"Kənd Təsərrüfatı Nazirliyi də süni intellekt tətbiq edəcək. Aqrar sektorun rəqəmsal transformasiya modelini McKinsey & Company hazırlayacaq. Süni intellekt əsaslı modellər hazırlayan qurumlarımıza daha birisi əlavə olunub. Kənd Təsərrüfatı Nazirliyimiz də süni intellekt əsaslı həllər hazırlamağı hədəfləyib".

Mia.az xəbər verir ki, bu barədə Azərbaycan İnternet Forumunun prezidenti Osman Gündüz sosial media hesabında yazıb.

Onun sözlərinə görə, nazirlik McKinsey & Company (Azerbaıjan) şirkətiylə 10 milyon manat dəyərində satınalma müqaviləsi imzalayıb. Müqavilə bir mənbədən satınalma metodu əsasında imzalanıb:

"Layihə haqqında geniş məlumat verilməyib. Bildiyim qədər Nazirlik süni intellekt modelləri əsasında kənd təsərrüfatı məhsullarının, bütövlükdə aqrar sektorun inkişafının proqnozlaşdırılması sistemini hazırlamağı hədəfləyib.

Düşünmək olar ki, süni intellektlə Yerin müşahidəsi peyklərinin çəkdiyi görüntüləri analiz edərək kənd təsərrüfatı sahələrində məhsul vəziyyətini və gözlənilən məhsuldarlığı təyin etmək, monitorinqlər aparmaq, iqlim dəyişikliklərini nəzərə alaraq məhsuldarlıq proqnozlaşdırmaq, Aİ modellər hazırlamaq və s. nəzərdə tutulub".

Maraqlıdır, yetərli data olmadığı bir halda, bu tip modellər necə yaradılacaq?

Osman Gündüz təəssüflə bildirib ki, layihə haqqında heç bir əlavə məlumat tapmaq mümkün deyil: "Görünür ki, ölkədə süni intellektin inkişafına cavabdeh olan qurumların da bu layihə haqqında məıumatları yoxdur. Onların da açıqlamalarda bu haqda heç bir məlumata rast gəlmək mümkün deyil. Yeri gəlmişkən, hazırda diqqət cəlb edən məsələlərdən birisi odur ki süni intellekt sahəsində layihələrin reallaşmasında koordinasiya yox dərəcəsindədir".

Ekspert əlavə edib ki, ölkəmizdə İqtisadiyyat Nazirliyi tərəfindən süni intellekt ekosistemin inkişafı üçün böyük bir Superkompüter Mərkəzi qurulur: "Hamının bəhrələnməsi nəzərdə tutulub. Amma hamının, maraqlı tərəflərin, startap və innovasiya ekosistemin, elm və təhsil sektorunun, biznes və dövlət qurumlarının bu infrastrukturdan istifadəsini təşkil edəcək mexanizmlər, kordinasiya hələlik gözə dəymir. Superkompüter Mərkəzindən hamının effektiv istifadəsi üçün indidən münbit şərait yaradılması vacibdir.

Ümumiyyətlə, Kənd Təsəsrrüfatı Nazirliyində əvvəllər daha çox ictimai müzakirələr təşkil olunardı, maraqlı tərəflər cəlb olunardı və rəqəmsal transformasiya məsələləri müzakirə olunardı . Təsəvvür edin ki, rəqəmsal tarnsformasiya ilə əlaqəli 10 milyonluq bir layihə icra olunur, amma heç yerdə bu haqda məlumat yoxdur.

Mövcud rəqəmsal kənd təsərrüfatı sistemi də elə çoxdan qurulandır, elə bir yenilənmə aparılmayıb".