Cəlilabadın Sərhədabad kənd inzibati ərazi dairəsinə aid üç kəndinin sakinləri yollarının bərbad vəziyyətdən şikayətçidirlər.

Onlar deyirlər ki, inzibati əraziyə daxil olan Məşədivəlli, Əliabad və Sərhədabad kəndlərində yaşamaq mümkünsüz hala gəlib.

Sakinlərin sözlərinə görə, 3 kənddə ümumilikdə 600 təsərrüfat var, amma yollar və küçələr baxımsız qalıb.

Sakinlər bildiriblər ki, xüsusilə də məktəblilər yolun təmirsiz vəziyyətindən əziyyət çəkirlər.

Onların dediyinə görə, qışda palçıqdan, yayda tozdan hərəkət etmək olmur. Daş və torpaq qatdan ibarət yol 30 ildir ki, əsaslı təmir edilmir.

“Pul ayrılır, amma qismən çınqılla yola verilir”

Daməddin Sərhədov adlı sakin deyir ki, edilən müraciətlərə də baxılmır:

“Yağış yağan kimi su gölməçələrə toplanır. Üç kəndin bir məktəbi var, o da Sərhədabadda yerləşir. Məktəblə iki kəndin məsafəsi 1 kilometrdən çoxdur. Az hissə daşdır, qalanı torpaqdır. Yolun çala-çuxuru da çoxdur. Yağıntı olan kimi su dolur, hər yer palçıq olur. Kimin maşını var, məktəblini aparır. Kimin yoxdur, sürünür. Məktəbə qədər uşaqların üst geyimləri tanımaz hala düşür”.

Onun sözlərinə görə, yolları əsasən sakinlər öz məhdud imkanları hesabına bir qədər düzəltməyə çalışırlar:

“Harada söküntü var gətirib çala-çuxuru doldururuq. Yağış yağan kimi yenə palçıq olur. 5 il şikayət etdik, sonra məktəb tikdilər. İndi də yol probleminə baxılmır. Eşitdiyimizə görə pul ayrılır, amma qismən çınqılla yola verilir. Hazırda 53 yaşım var. Bu yol isə 15 yaşımda salınıb. Yola əsaslı təmir lazımdır, nə qədər yamamaq, çala-çüxuru doldurmaq olar?”.

“Yol yoxdur, hərəkət də yoxdur”

Kənd sakinləri yolun Məşədivəlli kəndində daha bərbad olduğunu deyirlər. Onlar kəndarası yolların təmiri üçün Sərhədabad bələdiyyəsi və icra nümayəndəliyindən kömək istəsələr də, müsbət cavab ala bilməyiblər:

“Dedilər ki, vəsaitimiz yoxdur. 4-5 ildən bir yolun ən bərbad küçələrinə tökülən çınqıl ehtiyyatı isə kənd sakinlərinin maddi hesabına təşkil olunur”.

Sakin Elman Astanov isə bildirib ki, yolla yanaşı, işsizlik problemi də var:

“Üç kəndin əsas problemi yol və işsizlikdir. İş olsa, kənd sakinləri elə özləri bu yolu təmir edər, hansısa ac məmuru gözləməzlər. Sadəcə, kənd əhalisinin çoxu işsizdir deyə heç özü dolana bilmir. Sovet dövründə çəkilən yoldur. İrili, xırdalı daşlar ayaq əzir. Yay olur, həyətdə, evimizdə əyləşə bilmirik. Məktəb uzaqdır. Nə qədər taksi ilə getmək olar? Yol yoxdur, hərəkət də yoxdur”.

“Bir nəfərin kənddə cavan övladı öldü. Yığılan ehsanı yolun müəyyən hissəsinin təmirinə sərf etdi. Növbəti ehsanları gözləyək? İcra, bələdiyyə kənd sakinlərinin hesabına bir maşın çınqıl gətirib tökür, vəssalam. İcra Hakimiyyəti də yaxın durmur”, – deyə kənd sakini gileylənir.

Cəlilabad Rayon İcra Hakimiyyəti Meydan TV-nin sorğusuna cavab verməyib.

İcra hakimiyyəti 2023-cü ilin sentyabrında qurumun “Facebook” səhifəsində bu kəndlərlə bağlı məlumat yayıb.

Həmin məlumatda bildirilir ki, kənd sakinlərindən Sərhədabad bələdiyyəsinə yığılan vergi rüsumları hesabına yola qismən çınqıl tökülüb.

“Su, torpaq vergisi verilməyəndən sonra nə əsaslı təmir?”

Sərhədabad kənd icra nümayəndəsi Əlizamin Əzizov Meydan TV-yə açıqlamasında yolun təmirsiz olmasını bələdiyyənin kənd sakinlərindən vergi toplaya bilməməsi ilə əlaqələndirib.

O, kənddaxili yolların əsaslı təmiri üçün Cəlilabad İcra Hakimiyyətində vəsaitin nəzərdə tutulmadığını da qeyd edib.

“İşsizlik ölkədə problemdir, tək bizim kənddə yox”

İcra nümayəndəsi hazırda yolun bələdiyyənin səlahiyyətində olduğunu deyib:

“Bələdiyyə isə əhalidən vergi toplaya bilmədiyi üçün yolun əsaslı təmirini icra etmir. Üç kənddən ən çox təmirə ehtiyacı olan Məşədivəlli yoludur ki, ancaq ona baxış keçirilib və təmiri nəzərdə tutulub. Ona da çınqıl töküləcək. Bu 3 kəndin təmirə ehtiyacı olan yolu ümumilikdə 10 kilometrdir. Əsaslı təmir üçün də vəsait yoxdur. Bakını su batırdı, o ki qala kənd yolu ola. Yağışlı havada hər yer bərbad olur. Nə edək? İmkan olanda kənd sakinlərinin şəxsi hesabına yola çınqıl döşənir”.

“Kənd sakinləri bələdiyyəyə vergi ödəyirmi ki, yolun təmirini tələb edilər? Su, torpaq vergisi verilməyəndən sonra nə əsaslı təmir? O kənd şikayət edər ki, vaxtında bələdiyyəyə vergi ödəyir. Son iki ildə kənd sakinlərinin və xaricdə yaşayan yerlilərin hesabına bir neçə maşın çınqıl tökülüb. Ən son Belarusda yaşayan həmyerlimiz 3 km yola çınqıl tökdürdü. Çınqıl tökülsə də, yağış, qar yağan kimi ilbəil dağılır, yenə əvvəlki kimi olur. İcra Hakimiyyəti əsaslı təmir üçün ayrıca büdcə ayrılmadığı üçün məsuliyyət daşımır. Bir çıxış yolu var ki, gərək bələdiyyə kənd sakinlərini vergiyə görə məhkəməyə verə, tələb edə, sonra da yığılan pulu təmirə verə. O da uzun prosesdir. İşsizliyə qalanda isə kənd sakinləri heyvandarlıqla məşğul olur, dolanır. İşsizlik ölkədə problemdir, tək bizim kənddə yox”, – deyə icra nümayəndəsi qeyd edib.