Əzim Nağdəliyevin həkimləri günahı 7 saylı Birləşmiş Şəhər Xəstəxanasının üstünə atır
Məlum olduğu kimi yanvarın 9-da Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2013-cü ilin sosial-iqtisadi inkişafının yekunlarına və 2014-cü ildə qarşıda duran vəzifələrə həsr olunmuş iclası keçirilib. Həmin iclasda çıxış edən səhiyyə naziri Oqtay Şirəliyev 2013-cü ilin ölkə səhiyyəsi üçün uğurlu olduğunu, prezident İlham Əliyevin Azərbaycan səhiyyəsinin maddi-texniki bazasının gücləndirilməsinə böyük diqqət göstərdiyini, bunun nəticəsində ölkəmizdə yüksək texnologiyalarla təchiz olunan tibb mərkəzlərinin yaradılmasının geniş vüsət aldığını vurğulayıb. Nazirin sözlərinə görə, son illərdə istifadəyə verilən 500-dən artıq səhiyyə müəssisəsinin 70 faizi regionların payına düşür: “İndi Azərbaycanın bütün bölgələrində müasir, yaraşıqlı tibb mərkəzləri fəaliyyət göstərir. Onların hər birində keyfiyyətli tibbi xidmət üçün hər cür şərait və təchizat vardır. Bu gün nəinki Bakıda, hətta bölgələrimizdə ən mürəkkəb cərrahiyyə əməliyyatları həyata keçirilir. Regionların inkişafını yerlərdə əhali də yüksək qiymətləndirir. Ötən il ölkə başçısının göstərişi ilə müxtəlif rayonlarda keçirilən səyyar qəbullar zamanı yüzlərlə vətəndaşla görüşlər olub. Orada müraciət edən insanların problemlərinin operativ həlli ilə yanaşı, hər kəs bölgələrdə yaradılan şəraitdən, müayinə və müalicə imkanlarından razılıq edirdi. Həyata keçirilən sosial yönümlü siyasətin nəticələri tibbi-demoqrafik göstəricilərdə də öz əksini tapır. Doğum göstəricisi 13,9-dan 18,6-ya qalxmış, ölüm göstəricisi isə 6-dan 5,9-a düşmüşdür. Təbii artım 7,9-dan 12,7-dək yüksəlmişdir ki, bu da Avropa ölkələri arasında ən yüksək göstəricidir”. Təbii ki, səhiyyə nazirinin təqdim etdiyi rəqəm və göstəricilər kifayət qədər nikbinlik üçün əsas verir. Lakin bu da bir həqiqətdir ki, tibb müəssisələrimizin dövlət qayğısı sayəsində ən yeni texnoloji cihaz və avadanlıqlarla təshiz olunması, hələ bu sahədə əhaliyə müvafiq yüksək səviyyəli xidmətlərin göstərilməsi anlamına gəlmir. Məsələ bundadır ki, bir çox hallarda alınan müasir avadanlıqların peşəkar istismarı yerlərdə tibbi personal tərəfindən təmin oluna bilmir. Nəticədə isə bu yüksək texnologiya nümunələri tibb müəssisələrinə müraciət edən xəstələrə adi hərarət ölçən cihazdan da az fayda vermiş olurlar. Digər tərəfdən isə respublikamızda fəaliyyət göstərən bir çox səhiyyə müəssisələrində çalışan tibbi personalın, həkimlərin peşəkar hazırlıq səviyyəsinin aşağı olması göstərilən ənənəvi tibbi xidmətlərin keyfiyyətinə də neqativ təsir göstərir. Tibb müəssisələrində baş alıb gedən rüşvət yığımı hərisliyi isə bəzənhətta fatal nəticələrə belə səbəb olur. Məhz bu xüsusda bu gün respublikanın müxtəlif doğum evlərində və şöbələrində cərəyan edən proseslər də diqqəti cəlb edir. Qeyd etmək lazımdır ki, səhiyyə naziri sözügedən iclasda çıxışı zamanı ölkəmizdə ana və uşaq ölümü ilə bağlı mövcud statistik göstəriciləri də diqqət mərkəzinə çəkmiş, bu sahədə göstəricilərin azalma tendensiyasını xüsusi olaraq vurğulamışdır. Onun sözlərinə görə, bu gün ölkəmizdə ana və uşaq sağlamlığı sahəsində müsbət dinamikamüşahidə olunmaqdadır. Belə ki, 2006-cı ildə ana ölümü əmsalı 34,2 idisə, 2013-cü ildə bu rəqəm 14,5-ə enib. Uşaq ölümü üzrə göstərici əmsalı isə 16,2 promillidən 13-dək aşağı düşüb. Əlbəttə ki, bizim bu rəqəmləri qətiyyən şübhə altına almaq niyyətimiz yoxdur. Lakin nəzərə almaq vacibdir ki, qeyd olunan “13 promilli” anlayışının arxasında əslində neçə-neçə ailənin faciəsi durur. Və ən azından səhiyyə naziri öz hesabatında konkret say göstəricilərinə müraciət etmiş olsaydı, bu həm ölkə rəhbərliyinin, həm də ictimaiyyətin obyektiv məlumatlandırılması baxımından daha münasib olardı.
Təəssüflər olsun ki, kütləvi informasiya vasitələrinə təqdim olunan məlumatlardan bir çox hallarda Səhiyyə Nazirliyinin özünün də ölüm faktları barədə müvafiq tibb müəssisələri tərəfindən dürüst məlumatlandırılmadığı qənaətinə gəlmək olur. Bu xüsusda redaksiyamıza yeni daxil olmuş məlumatda Bakı şəhəri, Maştağa qəsəbəsində yerləşən 7 saylı Birləşmiş Şəhər Xəstəxanasının doğum şöbəsində ötən ilin dekabr ayında dünyaya gəlmiş körpənin müəmmalı ölümü ilə bağlı açıqlamalar diqqəti cəlb edir. Öncədən qeyd edək ki, redaksiyamıza, məlumatlarda qeyd olunmuş faktları təsdiq edən müvafiq sənədlərin surəti də təqdim olunmuşdur. Beləliklə, məlumata əsasən ötən ilin dekabr ayında 7 saylı Birləşmiş Şəhər Xəstəxanasının doğum şöbəsinə (şöbənin müdiri həkim Səadət xanımdır) gətirilən hamilə qadın, ayın 8-də elə bu müəssisədəcə bir övlad dünyaya gətirmişdir. Doğuşu qəbul edən həkim Tamilla xanım, uşağın səhətinə nəzarət edən həkim-pediatr isə Vəfa xanım olmuşlar. Doğuşdan az müddət sonra uşağın vəziyyətində pisləşmə müşahidə olunmağa başlayıb. Şöbənin həkimləri tərəfindən hansı tədbirlərin görüldüyü barədə dəqiq məlumatımız olmasa da, mənbənin dediyinə görə 12 dekabr tarixində uşağın vəziyyətinin daha da pisləşməsi səbəbindən onu 7 saylı Birləşmiş Şəhər Xəstəxanasında Respublika Perinatal Mərkəzinə göndərirlər. Artıq dekabrın 13-də isə körpənin xəstəliyi ölümlə nəticələnir. Əlbəttə ki, bu halın özü artıq kifayət qədər böyük bir faciədir. Lakin hər iki tibb müəssisəsinin həkimləri tərəfindən bu hadisədən sonra nümayiş etdirilən mövqey olayın daha da dramatikləşməsinə yol açır. Belə ki, baş vermiş ölüm halına görə məsuliyyəti heç bir tərəf üzrinə götürmək istəmir. Baş həkim Əzim Nağdəliyevin rəhbərlik etdiyi Perinatal Mərkəzdə iddia edirlər ki, uşaq buraya gətirilərkən artıq onun xilası üçün heç bir şans qalmamışdı. Başqa sözlə desək, Perinatal Mərkəzin həkimləri 7 saylı Birləşmiş Şəhər Xəstəxanasında olan həmkarlarını dolayısı ilə qeyri-peşəkarlıqda, eləcə də uşağın mərkəzə köçürülməsində yol verdikləri gecikmədə itiham edirlər. Öz növbələrində 7 saylı xəstəxananın həkimləri isə bu ittihamları qətiyyətlə rədd edirlər. Belə ki, bizimlə olan telefon danışığı zamanı xəstəxananın baş həkimi israrla bildirmişdir ki, Perinatal Mərkəzə köçürülmə zamanı uşağın vəziyyəti ağır olsa da stabil idi və qətiyyən kritik hal kimi qiymətləndirilə bilməzdi. Təbii ki, tərəflərdən hansının baş vermiş hadisəyə görə daha çox məsuliyyət daşımalı olduğunu yalnız peşəkar mütəxəssilər müəyyən edə bilərlər. Lakin bu arada belə bir məqama da diqqət etmək lazımdır ki, Respublika Perinatal Mərkəzi məhz səhiyyə naziri Oqtay Şirəliyevin iki gün öncə keçirilmiş iclasdakı çıxışında xatırlatdığı, Prezident İlham Əliyevin tapşırığına əsasən qəbul olunmuş “Ana və uşaqların sağlamlığının qorunmasına dair tədbirlər Proqramı”na müvafiq olaraq paytaxtda yaradılmış tibb müəssisələrindən biridir.
Son olaraq bir məqama da xüsusi diqqət yönəltmək istəyirik ki, məlumatları təqdim edən mənbə baş vermiş ölüm hadisəsi barədə nə 7 saylı Birləşmiş Şəhər Xəstəxanası, nə də Respublika Perinatal Mərkəzi tərəfindən hələ də Səhiyyə Nazirliyinə və hüquq-mühafizə orqanlarına məlumat verilmədiyini iddia edir...
