ZİYA MƏMMƏDOV PULLARI HARA XƏRCLƏYİB?
15-04-2012, 12:47
NEFT PULLARI BAKI TIXACLARINDA HAVAYA SOVRULUR
Bildiyimə görə, bir çox xarici ölkələrdə, o cümlədən keçmiş sovet respublikalarında marşrutlarda bir qayda-qanun var idi. Söhbət heç də nəqliyyatın gecikməsindən, sürücünün kobud rəftarından, mobil telefonla qışqıra-qışqıra danışmasından və s. getmir. Məsələ ondadır ki, bir çox ölkələrdə bir ünvandan başqa ünvana illərlə işləyən marşurutun nömrəsi dəyişmirdi və ya gedəcəyin yerə bir marşurutdan istifadə etməklə çatmaq olurdu. Düzdür, uzaq yerlər olur ki, "perassadka", yəni marşurutu dəyişməklə gedirlər. Ancaq mərkəzi şəhərlərdə, o cümlədən paytaxtlarda marşurutların nömrəsi, birinci və sonuncu ünvanı dəyişmir. çünki illərlə əhali bu marşurutlara öyrəşib və dəqiq bilirlər ki, hansı yerə hansı avtobusla getmək olar.
Bakının dərdi var...
Bizdə isə əksinədir. ötən ilin axırlarında illərlə gözümüz öyrəşdiyi marşurut avtobuslarının rəqəmlərini birdən-birə dəyişdilər. Hələ də bu rəqəm dəyişmə əməliyyatının mahiyyəti aydın deyil. Zərbə isə uzun müddət şəhərə gəlməyən, lakin gedəcəyi ünvana hansı nömrəli avtobusdan istifadə edəcəyini əzbər bilən insanlara dəyir. Məsələn, əvvəllər Bakıxanov qəsəbəsindən Bayıl qəsəbəsinə 131 saylı marşurut işləyirdi. Lakin indi Bakıxanovdan Bayıl qəsəbəsinə gəlmək istəyən sərnişin "Sahil" bağında düşməli, oradan isə başqa avtobusla Bayıla getməlidir.
Deməli, bir ünvandan başqa ünvana getmək üçün sərnişin əlavə olaraq 20 qəpik də ödəməlidir. Bu isə çox mətləblərdən xəbər verir. Nəqliyyat Nazirliyi nəzdində olan Nəqliyyat Departamentinin bu oyunda məqsədi yalnız sərnişinlərin hesabına varlanmaqdan başqa bir şey deyil. Şəhərin əksər yerlərində çox nadir hallarda eyni marşurutla lazımı ünvana getmək olar.
Bu günlərdə 1 saylı Kliniki Tibbi Mərkəzdə (keçmiş "Semaşko" adına xəstəxana) müalicə olunan yaxınımıza bir neçə gün ardıcıl olaraq baş çəkməli olduq. İş elə gətirirdi ki, xəstəxanaya şəhərin ayrı-ayrı ünvanlarından getmək lazım gəlirdi.
Bir gün Bayıl qəsəbəsindən həmin istiqamətə getmək üçün marşurut tapa bilmədim. Əvvəllər 271 saylı marşurut məhz həmin istiqamətə işləyirdi. Görünür, bu marşurut da Nəqliyyat Departamentinin yersiz yerdəyişməsinə qurban gedib, əvəzinə isə həmin istiqamətə heç bir marşurutu buraxmayıblar. Belə olan surətdə avtobusla "Sahil" metrosu tərəfə getdim ki, oradan hər halda "Semaşko" istiqamətinə bir marşurut tapılar. çox təəsüf ki, yanılmışdım. Xeyli gözlədim, lakin sonradan avtobusları tənzimləyən bir dispetçerdən öyrəndim ki, həmin istiqamətə "Sahil" metrosundan gedən heç bir avtobus yoxdur.
Dərd bir deyil...
Fikirləşdim ki, "Nizami" metrosu istiqamətindən əvvəllər "Semaşko"ya 145 saylı marşurut gedirdi. İndi yəqin onu əvəzləyən bir avtobus olar. Odur ki, yol aldım "Nizami" metrosuna. Burada da xeyli gözləyəndən sonra yanıldığımı anladım. Məlum oldu ki, onlarla marşurutun keçdiyi "Nizami" metrosu istiqamətindən bircə dənə də olsun avtobus yoxdur. Təkcə 52 saylı avtobus həmin istiqamə gedir ki, o da xəstəxanadan xeyli aralı keçir. Onda məcbur qalıb bir marşurutla "Oboy evi"nin yanına, oradan isə 128 saylı avtobusla xəstəxanaya getməli oldum.
Növbəti günü fikirləşdim ki, Səməd Vurğun adına bağın yanından "Semaşko" istiqamətinə mütləq marşurut olmalıdır. öyrəndim ki, bu istiqamətdən yalnız 2 saylı avtobus xəstəxananın yanına gedir, əgər onu gözləməyə səbrin çatsa... Məlum oldu ki, 2 saylı avtobus da çox gec-gec işləyir. Doğurdan da 20 dəqiqədən çox gözləsəm də 2 saylı avtobus gəlib çıxmadı. Məcbur olub yenə "peressadka" ilə, yəni başqa avtobusla milli bankın yanına gələrək, oradan 63 saylı avtobusla "Semaşko" istiqamətinə getdim.
Maraqlıdır ki, bu biabırçılıq Nəqliyyat Nazirliyinin baş bilənlərini qətiyyən narahat etmir. Yəni doğrudanmı şəhərin müxtəlif istiqamətlərindən "Semaşko" xəstəxanası tərəfə marşurut açmaq elə bir problemdir? Bəs onlar avtobus marşrutlarını necə müəyyənləşdirib xəritə tuturlar?
özü də nəzərə almaq lazımdır ki, həmin ərazidə həm Səhiyyə Nazirliyi, həm də Tibb Universiteti kimi nəhəng müəssisələr fəaliyyət göstərir, onda mənzərə və problem aydın olar.
Nəqliyyat Nazirliyi rəhbərliyinin diqqətinə onu da çatdırmağı özümüzə borc bilirik ki, hamının şəxsi maşını yoxdur. Mənim kimi şəhər əhalisinin 70-80 faizi şəhər nəqliyyatından istifadə edir. Nəhayət, şəhər nəqliyyatında hökm sürən bu hərc-mərcliyi aradan qaldırmağın vaxtı çatmayıbmı? Axı nəyə görə sadə insanlar mənzil başına çatmaq üçün 2-3, bəzən 3-4 avtobus dəyişib əlavə pul xərcləməlidir?
Televiziyada, mətbuatda tez-tez Nəqliyyat Nazirliyi mətbuat Xidmətinin rəhbəri Namiq Həsənovun müxtəlif hadisələrə, o cümlədən nəqliyyat müfəttişlərinin sürücülərin başına açdığı oyunlara özünəməxsus, bəraətverici şərhlərini dinləməli oluruq. Bircə dəfə eşitmədim hörmətli həmkarım desin ki, Nəqliyyat Departamentinin hansısa müfəttişi elədiyi qanunsuzuluğa görə cəzalandırılıb. Halbuki departament müfəttişlərinin qanunsuz əməlləri barədə bəzən ortada video çarxlar da olur. Lakin N.Həsənov həmişə, özü də çox ürəklə deyir ki, məsələ araşdırılacaq, əgər müfəttişlərin günahı sübut olunarsa, lazımı cəzalarını alacaqlar.
Namiq Həsənovun diqqətinə
İndi isə hörmətli N.Həsənova bildiririk ki, yuxarıda göstərdiklərimiz faktdır və heç bir araşdırmaya da ehtiyac yoxdur. Əgər Nəqliyyat Departamenti, o cümlədən Nəqliyyat Nazirliyi Mətbuat Xidmətinin rəhbəri N.Həsənov doğrudan da sərnişinlərin, o sərnişinlər ki, onların 20 qəpiklərinin hesabına babat pul qazanırlar, qayğılarına qalmaq istəyirlərsə, şəhərdə bir reyd keçirsinlər. O zaman məlum olacaq ki, pul qazandıqları boşqaba qarşı doğurdan da hörmətsizlik edirlər. Vallah bu sərnişinlər yazıqdırlar, heç olmasa elə edin ki, insanlar mənzil başına çatmaq üçün avtobus dəyişmək məcburiyyətində qalmasınlar. Bunu etmək isə elə də böyük bir problem deyil, sadəcə içinizdəki vicdanın səsinə qulaq asmaq yetər.
Geri qayıt