BAKIDAKI “TOPQAPI” RESTORANINA QADAĞA
17-10-2012, 10:15
RESTORANDA HƏR YEMƏYİ YEMƏK OLMAZ
Bakıda restoranlardan birində bəzi yeməklərin satışına qadağa qoyulub.
Standartlaşdırma, Metrologiya və Patent üzrə Dövlət Komitəsindən Trend-ə verilən məlumata görə, Komitə yanında Texniki Tənzimləmə və Standartlaşdırma üzrə Dövlət Nəzarəti Xidməti tərəfindən Bakı şəhəri, Nərimanov rayonu, Ə.Ağaoğlu küçəsi, 26 ünvanında fəaliyyət göstərən fiziki şəxs Yaqub Şayevə məxsus "Topqapı" restoranında dövlət nəzarəti aparılıb.
Araşdırma zamanı müəyyən olunub ki, müəssisədə müxtəlif kulinar məmulatlar və milli xörəklərin hazırlanması üçün yarımfabrikatlar standartların tələblərinə zidd olaraq müəyyən edilmiş qaydada təsdiq olunmuş texnoloji təlimat və resepturalar olmadan hazırlanır, mövcud olan soyuducu kamerada mal qonşuluğu pozularaq yarimfabrikatlar, çiy və bişmiş ət eyni tempraturda saxlanılır, istifadə olunan ətin baytarlıq sənədləri mövcud deyildir.
Həmçinin hazırlanan salatların, kabab üçün yarımfabrikatların, peraşkilərin, müxtəlif milli xəmir xörəkləri üçün yarımfabrikatların, blinçiklərin və s. kulinariya məmulatlarının hazırlanma tarixi və yararlılıq müddəti barədə müəssisədə qeydlər aparılmır.
Restoran tərəfindən hazırlanmış məhsullardan götürülmüş nümunələrin Komitənin Təcrübə-Sınaq Mərkəzinin laboratoriyasında keçirilən sınaqları göstərib ki, "paytaxt" və "manqal" salatları ümumi mikroorqanizmlərin sayına (mezofil-aerob və fakultativ-anaerob mikroorqanizimlərinin), Saureus və proteus mikroorqanizimlərinin aşkar edilməsinə, "lülə kabab"ın hazırlanması üçün ət qiyməsi yarımfabrikatında bağırsaq çöpləri qrupundan olan bakteriyaların aşkar edilməsinə görə standartın tələblərinə cavab verməyib.
Aşkar olunmuş nöqsanlarla əlaqədar fiziki şəxs Yaqub Şayevə məxsus "Topqapı" restoranına İnzibati Xətalar Məcəlləsinin tələbinə əsasən inzibati protokol tərtib edilib, cərimə edilib, "paytaxt" və "manqal" salatlarının, "lülə kabab" üçün yarımfabrikat ət qiyməsinin hazırlanması və satışı qadağan edilib.
Geri qayıt