"İndi deyəcəklər ki, bu qədər şikayətçisənsə, niyə dəyişmirsən?"

“Azercell” müştəri məmnuniyyəti üzrə beynəlxalq sertifikasiyasını yeniləyib. Almayıb ha. Var imiş. Hələ yeniləyib. Görəsən, hansı xidmətinə görə müştərilər məmnun qalıb? Hər ay artan qiymətlərə görə, ya azalan paketlərin sayına, ya zəifləyən internet sürətinə? Əvvəllər “Gəncol” vardı, 9 manatlığını rahatlıqla aylıq istifadə etmək olurdu, ləğv etdilər, “İstəSən” çıxdı, onunla da yenə sərf edirdi. İndi ancaq “DigiMax” və “Premium” paketlər var. “DigiMax”ın 18 manatlığı heç yarım ay getmir. Hara uçur mb-lar bilinmir. Getdikcə qiymət artır, amma keyfiyyət azalır.

Tribuna.az xəbər verir ki, bu sözləri sosial şəbəkə hesabında jurnalist Firuzə Əliyeva yazıb. O bildirib ki, “Azercell” son vaxtlar ən çox pislənən mobil operatordur:

“Sosial mediada bu qədər narazı istifadəçi var. Mən 10 ildən çoxdur “Azercell” nömrəsi işlədirəm, bir dəfə məmnuniyyətlə bağlı sorğuda iştirak etməmişəm.
Yəqin elə hamı da mənim kimi.
İndi deyəcəklər ki, bu qədər şikayətçisənsə, niyə dəyişmirsən? İllərdi hər yerdə bu nömrəmi qeyd etmişəm, buna görə risk etmirəm, yoxsa gözüyumulu qırıb atardım”.