş hadisəyə görə onu döyüb. Bu xəsarətlər yalnız onunla əlaqədar ola bilər”.

“Daha 9 nəfər kənd sakini ilə münasibətdə olub”

Elman deyib ki, Səbinə onun ailəsində yaşadığı müddətdə, yəni hadisədən əvvəl başqa kənd sakinləri ilə də münasibətdə olub: “Onlardan biri həmkəndlimiz İlqardır. Səbinə mənim evimdən qızılları oğurlayaraq İlqara verib. İlqardan şikayətçi olacağımı deyəndə qızılların bir hissəsini qaytardı.

Mənim bildiyimə görə, arvadımın 9 nəfər kənd sakini ilə münasibəti olub. Həmçinin, o, mənim yanımda qalan azyaşlı oğlumun vasitəsi ilə evimi yandırmağa cəhd edib. Bununla bağlı polisdə cinayət işi qaldırılıb və hazırda istintaq aparılır”.

Cəzadan şikayət verilməsinə səbəb nə olub?

Bu cinayət işinə Lənkəran Ağır Cinayətlər Məhkəməsində baxılıb, Əkbər 6 il 9 ay müddətinə azadlıqdan məhrum edilib. Onun cəzasını ümumi rejimli cəzaçəkmə müəssisəsində çəkməsi müəyyən edilib.

Hökmdən narazı qalan təqsirləndirilən şəxsin müdafiəçisi apellyasiya şikayəti verib. O, birinci instansiya məhkəməsinin hökmünün ləğv edilməsini, müvəkkili barəsində bəraət hökmünün çıxarılmasını istəyib.

Müdafiəçi şikayətini belə əsaslandırıb ki, zərərçəkmiş şəxs hüquqlarını müdafiə etdiyi təqsirləndirilən şəxsə sosial şəbəkələrdə yazıb, ondan kontur istəyib: “Təqsirləndirilən şəxs konturu ona aparmaq istəyəndə yolda başqa şəxslər olduğu üçün geri qayıdıb.

Axşam zərərçəkmiş şəxs ona “Tik-tok”dan yazıb və “kişiliyin çatmır bir kontur gətirməyə” deyə irad bildirib.

Təqsirləndirilən şəxs ittiham üzrə nəzərdə tutulmuş əməlin onun tərəfindən törədildiyini inkar edir. İttiham üzrə istintaq orqanı tərəfindən toplanmış sübutlardan, birinci instansiya məhkəməsində həyata keçirilmiş məhkəmə istintaqının nəticələrindən, həmçinin işin faktiki hallarından da görünür ki, elan olunmuş ittiham üzrə onun təqsiri sübuta yetirilməyib”.

Bu şikayət araşdırılması üçün Şirvan Apellyasiya Məhkəməsinə göndərilib. Hakimlər belə qənaətə gəliblər ki, hadisəyə qədər zərərçəkmiş və təqsirləndirilən şəxs bir-birilərini həmkəndli kimi tanıyıb.

Bundan əlavə təqsirləndirilən şəxs zərərçəkmişin ailəsinə gedib-gələn şəxs olub. Daha sonra onlar “Tik-tok” sosial şəbəkəsi üzərindən daha yaxın münasibətə girib və münasibətlərini davam etdiriblər.

Məhkəmə müəyyən edib ki, təqsirləndirilən şəxs fasilələrlə - 2023-cü ilin 25, 27 və 29 yanvar tarixlərində eyni saatda, habelə zərərçəkmişin ayaqyolunda və hamamda olduğu vaxtlarda həyətə gəlib, israrla onunla cinsi əlaqədə olmağı təklif edib.

Lakin hər üç dəfə, xüsusən zərərçəkmişin hamamda çimdiyi vaxtda belə təqsirləndirilən şəxs onun soyunmuş vəziyyətindən istifadə edərək özü soyunmayıb, zərərçəkmişə cinsi təcavüz etməyib. Yalnız israrla onunla cinsi əlaqədə olmağı tələb edib.

Bu halları araşdıran hakimlər heyəti sonda qərar elan ediblər. Birinci instansiya məhkəməsinin hökmü dəyişdirilib və təqsirləndirilən şəxsin barəsində yeni ittihamedici hökm çıxarılıb.

Təqsirləndirilən şəxsin əməli Cinayət Məcəlləsinin 29,149.2.5-ci maddəsindən həmin məcəllənin 151-ci (seksual xarakterli hərəkətlərə məcbur etmə) maddəsinə tövsif edilib. O, həmin maddə ilə nəzərdə tutulmuş cinayəti törətməkdə təqsirli bilinib və 3 il müddətə azadlıqdan məhrum edilib.

Bundan başqa, Cinayət-Prosessual Məcəlləsinin 44.2.1-ci maddəsinə əsasən cinayət məsuliyyətinə cəlbetmə müddəti keçdiyinə görə təqsirləndirilən şəxsə Cinayət Məcəlləsinin 157.1 və 66.3-cü maddələri ilə cinayətlərin məcmusu üzrə cəza təyin edilməsinə dair müddəalar hökmdən xaric edilib.

Teleqraf