ƏBÜLFƏZ QARAYEV PREZİDENTİ NECƏ ALDADIB?
28-04-2012, 13:31
AÇILIŞI KEÇİRİLMİŞ OBYEKTİN TİKİNTİSİNƏ YENƏ MİLYONLAR AYRILIR
DİA.AZ: - Nazirlər Kabinetinin 24s saylı Sərəncamı əsasında 2012-ci ilin əsaslı vəsait qoyuluşunun bölgüsü haqda yazmışdıq. Həmin yazıda daha çox icra hakimiyyətlərinə ayrılan pullar və bu vəsaitlə bağlı maxinasiyalardan bəhs etmişdik. İndi isə həmin sərəncama əsasən Mədəniyyət və Turizim, İdman və Gənclər Nazirliyinə ayrılan 400 milyon manata yaxın vəsait haqda məlumatları diqqətinizə çatdıraq. Həmin xərclərin strukturuna nəzər yetirdikdə vəsaitin böyük hissəsinin ötən illərdən qalma layihələrin davamı üçün ayrıldığını görmək olar. Burada kiçik rəqəmlərdən söhbət getmir. Mənzərəni daha aydın təsəvvür etmək üçün aşağıdakı rəqəmlərə nəzər salmaq kifayətdir.
Yalnız layihə hazırlanmasına 5 milyon
İnvestisiya xərcləri çərçivəsində Mədəniyyət və Turizm Nazirliyinə 273,1 milyon manat ayrılıb. Onun 1 mln. manatı Opera və Balet Teatrının təmir və yenidənqurma işlərinin layihə smeta sənədinin hazırlanmasına sərf ediləcək. Qeyd edək ki, həmin sənədinin hazırlanmasına ötən ilin büdcəsindən 4,4 mln. manat xərclənmişdi. İki il ərzində təmirlə bağlı yalnız layihə hazırlanırısa və bu istiqamətdə 5 mln. manat xərclənirsə, böyük həcmdə korrupsiyanın olacağına bəribaşdan əsaslı şübhələr yaranır. DİA.AZ bildirir ki, adıçəkilən teatrın təmiri və yenidən qurulmasına 2007-ci ildə 1,2 mln. manat istifadə edilib.
Təmiri bitmiş binaya 40 milyon
Qusar rayonunda Şahdağ turizm infrastrukturunun layihə-smeta sənədlərinin hazırlanması və tikintisi üçün bu il daha 200 mln. manat ayrılıb. Nəticədə qış turizm mərkəzinin salınması üçün çəkilən xərclər 900 mln. manata yaxınlaşdı. Ekspetlər hesab edirlər, qış turizm mərkəzinin salınmasını dövlət büdcəsinin üzərinə yüklənməsi məntiqsizdir. Bu layihəyə sahibkarları cəlb etmək lazım idi.
Nizami Kinoteatrı binasının təmir-bəpa işlərinin yekunlaşmasına baxmayaraq, bu il əlavə 3 mln. manat ayrılıb. İndiyədək kinoteatrın binasının əsaslı təmirinə 40 mln. manatdan çox pul xərclənib.
Prezident lent kəsəndən sonra 3 milyon
Xalça Muzeyinin tikintisi də, deysən, hələ çox pul aparacaq. İndiyədək 42,7 mln. manat sərf edilən layihəyə bu ilə daha 12,5 mln. manat ayrılması nəzərdə tutulub.
Tikintisi baha çatmış, hətta prezidentin də açılışda iştirak etdiyi layihələrdən birinə əlavə 2,4 mln. manat ayrılması təəccüb doğurur. Belə ki, «Qobustan Dövlət Tarixi Bədii Qoruğu»nun muzey və inzibati binasının tikintisi üçün nəzərdə tutulan layihəyə indiyədək 13 mln. manat sərf edilib.
İncəsənət Muzeyinin təmir-bərpası da son 7 ildə tükənməyən layihələr sırasındadır. Son 7 ildə büdcədən bu istiqamətə 24,3 mln. manat yönəldilib. Maraqlıdır ki, nazirliyi muzeyin təmirilə bağlı xərci iki istiaqəmdə ayrılıb. 24,3 mln.dan əlavə, son altı ildə başqa xərc istiqaməti üzrə İncəsənət Muzeyinin yenidənqurulmasına 12,2 mln. manat xərclənib. Yaranan qeyri-şəffaflıq müəyyən şübhələrə yol açmaya bilmir. Bundan əlavə 2 mərtəbəli muzeyin təmirinin 36 mln. manatı keçməsi təəssüb və şübhə doğurmaya bilmir.
Milyonçu Tağıyevdən də varlı olan var
Gəncə şəhərində «Şah Abbas» Karvansarayının bərpasına çəkilən xərclər isə artıq 4 mln. manatı keçib.
Son on ildə 2 dəfə əsaslı təmiri başa çatan Dövlət Musiqili Komediya Tetarının başı yenə dərddədir. Artıq 2 ildir ki, bina yenə təmirə dayandırılıb. Son iki ildə buranı təmir etdirmək üçün nazirliyə 40 mln. manat ayrılıb. Hələ sovet dönəmindən əvvəl milyonçu H.Z.Tağıyev tərəfindən inşa olunan bu bina ilk teatr binası sayılır. O zaman Tağıyev bu qədər vəsaitə yəqin 3 teatr binası tikə bilərdi.
Olimpiya mərkəzləri yenə milyonlar yeyir
Dövlətin əsaslı vəsait qoyuluşundan Gənclər və İdman Nazirliyinə düşən pay isə 116,4 mln. manatdır. Ötən il Prezidntin Ehtiyat Fondundan T.Bəhramov adına respublika Stadionunu əsaslı təmirinə 10 mln. manat ayrılmışdı. Bu il stadionun yenidənqurulmasının davam etdirilməsi üçün dövlət investisiya xərclərindən nazirliyinə sözügedən istiqamətə daha 40 mln. manat yönələcək. Qeyd edək ki, stadionun təmiri artıq başa çatmaq üzrədir. Amma yenidən 40 milyon manatın hansı məqsədlə ayrılması təəccüb doğurur. 50 milyon manata T.Bəhrəmov adına stadionun yenisini tikmək olardı.
Regionların sosial-iqtisadi inkişafında heç bir rol oynamayan və qapıları bağlı qalan olimpiya idman komplekslərinin tikintisi bu il də davam etdiriləcək.
Məsələn, 7 ildiri ki, tikintisi gedən Astara Olimpiya İdman Kompleksinin tikintisinə bu il əlavə 931 min manat ayırmaqla, ümumi xərci 12,6 mln. manata çatdırıblar.
Geri qayıt