KƏLBƏCƏRİ İKİNCİ DƏFƏ İŞĞAL EDƏN MƏMURLAR
3-09-2013, 13:11
BU RAYONDAN OLAN MƏCBURİ KÖÇKÜNLƏRİN HAQQ SƏSİN EŞİDƏN YOXDUR
DİA.AZ: - Redaksiyamıza əraziləri erməni işğalı altında olan Kəlbəcər rayonunun məmurlarının özbaşınalıqları ilə bağlı şikayətlər daxil olub. Maraqlıdır ki, DİA.AZ-a ünvanlanan bu müraciətlərdə bəzi vətəndaşlar bizə öz iradlarını da bildirirlər. Vətəndaşlar tənqidi materiallarda Kəlbəcər RTŞ-nin müdiri Məhyəddin Abdürəhmanovla, RİH-nin məsləhətçisi Heydər Bəylərovla, icra başçısının müavini, İctimai-siyasi və humanitar məsələlər şöbəsinin müdiri Novruz Çıraqovla yanaşı rayonun Maliyyə şöbəsinin müdiri Salman Qasımovun, həmçinin rayonun icra başçısı Aqil Məmmədovun və digərlərinin də adlarının çəkilməsini tələb edirlər.
Bu xüsusda yeni aldığımız məlumatlarda israrla bildirilir ki, redaksiyamıza daxil olan şikayətlər əslində Kəlbəcərlilərin etirazlarını ifadə edən fikirlərin yalnız cüzi bir hissəsidir. Mənbələr DİA.AZ-a iddia edirlər ki, çoxları təqiblərdən, hədələrdən qorxaraq haqq səslərini ucaltmaqdan qorxurlar: “Bəlkə də bu gün respublikada rüşvətxorluğun, korrupsiyanın ən çox vüsət aldığı rayon məhz bizim Kəlbəcərdir. Sadəcə rayon əhalisi yuxarılarda güclü adamları olan məmurların verə biləcəkləri reaksiyadan qorxurlar. Əslində isə rayonun bütün idarələri rüşvətlə işləyirlər. Rüşvət gücünə burada istənilən problemi həll etmək olar...”
Ötən yazılarımızda biz artıq qeyd etmişdik ki, şikayətçilərin öz naraqzılıqlarını bildirdikləri məmurlar sirasında ilk olaraq adı çəkilən şəxs məsləhətçi Heydər Bəylərovdur. İlk növbədə məlumatda belə bir fakt diqqəti çəkir ki, müəlliflər H.Bəylərovun orduda xidmətdən yayınmasını iddia edirlər. Daha sonra göstərilir ki, bu vəzifəyə təyin olunmaqdan əvvəl mal-qara ticarəti ilə məşğul olan H.Bəylərovun hazırda tutduğu vəzifənin öhdəsindən gələ bilmək üçün nə müvafiq təhsili, nə sərişəsi, nə də iş təcrübəsi yoxdur. Bildirilir ki, hələ Kəlbəcər RİH-nin sabiq başçısı Vidadi Məhərrəmovun dövründən “icranın pul yığanı” kimi tanınmış Heydər Bəylərov qarşısına çıxan bütün problemləri təhdidlər, hədə-qorxular, zor və şiddət gücünə həll etməkdən fərqli bir üsul tanımır. Daha sonra məktubda qeyd olunur ki, Kəlbəcər rayon məktəblərinin direktorları bu gün də H.Bəylərova hər ay 50 manat “bac” verməkdə davam edirlər. Rayon üzrə 114 məktəbdən hər ay yığılan bu külli-miqdarda vəsaitin hara xərcləndiyindən bixəbər olan direktorlar yalnız onu bilirlər ki, bu pulu bircə dəfə gecikdirməklə, dərhal çağırılacaq şura iclasında açıq hədəfə ceviriləcəklər. Daha sonra mənbələr bildirmişdilər ki, Rayon İcra Hakimiyyəti başçısının müavini, İctimai siyasi və humanitar məsələlər şöbəsinin müdiri Novruz Çıraqovun direktorlardan aldığı “aylığın” məbləği bundan iki dəfə də artıqdır. Yeni aldığımız məlumada isə Kəlbəcər təhsilinə qənim kəsilmiş daha iki məmurun adı çəkilir. Mənbə bu məmurlardan birinin rayonun Maliyyə şöbəsinin müdiri Salman Qasımov, digərinin isə yenə də maliyyə şöbəsinin Mamed (məktubda “maliyyə Mamed” kimi təqdim olunub) adlı başqa bir əməkdaşı olduğunu bildirir. Xatırlayırsınızsa, son dərc olunmuş yazıda Kəlbəcər RTŞ-nə ayrılmış 600 000(altı yüz min) manat vəsaitin böyük bir hissəsinin şöbənin müdiri Məhyəddin Abdürəhmanov tərəfindən mənimsənilməsi barədə məlumat da dərc olunmuşdu. Yeni aldığımız məlumatlarda iddia olunur ki, Məhyəddin müəllim üçün bu maxinasiyanı keçirməyə imkan yaratmış Salman Qasımov və maliyyə Mamed bunun müqabilində RTŞ müdirindən ümumi məbləğin 10%-ni, yəni 60 000 (altımış min) manatı nəğd şəkildə alıblar: “Kəlbəcərin maliyyə şöbəsi rayonda baş verən bütün maliyyə fırıldaqlarının başında durur. Hər hansı bir əməliyyatı maliyyə şöbəsindən pulsuz keçirmək mümkün deyil. Şöbənin müdiri Salman müəllim 20 ilə yaxın bir müddətdir ki, bu vəzifəni tutub. İcra hakimiyyətində isə guya ki, bu maxinasiyalardan bixəbərdirlər. Əslində isə bütün əməliyyatlardan icra da öz faizini alır.”
Qeyd edək ki, əvvəl aldığımız məlumatlarda da baş verən mənimsəmə hallarına rayonrəhbərliyi tərəfindən “xeyir-dua” verildiyi iddia olunurdu: “Çox maraqlıdır ki, bütün bu maliyyə pozuntuları rayon icra hakimiyyətinin, yerli hakimiyyət orqanlarının gözü qarşısında baş verir. Qarşıdan qış ayları gəlir, məktəblərə ayrılmış yanacaq pulları yeyilir, qış aylarında məktəblər istiliksiz qalır. Gözdən pərdə asmaq üçün yalandan kosmetik təmirlər edilir, yuxarılara yalan məlumatlar verilir, dövlətin qalan vəsaitini də Məhyədin müəllim kimlərləsə əlbir olub bölüşüb yeyir, dövlətin bu qədər vəsaitini mənimsəyib dağıdır.” Biz həmçinin göstərmişdik ki, bu sətirlərin müəllifi təzyiqlərə məruz qalacağı səbəbilə adının açıqlanmasına razı olmasa da, hal-hazırda RTŞ-də məsul vəzifə daşıdığını da inkar etmir.
Ötən yazılarda bilavasitə Kəlbəcər RTŞ-nin müdiri Məhyəddin Abdürəhmanovun həyata keçirdiyi müxtəlif rüşvət yığımlarından kifayət qədər faktlar təqdim olunmuşdu. Qeyd olunmuşdu ki, Məhyəddin müəllim bu vəzifəyə təyin olunan kimi şöbənin işçiləri Elçin Şirinov və Xəqani İbrahimov bu münasibətlə məktəb direktorlarından “şirinlik” adı ilə üç-dörd min manat məbləğində pul yığmağa başlayıblar ki, hal-hazırda 114 məktəbi olan rayonun 80 məktəbindən belə rüşvət pulları yığılmışdır. Hesabı vermək istəməyən direktorlar isə hədələnir, təqiblərə məruz qoyulurlar. Şöbə müdiri bütün bunları özünə yaxın olan adamların əli ilə həyata keçirir ki, əməllərini ört-basdır edə bilsin. Məktəb direktorları hesab vermədikləri halda işdən çıxarılma ilə hədələnir, onların vəzifədə qalıb işləmələri üçün hər bir direktordan isə on min manat hesab istənilir. Müqavilə əsasında işə götürülən və iki-üç ildir işləyən müəllimlərin hər birindən işlərində qalmaları üçün iki-üç min manat pul tələb edilir. Yeni aldığımız məlumatda da bu mövzu davam etdirilir. Bildirilir ki, Kəlbəcər rayonunun Mingəçevirdə fəaliyyət göstərən 118 saylı tam orta məktəbinin direktoru Məlahət İsmayılova bir müddət əvvəl yaş həddinə görə tutduğu vəzifəsindən azad olunmuşdur. Yeni direktor təyin olunan şəxs isə bu posta gəlmək üçün RTŞ müdirinə 15 000 (on beş min) manat rüşvət ödəməli olmuşdur. Gəncə ərazisində qaçqınlar üçün yeni salınmış qəsəbədə fəaliyyət göstərəcək yeni məktəbə isə əvvəllər 9 saylı məktəbə rəhbərlik etmiş Məmməd Məmmədov direktor təyin olunub. Mənbənin sözlərinə görə bu təyinat daha baha başa gəlib: “Bu təyinat üçün M.Məmmədovdan 25 min manat pul alıblar. İndi təbii ki, bu direktorlar da qoyduqları pulu çıxarmaq və daha çox qazanmaq üçün müxtəlif maxinasiyalara əl atacaqlar. Rüşvətxorluq, müxtəlif korrupsiya əməlləri hamının gözü qarşısında baş verir. Lakin büyün bunları durdurmağa heç kəs tələsmir.”
Ümid edək ki, bəlkə bundan sonra Kəlbəcərdə baş verənlərə aydınlıq gətirməyə borclu olan qurumlar təqdim olunmuş faktları araşdırmağa tələsərlər...
Geri qayıt