“AZƏRBAYCAN SƏNAYE SIĞORTA” İLK QATILDIĞI TENDERDƏ QALİB OLDU
15-11-2011, 14:28
QURUMUN TƏKLİFLƏRİ ƏN MÜNASİB HESAB EDİLİB
DİA.AZ: - Azərbaycan Sənaye Sığorta Azərbaycan Respublikası Mərkəzi Bankının balansında olan əsas vəsaitlərin, nağd pulun və nəqliyyat vasitələrinin (kasko) sığortalanması ilə əlaqədar tenderin qalibi olub. Bu barədə qurumdan DİA.AZ-a verilən məlumatda deyilir.
Bildirək ki, Azərbaycan Respublikası Mərkəzi Bankı öz balansında olan əsas vəsaitlərin, nağd pulun və nəqliyyat vasitələrinin (kasko) sığortalanması ilə əlaqədar keçirdiyi tenderin nəticələrini elan edib.
Tenderdə təqdim edilmiş təkliflərin qiymətləndirilməsinin nəticələrinə əsasən tender komissiyasının qərarı ilə əsas vəsaitlərin və nağd pulun sığortası üzrə "Azərbaycan Sənaye Sığorta" Açıq Səhmdar Cəmiyyəti tenderin qalibi elan edilib. Bundan sonra sığorta şirkəti ilə müvafiq sığorta müqavilələri bağlanılıb.
Qeyd edək ki, tenderdə bir çox yerli sığorta şirkətləri iştirak edib. Xüsusilə qeyd etmək lazımdır ki, “Azərbaycan Sənaye Sığorta” ASC bu tenderdə ilk dəfə təkliflə çıxış etmiş, nəticədə əmlak sığortası və nağd pulun sığortası üzrə tenderin qalibi olub.
"Azərbaycan Sənaye Sığorta" ASC-nin təqdim etdiyi təkliflər əsasən maliyyə və sığorta şərtləri amilləri üzrə qiymətləndirilmiş və Mərkəzi Bankın tələblərinə cavab verən ən uyğun təkliflər hesab edilmişdir.
Xatırladaq ki, şirkətin səhmdarları, hər birinin payı 50% olmaqla “Azərbaycan Sənaye Bankı” ASC və “Anadolu İnvestment Company” MMC-dir. Şirkət Cİ Sığorta Şirkəti adı ilə 17 dekabr 1996-cı ildə təsis edilmişdir və 12 mart 2007-ci ildə adını dəyişdirərək “Azərbaycan Sənaye Sığorta” Şirkəti kimi fəaliyyətini davam etdirmişdir.
Şirkətin nizamnamə kapitalı 6,000,000 AZN təşkil edir. Şirkət müştərilərə 28 könüllü və 5 icbari olmaqla cəmi 33 sığorta növü üzrə xidmət göstərir.
DİA.AZ - Reklam XİDMƏTİ
Geri qayıt