Xəbər verdiyimiz kimi, Moskvanın mərkəzində saxlanılan Ermənistanın keçmiş müdafiə naziri Arşak Karapetyanın beynəlxalq axtarışda olmasına baxmayaraq, Rusiya onu İrəvana təhvil verməyib, heç yerə getməmək barədə iltizam alaraq polisdən buraxıb.
Ermənistan Daxili İşlər Nazirliyinin mətbuat katibi Narek Sərkisyan Karapetyanın həbsdən buraxılnasını təsdiq edib. Yada salıb ki, Karapetyan biznes fəaliyyətində qanunsuz iştirakda, vəzifə səlahiyyətlərindən sui-istifadədə ittiham olunur və beynəlxalq axtarışa verilib.
Musavat.com yada salır ki, Ermənistanın baş naziri Nikol Paşinyanın Avrasiya İqtisadi İttifaqının toplantısını əvvəl İrəvanda keçirməkdən imtina etmiş, sonra isə Leninqrad vilayətindəki iclasına da kovidə yoluxma bəhanəsilə online qatılmışdı. Rusiya Paşinyanın bu münasibətinə Karapetyanı saxlayıb, sonra azad etməklə cavab verdiyini iddia edənlər də var.
Hələ 2016-cı ilin aprel döyüşləri zamanı Ermənistan ordusunda kəşfiyyat fəlaiyyətinə cavabdeh olan, sonra Baş Qərargah rəisinin müavini və daha sonra isə Ermənistan müdafiə naziri olmuş Arşak Karapetyanın Rusiyaya bağlı bir fiqur olduğu heç kimə sirr deyil. Elə Paşinyan da 2018-ci ildə hakimiyyətə gəldikdən sonra Karapetyanı özünə müşavir təyin etməklə və daha sonra 2021-ci ildə müdafiə naziri təyin etməklə əslində Rusiyadan olan təzyiqləri yumşaltmaq məqsədi güdürdü. Karapetyan daha sonralar bu təyinat haqda danışarkən maraqlı məlumatlar açıqlamışdı. “2021-ci ildə mən müdafiə naziri təyin olunanda Rusiya Federasiyasının müdafiə naziri ilə razılıq əldə etdik. Həmin razılığa əsasən, Rusiyanın müxtəlif akademiyalarından 40 yüksək rütbəli general, zabit və hərbi sahənin professoru Ermənistana gəldi. Onlar bilikli, təcrübəli zabitlər və generallar idi. Bu ekspertlərlə birlikdə bir sənəd hazırladıq. Sənəddə gələcək təhlükəsizlik sistemimizdən bəhs edilirdi. Bundan sonra biz Rusiya Federasiyasının müdafiə naziri ilə görüşəndə ona bu dəstəyə görə təşəkkür etdim. Dedim ki, sizin işiniz bununla bitmir, indi zəhmət olmasa, mütəxəssislər göndərin ki, sənədi həyata keçirək. Bizdə Ermənistana gəlib 3 il Ermənistan ordusunda işləməli olan 80-ə yaxın zabitin siyahısı var idi”,-deyə Karapetyan bildirmişdi.
Erməni generalın sözlərinə görə, sözügedən sənəddə Ermənistan ordusuna verilməli olan silah və silahlar da göstərilib və onların təminatının bir hissəsini Rusiya tərəfi öz üzərinə götürmüşdü. “Bütün bunları həyata keçirsəydik, Qarabağı çətin ki, itirərdik və bu günkü kimi sərhəddən kənara qorxu ilə baxmazdıq. “Mən Paşinyana dedim ki, mənə 3 il sülh lazımdır. Eyni sözü Qarabağa səfərim zamanı Arayik Arutyunyana da dedim”, - deyə Karapetyan söyləyib.
Vəzifəsindən uzaqlaşdırdıqdan sonra Karapetyan Paşinyan və komandasının həm daxili, həm də xarici siyasətini kəskin tənqid edirdi. 2023-cü il oktyabrın əvvəlində fəal siyasətə gəldiyini bəyan edən A.Karapetyan həmin il dekabrın 14-də Moskvadan canlı yayımla “Ümumerməni cəbhəsi”nin yaradıldığını elan etmişdi. Karapetyan aprelin 5-də İrəvanda “Ümumerməni Cəbhəsi Partiyası”nın təsis qurultayını keçirmişdi. Onun rəhbərliyi ilə "Ümumerməni cəbhəsi" hərəkatına Serj Sərkisyan və Robert Köçəryana yaxın olan partiyalar və qeyri-hökumət təşkilatları bu hərəkata qatılmışdılar. Hərəkat bir neçə aksiya da keçirmiş, amma kütləviliyə nail ola bilməmişdi.
