Ermənistanın baş naziri Nikol Paşinyan eks-prezident Levon Ter-Petrosyanı keçmiş SSRİ Dövlət Təhlükəsizliyi Komitəsinin (DTK” agenti adlandırıb.
Modern.az-ın məlumatına görə, Paşinyan bildirib ki, o vaxt mətbuatda bunu sübut edən yazılar dərc olunub.
“SSRİ DTK-sı ilə əməkdaşlıq etmiş bir şəxs olmaqla 90-cı illərin əvvəllərində Ermənistanın labüd müstəqilliyi prosesini onun strateji imkansızlığı yolu ilə şüurlu şəkildə aparıb. O, Ermənistanın müstəqilliyinin ilk illərindən onu oyuncaq dövlətə çevirdi.
Daxili idarəetmə sferasında daim hökumətin iki xarizmatik nümayəndəsi - müdafiə naziri Vazgen Sarkisyan və daxili işlər naziri Vano Siradeqyanın kölgəsində qalaraq, onlarla qarşıdurma strategiyası seçdi. Ter-Petrosyan Ermənistanda "parçala və hökm sür" formulunu həyata keçirib.
Bu yanaşmanın əsas məqsədi suverenlik və müstəqillik tərəfdarları Vano Siradeqyan və Vazgen Sarkisyanı hakimiyyətin mümkün varisləri kimi neytrallaşdırmaq və onların müttəfiqliyinə mane olmaq idi. Bu məqsədlə o, Ermənistan Respublikasının daxili siyasi həyatına marionet xəttinin davamçıları olan Robertv Köçəryan və Serj Sarkisyanı daxil etdi.
O, geosiyasi proseslərin mürəkkəb dönəmində, əsasən şəxsi qorxu və məsuliyyətsizliyi rəhbər tutaraq, marionet dövlət strategiyasının davam etdirilməsinin qarantiyası kimi özündən sonra ölkədə qeyri-legitim hökumətin formalaşacağına zəmanət verərək, prezident postundan istefa verdi.
2007-ci ildən sonra o, Sarkisyana və Köçəryana sadiq müxalifətçi kimi yenidən siyasi fəaliyyətə başladı. Yenidən siyasi fəaliyyətə başlamaqda əsas məqsəd Ermənistanın marionet dövlət xəttindən sapmasının qarşısını almaq idi. Onun əsas təminatı bu idi ki, həm müxalifət, həm də iqtidar liderləri həmin xəttin sadiq davamçıları olsunlar.
2008-ci il 1 mart hadisələri zamanı o, evdən çıxmağa cəsarət etməyib. Ter-Petrosyan həmin gün ona baş çəkən Ktrij Nersisyanı (II Qaregin) malikanənin qapısından içəri buraxmayıb. O, martın 2-nə keçən gecə Ermənistanın marionet strategiyasının davam etdirilməsini təminatlı hesab edərək dinc yatıb.
Ter-Petrosyanın əsas xüsusiyyətləri - qorxaq, zəif iradəli, məsuliyyətsiz, marionet meyilli olmaqdır. O, tənbəl, böhtançı, qeybətçi, narsist, təkəbbürlüdür. İstənilən şəxslə əlaqəni həmin şəxsə qarşı istifadə edir. İnsanlara nifrət edir. O, ətrafındakı hər hansı xarizma işarəsi olan insanlara ikrahla yanaşır. O, simasız, onurğasız, laqeyd, yarısavadlı və Vano Siradeqyanın dediyi kimi, “çox oxuyub, az başa düşən” insanların mühitində özünü xoşbəxt hiss edir”, - deyə Paşinyan Levon Ter-Petrosyan haqqında bildirib.
