«OLİQARXLARA BÖYÜK ZƏRBƏ» PLANI HAZIRLANIR
19-09-2012, 10:03
LENİNİN İNQİLABİ İSLAHATLARINA BƏNZƏR OLAYLAR BAŞ VERƏCƏK
DİA.AZ: - Bu gün ayrı-ayrı məmurlarımızın bir oliqarxa çevrilməsi faktdır. Məsələn, faktdır ki, fövqəladə hallar naziri Kəmaləddin Heydərov öz əlində həmçinin böyük bir iqtisadi imperiyanın açarlarını saxlamaqdadır və müxtəlif istiqamətlərdə boy göstərən FHN şefi «Gilan» Holdinq, «Caspian Fish» kimi şəbəkələrə malikdir. Və faktdır ki, nəqliyyat naziri Ziya Məmmədov da nazir həmkarından geri qalmır və o da özünün «ZQAN» Holdinqi ilə biznes mühitində kifayət qədər ciddi mövqe sahibidir. Eləcə də digər ciddi qərar sahibi olan məmurlar da bu kimi halları ilə diqqət mərkəzindədirlər.
Amma bütün bunlar sən demə, müvəqqəti ola bilər. Hər halda, hökumət içindəki mötəbər mənbələrdən DİA.AZ-a ötürülən informasiyalar da təsdiqləyir ki, 2013-cü il prezident seçkilərindən sonra YAP iqtidarı kadr islahatları ilə yanaşı, həmçinin ölkə daxilində böyük rezonans yaradacaq fundamental islahatların da həyata keçirilməsini planlaşdırır.
Mənbəmizə görə, ayrı-ayrı oliqarx məmurların əlindəki iqtisadi monapoliyaların darmadağın edilməsi hazırlanan planın başlıca hissəsidir: «Hər zaman hakimiyyətin yuxarı eşalonu üçün hansısa ciddi mənsəb sahibi olan bir məmurun çıxdaş edilməsi böyük problemə bərabər olub. Məsələn, zamanında keçmiş iqtisadi inkişaf naziri Fərhad Əliyev də böyük güc idi. Fakt idi ki, Fərhad Əliyev əsasən valyuta və qiymətli kağızlar biznesinə nəzarət edirdi. Və hətta dara düşdüyü zaman hazırda həbsxana həyatı yaşayan keçmiş nazir öz qüdrətini hiss etdirməyə də çalışdı».
Mənbəmiz bildirir ki, indiki oliqarx-nazirlər isə Fərhad Əliyevlə müqayisəolunmayacaq səviyyədə «şişiblər»: «Onlar ya təbii yolla, öz axarları ilə, ya da müdaxilə ilə «partlamalıdırlar». Çünki bu qaydada davam etmə qeyri-mümkündür. Çünki enində-sonunda mövcud mənzərə ümumiqtidar maraqlarını belə təhdid edə bilər. Artıq bunun ilkin simptomları da görükməkdədir. Məsələn, bu gün maraqları toqquşan iki oliqarx-məmurun bir-birinə qıcıq olsun deyə, hansısa böhranlı situasiyanı yetişdirə bilməsi və bundan ölkə miqyasında əziyyət çəkilməsi an məsələsidir. Belə bir situasiya isə lik növbədə dövlət başçısını qane etmir».
İddia olunur ki, məhz bu kimi neqativ mənzərələrin darmadağın edilməsi məqsədilə az qala keçən əsrin əvvəllərində yıxılmış çar Rusiyasının sütunları üstündə özünə yeni sovet imperiyası quran Vladimir İliç Leninin islahatlarına bənzər reforma proqramının hazırlanması işinə start verilib: «Əsas proseslər, yəni icra işi daha çox 2014-cü ilə hesablanır. Bu prosesin adına «oliqarx-məmurların əlindəki iqtisadi qüdrətin milliləşdirilməsi işi» də demək olar. Məsələn, «Gilan» Holdinq, «ZQAN» Holdinq və digər buk imi ölkə miqyaslı, böyük təsir gücünə malik iqtisadi şəbəkələrə konkret olaraq əl qoyulacaq».
Artıq bu prosesin indidən başladığını iddia edən mənbəmiz onu da bildirib ki, hətta məmur nəzarətində olmayan iqtisadi ünvanlar da eyni qaydada dövlətin nəzarəti altına alınacaq: «Məsələn, Azərbaycana gəldiyi zaman cibində cəmi-cümlətanı 2 milyon dolları olan və hazırda varidatı 12 milyard dolların üzərində olduğu söylənilən «Azərsun» Holdinqin şefi Abdolbari Gozal bu gün olduqca mühüm, dövləti əhəmiyyətli, strateji bir biznes yönünə - ərzaq biznesinə demək olar ki, şəriksiz qaydada nəzarət etməkdədir. Təbii ki, oliqarx-məmurların iqtisadi şəbəkələri ilə bağlı planın icrası zamanı «Azərsun» Holdinqin kənarda qalması qeyri-mümkündür».
Daha çox böyük təsir gücünə malik holdinq və şirkətləri əhatə edəcək yeni planın nəticəsində orta və xırda sahibkarlar üçün geniş imkanın yaradılacağı da şübhəsizdir: «Çünki, məsələn, «Gilan» Holdinqin «milliləşdirilməsinin» ardından bu şəbəkənin əvvəlki tempində çalışması mümkün olmayacaq və bunun da nəticəsində xırda və orta sahibkarlıq üçün inkişaf zəmini yaranmış olacaq».
Mövzu diqqətimizdədir. Araşdırmalarımız davam edir…
Geri qayıt