"Zəngəzur dəhlizi faktiki olaraq, təkcə Azərbaycanın problemi deyil, Asiya və Avropanı əlaqələndirən ən effektli layihəllərdən biridir".
Bu sözləri Sitat.info-ya açıqlamasında ADP sədri Sərdar Cəlaloğlu deyib.
O bildirib ki, bu problem Amerika da daxil olmaqla, dünyanın əksər ölkələrinin maraq dairəsindədir: "Hər biri istəyir ki, Zəngəzur dəhlizi tezliklə təhlükəsiz şəkildə açılsın, Asiya və Avropa arasında daha qısa və effektiv iqtisadi kanal yaradılsın. Ona görə də biz Zəngəzur dəhlizinin açılmasını istəməsək belə, daha böyük qüvvələr açılmanı təmin edəcəklər. Bizə isə ikiqat xeyir edir. Həm Avropa- Asiya kommunikasiyasının ərazimizdən keçəcək, həm də Türkiyə və Naxçıvan əlaqələri yüksək səviyyədə genişlənəcək. Bütün bunlara görə biz daha çox maraqlıyıq, Amma, unutmaq olmaz ki, Zəngəzur dəhlizi məsələsi, beynəlxalq layihə olduğuna görə, bütün ağırlığı Azərbaycanın üstünə salmaq olmaz. Azərbaycan böyük ölkələrin maraqlarını aydın şəkildə ifadə edib, onları bu proseslərə qoşmalıdır”.
S.Cəlaloğlu vurğulayıb ki, Ermənistanla Azərbaycan arasında yenidən iriçaplı müharibə gözlənilmir: Gərginlik yaranacağı təqdirdə danışıqlar müstəvisində həll olunacaq. Əvvəlki dövrlərdə münasibətlərin hərb yolu ilə həll olunmasının əsas səbəbi, torpaqlarımızın işğal altında olması idi. İndi əlaqələrin açılması beynəlxalq hüququn dispozitiv normalarına aiddir. Ermənistan hazırda həm Azərbaycanla iqtisadi əməkdaşlıq edə bilər, həm də başqa ölkə ilə əlaqələrini gücləndirə bilər. Burada heç bir imperativ norma yoxdur. Əsas imperativ norma təhlükəsizlik məsələləri ilə bağlıdır. Burada da üç norma mövcuddur - beynəlxalq münasibətlərə güc tətbiq edilməsindən imtina, sərhədlərin zorakı dəyişdirilməsindən imtina və daxili işlərə qarışmamaq”.
Partiya sədri qeyd edib ki, indiki halda Zəngəzur dəhlizi məsələsinə bu kontekstdən yanaşılmalıdır: "Ermənistan Azərbaycanla əlaqələri gücləndirib, iqtisadi, ticari əməkdaşlıqlar aparmaq istəyirsə, könüllü şəkildə bu yolu açmalıdır. Əslinə baxsaq, Ermənistan da yolun açılmasını inkar etmir, sadəcə olaraq yolun mühafizəsinin kimdə olacağı məsələsi ortaya çıxır. İndiyə qədər belə bir məsələ var idi ki, Rusiya təminatçı olsun. Azərbaycan da bu məsələdə Rusiyanın təzyiqi ilə çox ciddi mövqe ortalığa qoymuşdu ki, mütləq şəkildə nəzarət Rusiyada olmalıdır. Ermənistan ya özü nəzarət etmək istəyir, ya da Rusiyadan fərqli qüvvələrin nəzarətini istəyir. Son vaxtlar təyyarə qəzasından sonra Azərbaycanla Rusiya arasında kifayət qədər gərginlik yaranıb. Azərbaycan indiyə qədər Rusiyanın xeyri naminə hətta öz xeyirlərindən də imtina edib. Artıq bu siyasətdən imtina edəcək, Eləcə də, Amerika vəAvropa ilə qarşıdurma siyasətindən imtina edəcək. Bu isə Zəngəzur dəhlizi məsələsinin həll olunması prosesini sürətləndirəcək”.
