Rusiyanın Sankt-Peterburq şəhərinin Krasnoqvardeyski rayonunda azərbaycanlı kişi tanışını bıçaqlayıb.
Lent.az yerli mediaya istinadla bildirir ki, hadisə Puqaçov küçəsindəki yataqxanada baş verib. Zəng edən şəxs dava barədə xəbər verib və dörd iştirakçı olduğunu bildirib. Hadisə yerinə gələn mülki mühafizə əməkdaşları həyətdə iki nəfəri aşkarlayıblar. Onlardan biri tibbi yardım üçün təhvil verilib, digəri isə araşdırma aparılması üçün şöbəyə aparılıb.
Polis şöbəsində saxlanılan şəxsin 45 yaşlı Azərbaycan vətəndaşı olduğu müəyyən edilib. Məlum olub ki, onu artıq Pskov polisi də axtarır. O, hərbi xidməti özbaşına tərk etmə işi üzrə şübhəli şəxs qismində axtarışda imiş. Hərbi hissədə onun yoxluğu 2024-cü ilin sonunda müəyyən edilib, yazın əvvəlində isə rəsmi şəkildə axtarışa verilib.
İlkin məlumata görə, azərbaycanlı Sankt-Peterburqda Puqaçov küçəsində yerləşən yataqxanada yaşayırmış. Elə orada 31 yaşlı qonşusu ilə birlikdə içki içib. Aralarında baş verən mübahisə isə bıçaq zərbəsi ilə nəticələnib. Yaralanan şəxs çiyin nahiyəsindən deşici-kəsici xəsarətlə Aleksandrov xəstəxanasına çatdırılıb və ağır vəziyyətdə şok şöbəsinə yerləşdirilib.
Azərbaycanlıya hələlik xırda xuliqanlıqla bağlı protokol tərtib olunub.
