XALQ CƏBHƏSİ YENİDƏN DOĞULUR
23-12-2011, 16:48
QƏRBİN AZƏRBAYCAN MÜXALİFƏTİ İLƏ BAĞLI YENİ PLANI
DİA.AZ: - Astroloqların dediyinə görə, gələn il əjdaha üstündə təhvil alınacaq. Və astroloji proqnozlara görə, əjdaha ili əksər hallarda böyük dəyişikliklərin astanası hesab olunur. Elə SSRİ kimi nəhəng bir imperiyanın çöküşünə nədən olan 1988-ci ildən start götürmüş milli azadlıq hərəkatları da əjdaha ilində meydana gəlmişdi.
Elə indidən proqnozlaşdırmaq olar ki, Azərbaycan üçün gələn il heç də rahat şəraitdə yola verilməyəcək. Biz nə astroloq deyilik, nə də münəccim. Sadəcə olaraq ortalıqdakı reallıqlar belə deməyimizə əsas yaradır.
Gələn il Azərbaycan bir çox mühüm beynəlxalq tədbirlərə ev sahibliyi edəcək. Bunlar arasında daha çox diqqətçəkəni «Avroviziya» mahnı yarışmasının Bakıya təsadüf etməsidir. Artıq indidən sözügedən yarışmanın təşkilatçıları ilə rəsmi Bakı arasında mübhəm danışıqların cərəyan etdiyi ortaya çıxır. Bu barədə verilən məlumatlardan aydın olur ki, YAP hakimiyyəti qarşısında «Azad mahnı - Azad ölkədə!» tələbini irəli sürən «Avroviziya» təşkilatçıları hətta 31 Dekabr - Dünya Azərbaycanlılarının Həmrəliyi Günü ilə bağlı imzalanması nəzərdə tutulan əfv fərmanına da səbəb olublar.
Bundan əlavə, Azərbaycan daha bir neçə dünya əhəmiyyətli idman yarışmasına ev sahibliyi edəcək. Bir sözlə, gələn il ölkəmizə ən azından 300-400 min arası əcnəbinin məhz bu beynəlxalq tədbirlər səbəbindən təşrif buyuracağı planlaşdırılır. Və bildirək ki, planlaşdırılanlar tək bunlar deyil…
Redaksiyamıza daxil olan məlumatlardan aydın olur ki, gələn il eyni zamanda siyasi müstəvidə çox ciddi təlatümlərin ili kimi diqqətimizi cəlb edəcək. Bu ilin əvvəlindən ərəb ölkələrində cərəyan edən inqilab atmosferinin məhz 2012-ci ildə Azərbaycana sirayət edəcəyini proqnozlaşdıran ekspertlər də vurğulayır ki, postsovet ölkələrində «Ərəb baharı»nın tarixi gələn ilə təsadüf edir.
Xatırladaq ki, bu barədə bir neçə gün əvvəl Suriyə prezidenti Bəşir Əsəd də maraqlı bir açıqlama vermişdi. Suriyə prezidenti açıq şəkildə bildirdi ki, onun ölkəsindən sonra sıra postsovet ölkələrindədir.
Təbii ki, əgər Azərbaycanda inqilab olacaqsa, bu inqilabı həyata keçirən qüvvələr də olmalıdır. Bu barədə isə bildirilir ki, yenə də ənənəvi qüvvələr dəyişikliyin əsas lokomotivi kimi çıxış edəcəklər. Yəni söhbət bu gün adına «radikal», «ənənəvi» deyilən və əslində keçmiş Azərbaycan Xalq Cəbhəsinin şinelindən çıxmış qüvvələrdən gedir. Həmin qüvvələrin isə kimliyi hər kəsə məlumdur: Əli Kərimlinin rəhbərlik etdiyi Azərbaycan Xalq Cəbhəsi Partiyası, Mirmahmud Mirəlioğlunun lideri olduğu Klassik Azərbaycan Xalq Cəbhəsi Partiyası və İsa Qəmbərin başqanı olduğu Müsavat Partiyası.
Redaksiyamıza daxil olan məlumatlardan aydın olur ki, əslində eloktorat və siyasi söykənəcək baxımından bir-birinə həddindən artıq yaxın olan və hətta bəzi hallarda bir-birinin təkrarı kimi qəbul edilən bu üç qüvvə artıq beynəlxalq konsorsiumun da diqqətini cəlb edib. Diplomatik qaynaqların bilgisinə görə, Qərbin siyasi çevrələri neçə müddətdir ki, hər üç siyasi təşkilatla danışıqlar aparır, onların birgə fəaliyyət göstərmə imkanlarını araşdırırlar.
Xatırladaq ki, buna qədər də AXCP, Müsavat və KXCP-nin birgə koalisiyasının yaradılması və hətta onların bir bayraq altında birləşdirilməsi ideyası ortaya atılmışdı. Lakin sonradan bu məsələlər tamamilə unuduldu. Son məlumatlarda isə bildirilir ki, Azərbaycanda yeni dəyişiklik planı üzərində baş sındıran Qərb dairələri hər üç təşkilatı bir araya gətirəcək yeni prosesə start veriblər.
«Artıq hər üç təşkilatla ayrı-ayrılıqda iş aparılır» deyən məlumatlı mənbəmizin sözlərinə görə, ola bilsin ki, bu üç partiyanın timsalında Azərbaycan Xalq Cəbhəsi yenidən bərpa olunsun: «Doğrudur, bu barədə müzakirələr aparılmayıb. Sadəcə olaraq ideya mövcuddur. Ola bilsin ki, başqa bir birləşdirici ad təklif edilsin. Amma istənilən halda, bu üçlüyün bir araya gətirilməsi yolunda addımlar atılacaq».
Onu da bildirək ki, artıq hər üç təşkilatın nümaəndələrinin Avropa ölkələrinə səfərləri də başlayıb. Və bu səfərlərin hansı məqsəd daşıdığını təxmin etmək də çətin deyil. Bu günlərdə isə həm KXCP sədri və həm də AXCP sədri ayrı-ayrılıqda tədbir düzənləyərək Azərbaycanda yeni dəyişiklik dalğasının anonsunu da ictimaiyyətin diqqətinə çatdırdılar ki, bu olayları da təsadüflərin quyruğuna bağlamaq olmaz.
KXCP-nin Nizami rayon fəalları ilə görüşündə Mirmahmud Mirəlioğlu konkret olaraq növbəti hakimiyyətə hazırlıq tədarükü ilə bağlı çox ciddi ismarıclar verdi. Elə şəmin gün AXCP sədri Əli Kərimli də gənclərlə görüşündə, hamını meydanlara, dəyişikliklərə çağırdı. Bir günün içində iki ayrı-ayrı partiyadan bənzər mesajların verilməsi hər halda, təsadüfi hesab oluna bilməz.
Məlumatlı mənbələr redaksiyamıza bildirirlər ki, artıq Qərbin KXCP, Müsavat və AXCP üçlüyünü bir araya gətirmə yolunda ciddi çabaları müşahidə olunmaqdadır: «Burada başlıca məqsədin dəyişiklik tədarükü olması isə sirr deyil». Mənbəmizin bildirdiklərindən o da aydın oldu ki, gələn il məlum proseslər daha da intensivləşəcək. Hər halda, günlərin birində Mirmahmud Mirəlioğlu, Əli Kərimli və İsa Qəmbər eyni bəyanata imza atarsa, o zaman təəccüblənməyəcəyik. Çünki bunun ilkin işartıları artıq ortadadır.
DİA.AZ - Ekspert Qrupu
Geri qayıt