Yay hücumu çərçivəsində Rusiya qoşunları üç illik müharibədə ilk dəfə Ukraynanın Dnepropetrovsk vilayətinin sərhədini keçib ki, bu da hərbi əməliyyatların dinamikasının dəyişdiyini göstərir.
Reyting.az xəbər verir ki, bu barədə “New York Times” nəşri yazıb.
Ərazidə döyüşən ukraynalı zabitlərin nəşrə verdikləri məlumata görə, rus əsgərlərinin kiçik bölmələri ötən həftənin sonunda Donetsk vilayətindən Dnepropetrovsk vilayətinə keçməyə başlayıblar.
Vaşinqtonda yerləşən Müharibə Araşdırmaları İnstitutunun tərtib etdiyi xəritə də göstərir ki, Rusiya qüvvələri bölgədə möhkəmlənir.
Nəşrin yazdığına görə, hərbi analitiklər və Ukrayna əsgərləri deyirlər ki, hücum həm simvolikdir, həm də yeni bölgəni işğal etməklə Ukraynanın mənəviyyatını sarsıtmaq istəyirlər.
Hazırda Rusiyanın Dnepropetrovskdakı hücumlarına qarşı mübarizə aparan Ukraynanın 72-ci briqadasının “Barbarossa” çağırış işarəsi olan zabiti bildirib ki, Rusiya bölgədə çox güclənib və onların daha da möhkəmələnəcəyini gözləyir.
Ukraynalı zabitlərin sözlərinə görə, Rusiya qüvvələri Dnepropetrovsk istiqamətində ən çox bir neçə xətt üzrə irəliləyib və hələlik heç bir şəhəri ələ keçirməyib. Qəzet yazır ki, ruslar irəliləyişlərini möhkəmləndirə, əldə edilən nailiyyətdən istifadə edə və regiona daha da dərinləşə bilərlər.
Nəşr xəbərdarlıq edir ki, əgər Rusiya Dnepropetrovsk vilayətinin əhəmiyyətli hissələrini ələ keçirsə, bu, istənilən ərazi mübadiləsi danışıqlarında Ukraynanın mövqeyini çətinləşdirəcək.