ETİBAR ƏLİYEVİN GİZLİ BOSSLARI KİMDİR?
26-03-2012, 14:44
PREZİDENTİN GÖSTƏRİŞİ İLƏ HƏBS OLUNAN BANKİR KİMƏ GÜVƏNİR?
DİA.AZ: - Məlum olduğu kimi, «TexnikaBank»ın rəhbəri Etibar Əliyev bir neçə günlük həbsdən sonra azadlığa buraxıldı və bununla da ortaya çox ciddi şübhə toxumu səpmiş oldu. Doğrudur, hakimiyyətin bu vaxta qədər yürütdüyü siyasət, nümayiş etdirdiyi davranışlar da zəmin yaradır ki, Azərbaycan vətəndaşında bu kimi hallara bir vərdiş yaransın. Amma bu dəfə məsələnin tamam fərqli ampluada olması kifayət qədər diqqətçəkici oldu.
Söhbət burada ilk əvvəl Etibar Əliyevin suçunun olub-olmamasından gedir. Normal məntiq də bunu diqtə edir ki, əgər həqiqətən də bankirin hansısa formada günahı var idisə, o zaman nədən sonradan azadlığa çıxdı? Yox, əgər Etibar Əliyevin günahsız olduğu sübuta yetirilibsə, o zaman bu həngamə nəyə lazım idi? Hər halda, bu gün Etibar Əliyevin yenidən «TexnikaBank»ın rəhbərliyində qalma məsələsinin özü belə proğblemə çevrilib.
Xatırladaq ki, keçən günlərdə Etibar Əliyevin azadlığa hansı şəraitdə çıxması ilə bağlı məlumatı diqqətinizə çatdırmışdıq. Həmin məlumatlarda da deyilirdi ki, Etibar Əliyev azadlığının müqabilində külli miqdarda varidatından da vaz keçməli olub. Amma bank rəhbərini azadlığa daşıyan yollar bu qədər hamar olmayıb və bu işdə ona yardım edən gizli şəxslər də var.
Mötəbər mənbənin bildirdiklərindən belə aydın olurdu ki, Etibar Əliyevin azadlığa çıxa bilməsi üçün ən böyük dəstəyi verənlərdən biri tanınmış iş adamı, onlarla şirkət sahibi, Rusiyanın yeni seçilmiş prezidenti Vladimir Putinin yaxın dostu İlham Rəhimlidir. Mənbəmiz iddia edir ki, İlham Rəhimli uzun illərdir ki, Etibar Əliyevlə həm dostluq əlaqələrinə və həm də işgüzar əməkdaşlığa malikdir.
DİA.AZ-a mənbənin söylədikləri: «İlham Rəhimlinin şirkətlərinin bütün bank əməliyyatları təsadüfi deyil ki, «TexnikaBank»la həyata keçirilir. Bu bankda həm də İlham Rəhimlinin qara əməliyyatları da həyata keçirildiyindən bu iki şəxsi bir-birilərinə çox mübhəm əlaqələr birləşdirir».
Məlumatlardan o da aydın olur ki, əslində «TexnikaBank» dünənə qədər bir çoxlarının qara pullarının yuyulmasında əsas vasitə olduğundan Etibar Əliyevin həbsdə uzun müddət qalması ilk gündən ağlabatan görünmürdü. Elə buna görə idi ki, Etibar Əliyevin həbsi xəbəri mətbuat üün də inandırıcı gəlməmişdi və bu xəbər qəzet səhifələrinə daha gec yol tapmışdı. Çünki kifayət qədər informasiyalı əksər qəzetçilər belə bir hadsəni ilk gündən inandırıcı hesab etmirdilər.
Redaksiyamızın əldə etdiyimi məlumatlarda o da bildirilir ki, Etibar Əliyev həbsdən azad edilsə də, onun yenidən «TexnikaBank» rəhbərliyinə dönüşü imkansızdır. Bu barədə mənbəmizin söylədikləri: «Təbii ki, Etibar Əliyevi himayə edən qüvvələr bu xəbərin ictimailəşməsinin qarşısını almağa çalışırdılar və onların niyyəti belə idi ki, ümumiyyətlə, xəbərlər yayılmamış Etibar Əliyevi azadlığa çıxarsınlar. Lakin mətbuat nəhayətdə hadisəni işıqlandırdı və planlar pozuldu».
Maraqlıdır ki, hələ də rəsmi qaynaqlar bu faktları işıqlandırmağa həvəs göstərmirlər. Yalnız bank bu barədə açıqlama verərək, fəaliyyətini əvvəlki qaydada davam etdirdiyini açıqladı. Bu isə ortada kifayət qədər qaranlıq məqamlaorın olmasından xəbər verir.
DİA.AZ-ın əldə etdiyi son məlumatlarda isə bildirilir ki, Etibar Əliyevin himayədarları onu yenidən «TexnikaBank»a rəhbər gətirə bilmələri üçün hərəkətə keçiblər və hətta bu məqsədlə araya saldıqları elçilərinin vasitəsilə genişmiqyaslı işlər də görürlər. Nədən ibarətdir bu işlər? Mənbəmiz bildirir ki, ilk növbədə bütün bu əməliyyatın həyata keçirilməsinin məxfiliyinin qorunması başlıca hədəf kimi götürülüb. Yəni nəyin bahasına olursa-olsun bu yöndə mətbuat susdurulmalıdır. Elə buna görə də hətta qəzetlərin əksəriyyətinin pul gücünə susdurulduğu da bildirilir.
Digər tərəfdən, sözügedən himayədar çevrəsi Etibar Əliyevlə bağlı «yuxarıların» təkrar xeyir-duasının alınması üçün də çaba sərf etməkdədirlər. Xatırladaq ki, bankir həbs olunduğu zaman «Turan» agentliyi tərəfindən belə bir ehtimal irəli sürüldü ki, Etibar Əliyev Gürcüstan prezidenti Mixeil Saakaşvilinin Azərbaycan prezidenti İlham Əliyevdən xahişinin ardından həbs olunub. Yəni Etibar Əliyev Gürcüstandan olan iş adamının külli miqdarda pulunu mənimsəyib və bununla bağlı gürcü dövlət başçısı Azərbaycan prezidentindən tədbir görməsini xahiş edib. Və prezident də dərhal Etibar Əliyevin həbsi ilə bağlı müvafiq göstəriş verir.
DİA.AZ-a bu barədə mənbəmiz bildirir ki, əslində bu məsələdə Gürcüstan prezidentinin müstəsna rolu həqiqətən də olub və prezident İlham Əliyev Saakaşvilinin xahişinin ciddi şəkildə araşdırılması ilə bağlı təlimat verib. Və bundan sonra Milli Təhlükəsizlik Nazirliyi hərəkətə keçərək gürcü dövlət başçısının iddia etdiklərinin həqiqət olduğunu müəyyən edib və dərhal da Etibar Əliyevin həbsi ilə bağlı addım atılıb. Lakin bundan sonra Etibar Əliyevin himayədarları hərəkətə keçib.
Mənbəmizin məlumatlarında bildirilir ki, Rusiyameyilli qüvvələrin nəzarəti altında olan Etibar Əliyevə elə dəstək də həmin qüvvələr tərəfindən verilir. Yuxarıda da vurğulamışdıq ki, Etibar Əliyevlə bağlı açıq xahişdə Rusiyanın yenidən seçilmiş prezidenti Vladimir Putinin yaxın dostu İlham Rəhimli bulunub. Halbuki əsas himayədar Rusiyanın Azərbaycandakı bir nömrəli adamı hesab olunan Prezident Administrasiyasının rəhbəri Ramiz Mehdiyevdir.
Beləliklə, aydın olur ki, prezident İlham Əliyevin göstərişi ilə həbs olunan Etibar Əliyev hakimiyyət içindəki rusiyayanlı qüvvələrin dəstəyi ilə təkrar azadlığını qazanır. Lakin onun yenidən banka rəhbər gətirilməsi işi hələ də müşkül problem əhəmiyyətindədir.
Araşdırmalarımız davam edir. Bizi izləyin…
Geri qayıt