PREZİDENTİN QIZI JURNALINI TƏQDİM ETDİ
13-11-2011, 13:31
“BAKU”NUN İNGİLİSCƏ VERSİYASI MARAĞA SƏBƏB OLUB
Moskvadakı Ostojenka küçəsində yerləşən "Multmedia Art Muzey"də "Baku" jurnalının ingilisdilli "Baku İnternational" versiyasının birinci nömrəsinin təqdimatı keçirilib.
Heydər Əliyev Fondunun vitse-prezidenti, "Baku" jurnalının baş redaktoru Leyla Əliyeva mərasimdə iştirak edib.
Lent.az-ın xəbərinə görə, jurnalın baş redaktoru mərasim iştirakçıları qarşısında çıxış edərək, 2007-ci ilin dekabr ayında Moskvada "Baku" jurnalının birinci nömrəsinin təqdim edildiyini xatırladıb. Onun sözlərinə görə, elə həmin vaxtdan bu nəşrin beynəlmiləl versiyasını yaratmaq ideyası meydana gəlib: “Oktyabrın 4-də "Conde nast" nəşriyyatı ilə əməkdaşlıq sayəsində jurnalın ingilis dilində olan versiyası çapdan çıxıb. İndi bizim oxucular bu jurnalı təkcə Bakıda və Moskvada deyil, həmçinin London, Paris, Roma, Berlin, Nyu-York və dünyanın digər şəhərlərində tapa biləcəklər".
Baş redaktor deyib ki, jurnalın birinci nömrəsi od, atəş mövzusuna həsr edilmişdir: “Bu da təsadüfi deyil, çünki Azərbaycan zərdüştiliyin beşiyi sayılan diyarlardan biridir və hətta bu ölkənin Azərbaycan adı özü də "od" mənası verən "azər" sözündən yaranıb. Bakı qədim və eyni zamanda, çox gənc şəhərdir. Bu gün Bakıda avanqard memarlıq şedevrləri ilə hələ XIX əsrdə neft bumu dövründə tikilmiş binaların, teatrların, muzeylərin qədim fasadları bir-birini ahəngdar şəkildə tamamlayır. Şəhər üzərində ucalan nadir, müasir "Fleym Tauers" kompleksi Qız Qalasının hündürlüyünü kölgədə qoymur. Biz bütün belə məqamları jurnalımızın səhifələrində işıqlandırmağa, həmçinin Şərq ilə Qərbin qovuşduğu ölkəmizin qədim tarixi, onun zəngin mədəniyyəti və heyrətamiz təbiəti barədə söhbət açmağa çalışmışıq. Ən başlıcası, biz bu jurnalda insanlar haqqında - Azərbaycanın böyük rəssamları, yazıçıları, bəstəkarları və hər birinin öz həyat tarixçəsi olan, Bakıya məhəbbət hissinin birləşdirdiyi sadə insanlar haqqında söhbət açacağıq".
Leyla Əliyeva nəşriyyatın bütün komandasına, bu layihəyə inanmış, öz zəhmətlərini və məharətlərini əsirgəməmiş fotoqraf və rəssamlara təşəkkürü bildirib: “Mənə çox xoşdur ki, bu təqdimat mərasimi gözəl Moksva şəhərində, "Baku" jurnalının birinci nömrəsinin ərsəyə gəldiyi şəhərdə keçirilir. Onu da qeyd etməyə bilmərəm ki, gələn il Azərbaycanda "Eurovision" mahnı müsabiqəsi keçiriləcəkdir. Fürsətdən istifadə edib sizin hamınızı bizim şəhərə gəlməyə, onun qədim küçələrində, müasir bulvarlarında gəzintiyə çıxmağa, Xəzərin ətrini və Bakı şəhərinin bütün ecazkarlığını duymağa dəvət etmək istərdim".
"Conde Nast" nəşrlər evinin baş direktoru Albert Rid qeyd edib ki, onlar peşəkar komanda ilə işləyirlər: “İtaliyanın "Vogue" jurnalı italyan dizaynını, Amerikanın "New Yorker" jurnalı Amerika ideyalarını dünya ilə bölüşür. Biz çox şadıq ki, Leyla Əliyevanın rəhbərlik etdiyi "Baku" jurnalı da Azərbaycanla bağlı oxşar amallara xidmət edir. "Baku" jurnalının beynəlxalq versiyasının ilk buraxılışı bizi çox sevindirir. Biz bu jurnalı Leyla Əliyeva ilə birlikdə tərtib edirik və bizə təqdim edilən materialın keyfiyyəti sözün yaxşı mənasında bizi çox heyrətləndirdi".
A.Rid xüsusi vurğulayıb ki, onlar "Baku" jurnalının ingilisdilli versiyasının səhifələrində Azərbaycan haqqında dünyaya mümkün qədər çox məlumat verməyə hazırlaşırlar.
Sonra Azərbaycana həsr olunmuş videoçarx nümayiş etdirilib.
Mərasimin rəsmi hissəsindən sonra Leyla Əliyeva və qonaqlar Bakıya həsr olunmuş fotosərgiyə tamaşa ediblər.
Təqdimat mərasimi "Natiq ritm qrupu" nağaraçılar ansamblının ifası ilə başa çatıb.
Rusiya Prezidenti Administrasiyasının rəhbəri Sergey Narışkin, Azərbaycanın Rusiyadakı səfiri Polad Bülbüloğlu, Arzu Əliyeva və onun həyat yoldaşı, habelə tanınmış bəstəkar və müğənni Emin Ağalarov, Heydər Əliyev Fondunun icraçı direktoru Anar Ələkbərov, tanınmış ictimai və siyasi xadimlər, RF dövlət orqanlarının nümayəndələri, incəsənət xadimləri və Azərbaycan diasporunun nümayəndələri təqdimat mərasimində iştirak ediblər.
Geri qayıt